Read Falam Chin SEEMTIRNAK 2 Bible Online

SEEMTIRNAK 2 - Falam Chin bible

SEEMTIRNAK 2

¹Cuticun leilung siseh van tla siseh, lei parih a ummi hmuahhmuah le van ih a ummi hmuahhmuah thawn Pathian in a tuah ṭheh.

²Ni ruk sungah Pathian in a hnaṭuan cu a ṭheh ih ni sarih ni ah a hnaṭuannak ihsin a cawl.

³A hnaṭuanmi a ṭheh ih a ni sarihnak ah a colh ruangah Pathian in cuih ni cu thluasuah a pek ih ni sunglawi ah a canter.

⁴Lei le van a tuahnak thuhla cu cubangtuk in a si.

⁵BAWIPA Pathian [2] in lei le van a tuah ṭheh tikah lei parah thing le hrampi a um lo; thlaici keuh ding khal a um hrih lo; ziangahtile Pathian in ruah a surter hrih lo. Leiram ṭuantu dingah milai khal an um hrih lo.

⁶Ruah a sur hrih lo nan leilung sungin ti a put ih leilung cu a hnawngter ṭheh.

⁷Cun BAWIPA Pathian in leidip a lak ih milai ah a tuah. A hnar sungah nunnak thaw a vun thawt ih minung ah a cang.

⁸Cun BAWIPA Pathian in nisuahnak lamih a ummi Eden ah hmuan a tuah ih acuih hmuanah cun a tuahmi minung cu a umter.

⁹Rah ṭha a rahmi le a mawi zetzetmi thingkung a phunphun acuih hmuanah cun a keuhter. Hmuan laifangah nunnak thingkung, a ṭha le a sia theihthiamnak thingkung khal a keuhter.

¹⁰Cun hmuan hnawngtertu dingah Eden ihsin tiva pakhat a luang ih hmuan leng a thlen tikah tiva pali ah a ṭhek aw.

¹¹Pakhatnak tiva ih hmin cu Pishon a si ih Havilah ram kimvelah a luang. Havilah ram ahcun sui a um.

¹²Havilah ram ih sui cu sui phun ṭha a si ih thingthling mankhung le Oniks lungvar sen tla an um.

¹³A pahnihnak tiva cu Gihon a si ih Kush ram kimvel ah a luang.

¹⁴A pathumnak tiva cu Tigris a si ih Assiria ram nisuahnak lamah a luang. A palitnak tiva cu Eufrates a si.

¹⁵Cun BAWIPA Pathian in a seemsuah mi pa cu loram ṭuantu le kilkhawitu dingin Eden hmuan ahcun a umter.

¹⁶Pathian in a hnenah, “Hmuan sungih a ummi thingrah hmuahhmuah na ei thei;

¹⁷asinain a ṭha le a sia theihthiamnak thingkung ih rah cu na ei hrimhrim lo pei. Na ei asile na ei ni in na thi ding,” ti ah a sim.

¹⁸Cun BAWIPA Pathian in, “Minung hi amah lawngih a um ding cu a rem lo; amah bawmtu ah rualpi ka tuahsak ding,” a ti.

¹⁹Cule Pathian in leilung a lak ih ramsa a phunphun le vate a phunphun ah a tuah ih ziangtin a ko pei ti ah cu pa hnenah cun a fehpi hai. Cule cu pa in hmin a rak sak ciar vekin an hmin ah a cangta.

²⁰Cuticun cu pa in hramlak ramsa siseh, innzuat sumhnam le van ih a zammi vate hmuahhmuah siseh hmin a sak hai a si. Sikhalsehla amah ih hrangah bawmtu le rualpi a um hrih lo.

²¹Curuangah BAWIPA Pathian in cu pa cu ihhmuh thawzetin a itthatter ih a ihthat sungah a hnakruh pakhat a lak ih a titsa in a phih sal.

²²Mi pa sung ihsin a lakmi hnakruh cun nunau a tuah ih mi pa hnenah a ratpi.

²³Cuih mi pa cun, “Atu lawngah maw keimah vek minung, Ka ruh in tuahmi ruh, Ka titsa in tuahmi titsa ka ton. Mi pa sungin lakmi a si ruangah, Mi nu tiin kawh siseh,” ti ah a ti.

²⁴Cuti a si ruangah mipa in a nu le a pa a taanta ih a nupi thawn an kom-aw. Cutiin tisa khatah an cang.

²⁵An pahnih in lawngfangkheh in an um naón ningzah an thiam lo.