Read Falam Chin SEEMTIRNAK 13 Bible Online

SEEMTIRNAK 13 - Falam Chin bible

SEEMTIRNAK 13

¹Cutiin Izipt ram in Abram cu a suak ih saklam ram Negev lamah a nupi le a neihmi hmuahhmuah thawn an feh. A hnenah Lot khal a tel.

²Abram cu milianzet a si ih tuu, me, caw pawl tampi a nei ih sui le ngun khal a nei.

³Negev in a pok ih riahbuk pakhat hnu pakhat a ṭhawn vivo ih, hmaisa bikih riahbuk a saknak Bethel le Ai karlakih ram lamah a feh.

⁴A hmaisaih biakṭheng a tuahnak hmun a thlen tikah BAWIPA ih a hmin a ko.

⁵Cule Abram thawn a feh ve mi Lot khal in tuu le me le caw pawl tampi a nei ih hnenum tla a nei.

⁶Abram le Lot cu ṭilva tampi an nei veve ih rannung ei ding hrampi khopkham a um lo ruangah hmunkhat ah an umtlang thei lo.

⁷Curuangah an ṭilva kiltu pawl karlakah napi ih tawh awknak a suak. Culai ahcun Kanaan mi le Periz mi pawl cuih ramah an um lai hrih a si.

⁸Cutikah Abram in Lot hnenah, “Sungkhat kan si ih na minung pawl le ka minung pawl hi to-aw rero ding an si lo.

⁹Kan ṭhen-aw sawn pei. Na duhmi ram hril awla cutawkah feh aw. Kei hmun dangah ka feh pei,” a ti.

¹⁰Cutikah Lot cu khua a cuan ih, BAWIPA ih hmuan le Izipt ram vek a si mi Jordan tiva kap phairawn cu Zoar tiang tidai tamzet ih ngahmi ramṭha a si kha a hmu. Culai ahcun Sodom le Gomorrah pawl cu BAWIPA in a siatter hrih lo.

¹¹Lot cun amah ih hrangah Jordan tiva kap phairawn zatein a hril ih nisuahnak lamah a cer. Cuticun an ṭhen-awta.

¹²Abram cu Kanaan ramah cun a um ih Lot cu phairawn ih khawpi lakah a um. Sodom khua kiangah buk a sak.

¹³Sodom khuasung mi cu miṭha lozet an si ih BAWIPA hmaiah an sual ngaingai.

¹⁴Lot ih a tlansan hnu cun Abram hnenah BAWIPA in, “Na umnak hmun ihsin sak le thlang, nisuah le nitlak, khuazakip hi ṭhatein zohhnik.

¹⁵Na hmuhmi ram hmuahhmuah hi nangmah le na tesinfa hnenah ka lo pe ding ih kumkhua in nan ram a si ding.

¹⁶Tesinfa tampi ka lo pe ding ih leilung parih leidip siar cawk lo an si bangin na tesinfa khal siar cawk lo an si ding.

¹⁷Cutiin hi ram hi a tung a vang in haal thluh aw; ziangahtile a zatein ka lo pe thluh ding a si,” ti ah a ti.

¹⁸Curuangah Abram cu a riahbuk a ṭhawn ih Hebron khua Mamre sasua kung kiangah hmun a khuar. Cutawkah BAWIPA hrangah biakṭheng a don.