Read Falam Chin SEEMTIRNAK 11 Bible Online

SEEMTIRNAK 11 - Falam Chin bible

SEEMTIRNAK 11

¹Hlanah cun leilung tlun mi hmuahhmuah in ṭong phunkhat lawng an nei ih ṭongfang bangrep an hmang.

²Nisuahnak lamah an vai ih Babilonia nelrawn an thleng ih cutawkah khua an to.

³Cutikah, “Rahnik uh, phahlei tuah in meisa ah rawh uhsi,” ti ah pakhat le pakhat an ti-aw. Cutiin inn saknak ah tlakrawh an nei ih a erhnak ah ṭhung an tuah.

⁴Cuṭheh in, “Ra uh; Kan hrangah khawpi kan tuah pei ih van dai in lungdawl kan tuah pei. Kanmah ih hrangah hmin nei ve seh; cule leilung khuazakip ah darhdai loin kan um ding a si,” ti ah an ti-aw.

⁵Cutikah milai ih an tuahmi khawpi le lungdawl zoh dingah BAWIPA cu a rung ih,

⁶“Zohhnik uh, hi pawl hi an zatein miphun phunkhat an si ih ṭong pakhat an hmang. An tuahmi hi thil tuah an tummi a hramthawhnak lawng a si lai. A rei hlanah tuah an duhmi hmuahhmuah an tuahsuak thei ding.

⁷Curuangah kan vung feh pei ih pakhat le pakhat an aan ciing-aw lo dingin an ṭong kan cokrawi thluh pei,” ti ah a ti.

⁸Cutiin BAWIPA in milai pawl cu leilung khuazakip ah a ṭhekdarh thluh ih khawpi cu an sak ṭheh suak lo.

⁹A cuih khawpi cu Babel[13] ti ah an ti, ziangahtile cutawkah milai ih ṭong cu Bawipa in a cokrawi sak thluh ih, leilung tlun khuazakip ah a ṭhekdarh thluh hai a si.

¹⁰Shem ih tesinfa cu a hnuailam pawl hi an si. Tilik a tlun hnu kum hnih ah, Shem cu kum zakhat a ti ih, fapa pakhat Arpakshad a nei.

¹¹Cuih hnuah kum zanga a nung ih fapa dang le fanu dang khal a nei.

¹²Arpakshad cu kum sawmthum le kum nga a si tikah fapa Shelah a nei.

¹³Cuih hnuah kum zali le kum thum a nung ih fapa dang le fanu dang tla a nei.

¹⁴Shelah cu kum sawmthum a kim tikah fapa Eber a nei.

¹⁵Cuih hnuah kum zali le kum thum a nung ih fapa dang le fanu dang tla a nei.

¹⁶Cun Eber cu kum sawmthum le kum li a si tikah fapa Peleg a nei.

¹⁷Cuih hnuah kum zali le sawmthum a nung ih fapa dang le fanu dang tla a nei.

¹⁸Peleg cu kum sawmthum a si tikah fapa Reu a nei.

¹⁹Cuih hnuah kum zahnih le kum kua a nung ih fapa dang le fanu dang tla a nei.

²⁰Reu cu kum sawmthum le kum hnih a si tikah fapa Serug a nei

²¹Cuih hnuah kum zahnih le kum sarih a nung ih fapa dang le fanu dang tla a nei.

²²Serug cu kum sawmthum a si tikah fapa Nahor a nei.

²³Cuih hnuah kum zahnih a nung ih fapa dang le fanu dang tla a nei.

²⁴Nahor cu kum kul hluankua a si tikah fapa Terah a nei.

²⁵Cuih hnuah kum za le hleikua a nung ih fapa dang le fanu dang tla a nei.

²⁶Cule Terah cu kum sawmsarih a si tikah fapa pathum Abram, Nahor le Haran a nei hai.

²⁷Terah ih tesinfa pawl cu Abram, Nahor le Haran an si. Haran cu Lot ih pa a si.

²⁸Haran cu a pa Terah a nun laiah Khaldea ram, a suahnak Ur khua ah a thi.

²⁹Cun Abram in Sarai a ṭhit ih Nahor in Haran ih fanu Milkah a ṭhit. Haran cu Iskah ih pa khal a si.

³⁰Sarai cu faate a nei lo, ziangahtile nucing a si.

³¹Cule Terah cun a fapa Abram le a fasuan, Haran ih fa, Lot le Abram ih nupi Sarai cu a lak hai ih Kanaan ram feh dingah Khaldea ram Ur khua cun a pok. Asinain Haran khua tiang an feh ih cutawkah cun umhmun an khuar.

³²Terah cu kum zahnih le kum nga a si tikah Haran khua ahcun a thita.