Read Falam Chin SEEMTIRNAK 14 Bible Online

SEEMTIRNAK 14 - Falam Chin bible

SEEMTIRNAK 14

¹Cuih caanah siangpahrang pali: Babilonia siangpahrang Amrafel, Ellasar siangpahrang Ariok, Elam siangpahrang Khedorlaomer le Goiim siangpahrang Tidal pawl in,

²a dang siangpahrang panga: Sodom siangpahrang Bera, Gomorrah siangpahrang Birsha, Admah siangpahrang Shinab, Zeboiim siangpahrang Shemeber le Bela (a si lole Zoar) siangpahrang pawl tla an do.

³Atuih Rili Thi timi Siddim nelrawn ah khin cuih siangpahrang panga cu an kom-aw ih an ṭang tlang.

⁴Anmah cu kum hleihnih sung Khedorlaomer in a rak uk zo ih a kum hleithumnak ah amah do dingin ral a thotu an si.

⁵A kum hleilinak ah Khedorlaomer le a ṭanpi pawl cun an ralkap zate thawn an do ciamco ih Ashteroth Karnaim ah Refaim an neh, Ham ah Zuzim an neh, Kiriathaim hmunrawn ah Emim an neh ih,

⁶vunnel rawn kiangih ummi Elparan tiang, Seirih tlang parah Hor mi pawl tla an neh thluh a si.

⁷Cun dunglamah an kir ih Kadesh (Kadesh a si lole Enmishpat) an thlen tikah Amalek mi pawl ih ram hmuahhmuah an hun lak phah ih Hazazon Tamar ih ummi Amor mi khal an neh thluh a si.

⁸Cutikah Sodom, Gomorrah, Admah, Zeboiim le Bela khua ih siangpahrang pawl cun an ralkap neihmi hmuahhmuah an khawm ih,

⁹Elam siangpahrang Khedorlaomer, Goiim siangpahrang Tidal, Babilonia siangpahrang Amrafel le Ellasar siangpahrang Ariok pawl thawn Siddim nelrawn ah siangpahrang panga le siangpahrang pali an do-aw ciamco.

¹⁰Siddim nelrawn cu zinan suahnak khur in a khat ih, Sodom le Gomorrah siangpahrang pawl cu an raldonak in an tlan tikah acuih khur sungah an tla ciamco. A dang pathum pawl cu tlang parah an tlan hlo.

¹¹Siangpahrang pali pawl cun Sodom le Gomorrah khuasungih a ummi thil hmuahhmuah, an ei ding rawl tiangin an lak ih an tlan.

¹²Sodom khuasungih a ummi Lot khal a neihmi hmuahhmuah thawn an kai ih an hruai.

¹³Sikhalsehla raltlan pa pakhat cu Hebru mi Abram hnenah a ra ih Lot an kaihnak thu a ra sim. Abram cu Amor mi Mamre ih sasua kung kiangah a um. Mamre ih unau pawl cu Eshkol le Aner an si ih an pathum in Abram ṭantu an si.

¹⁴Abram cun a sungkhat pa an kaihnak thu a theih tikah a milai pawl a kokhawm ih pacang hlir zathum le hleiriat an pok ih ral pawl cu Dan tiang an dawi.

¹⁵Cutawk hmunah Abram milai pawl cu bu hnih ah an ṭhen-aw ih zanah an ral pawl cu an do ih an neh. An ral pawl cu Damaskas khua saklam ih a ummi Hobah tiang an hun dawi.

¹⁶A sungkhat pa Lot le Lot ih neihmi hmuahhmuah le nunau pawl le ral kaihmi dangdang thawn a long thluh ih a kirpi sal thluh.

¹⁷Abram cu Khedorlaomer le siangpahrang dang pawl a va nehnak ihsin a kir tikah Sodom siangpahrang cun Shaveh phairawn (Siangpahrang Phairawn ti khalih timi) in a rak hmuak.

¹⁸Cutikah Salem siangpahrang Melkhizedek khal in sang le sabitti a keng ih Abram cu a hmuak ve. Melkhizedek cu Cungnungbik Pathian ih puithiam khal a si ih Abram cu thluasuahnak hiti in a pek:

¹⁹“Cungnungbik Pathian, Lei le van tuahtu in, Abram cu thlawsuah hram seh.

²⁰Na ral pawl parih nehnak a lo petu, Cungnungbik Pathian cu thangṭhat in um seh,” ti ah a ti. Cule Abram in ralkut ihsin a lakmi hmuahhmuah sungih ṭhenhra ih ṭhenkhat Melkhizedek hnenah a pek.

²¹Cule Sodom siangpahrang in Abram hnenah, “Na lakmi thil hmuahhmuah cu nangmah in co aw; asinain minung pawl cu keimah i pe sal hram aw,” ti ah a dil.

²²Asinain Abram in, “Van le leilung Tuahtu Cungnungbik Pathian BAWIPA ih hmaiah baan phar in thu ka kam-aw:

²³Na ta a si mi hmuahhmuah pat-hlum le kedamhri ih thokin ziangthil hman ka la lo ding. Curuangah ‘Abram a liantertu cu keimah ka si,’ na ti thei dah lo ding.

²⁴Ka hrangah cun zianghman ka la lo pei. Ka milai pawl ih an ei an in ciami le, i ṭanpitu pawl ih covo lawnglawng ka saang ding; cule Ener, Eshkol le Mamre khal in an covo an la ve ding,” ti ah Sodom siangpahrang hnenah a ti.