Read Falam Chin SEEMTIRNAK 16 Bible Online

SEEMTIRNAK 16 - Falam Chin bible

SEEMTIRNAK 16

¹Cule Abram nupi Sarai cun fa pakhat hman a nei lo. Asinain Sarai in Izipt mi Hagar timi salnu a nei.

²Sarai in Abram hnenah, “Zohhnik, BAWIPA in fa i neihter duh lo hi! Ziangah so ka salnu thawn nan ittlang ko lo? Anih cun ka hrangah faate a nei thei men ding,” ti ah a ti. Cule Abram in Sarai ih thu cu a ngai.

³Curuangah Sarai in a salnu, Izipt nunau Hagar cu Abram ih nupi dingah a pek. Kanaan ramah Abram kum hra a um hnuah hi thil hi a cang.

⁴Abram le Hagar cu an pawl-aw ih Hagar cu fa a vun. Hagar in fa a vun ti a theih awk tikah a puarthau ih Sarai cu a hmuhsuam.

⁵Cutikah Sarai cun Abram hnenah, “Hagar in hiti ih i hmuhsuam hi nangmah ih mawh a si. Ka salnu cu keimah in ka lo pe. Asinain fa a vun ti a theih awk vete in i hmuhsuam ciamco. BAWIPA in nang maw kei so, zo a dik deuh ti thu in ṭhen hram seh,” ti ah a ti.

⁶Cule Abram cun, “Hagar cu na salnu a si; nangmah in na uk; na duhduh in tuah aw,” ti ah Sarai hnenah a ti. Cutikah Sarai in Hagar cu a tuahsiat ih Hagar cu a tlan.

⁷Cutiin Hagar cu Shur lamah a tlan ih ramṭhing lakih cerhti kiangah BAWIPA ih vancungmi in a tong.

⁸Vancungmi in a hnenah, “Sarai ih salnu Hagar, khui inso na rat ih khui ah so na feh zik?” ti ah a sut. Hagar in, “Ka bawinu Sarai hnen ihsin ka tlan,” ti ah a ti.

⁹Vancungmi in, “Sarai hnenah kirsal awla a kut hnuai ah va um aw;

¹⁰“Zohman ih siar cawk lo, Tesinfa tampi ka lo pe ding;

¹¹Fapa na nei ding ih, A hminah Ishmael[16] na sak ding; Ziangahtile BAWIPA in na zonzaihnak a thei.

¹²A sinan na fapa cu, Laak hee vek a si ding. Mikip a raal ding ih, Mikip in an raal ve ding. Sungkhat thawn hman an umtlang lo ding,” ti ah a ti.

¹³Cutikah Hagar in, “Pathian cu hitawk ah hin ka tong ngaingai ih ka nung lai maw si?” ti ah amah le amah a ti-aw. Cule a hnenah ra in a ṭongtu BAWIPA cu a hminah, “El-roi,” [17] ti ah a ko.

¹⁴Curuangah Kadesh le Bered karlakih tikhur cu mi hmuahhmuah in, “Beer-lahai-roi,”[18] ti ah an ko ṭheu.

¹⁵Cun Hagar in Abram fapa cu a hring ih a hminah amah Abram in Ishmael ti ah a sak.

¹⁶Abram cu Hagar in fapa a hrin tikah kum sawmriat le kum ruk a si.