Read Falam Chin SEEMTIRNAK 25 Bible Online

SEEMTIRNAK 25 - Falam Chin bible

SEEMTIRNAK 25

¹Abraham in nupi dang a ṭhi ih a hmin cu Keturah a si.

²Keturah thawn an hrinmi fapa pawl cu Zimran, Jokshan, Medan, Midian, Ishbak le Shuah an si.

³Cun Jokshan ih fapa pawl cu Sheba le Dedan an si ih Dedan ih hrinmi fapa pawl cu Asshurim, Letushim le Leummim an si.

⁴Midian ih fapa pawl cu Efah, Efer, Hanok, Abida le Eldaah an si. An zatein Keturah ih tefa pawl an si.

⁵Abraham in a neihmi hmuahhmuah cu Isaak a rohta.

⁶Asinain a thih hlanah a nupi dangih fapa pawl hnenah laksawng a zem ve hai ih Isaak thawn umtlang lo dingin hmundang nisuahnak ramah a fehter hai.

⁷Abraham cu kum za le sawmsarih le kum nga tiang a nung;

⁸Tarkuun khuuksuang in a nun hnuah a thi ih a miphunpi hnenah finkhawm in a um.

⁹Hit mi Zohar ih fapa Efron hnen ihsin ram a leimi, Mamre ih nisuahnak lam Makpelah lungpuk ah a fapa Isaak le Ishmael in an phum.

¹⁰Hit miphun hnen ihsin amah Abraham ih rak lei ciami ram a si. A nupi Sarah thawn an pahnih in cutawkah phum an si.

¹¹Abraham thih hnuah a fapa Isaak cu Pathian in a thluasuah ih, “Beer-lahai-roi” timi tikhur kiangah a um.

¹²Sarah ih salnu, Izipt mi Hagar thawn an hrinmi Abraham ih fapa Ishmael ih tesinfa pawl cu a hnuailam bangtuk an si.

¹³Ishmael ih fapa pawl hmin cu a sangsangin, upa bikah Nebaioth, cun Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Nafish le Kedemah an si.

¹⁶Himi pawl hi Ishmael ih fapa pawl an si ih an khua le an umnak ram hmin cu anmah ih hmin ciar suang ih sakmi an si. Anmah tla cu miphun hnam hleihnih ih cithlahtu an si.

¹⁷Ishmael cu kum za le sawmthum le kum sarih a nung. A thi ih a miphunpi hnenah finkhawm in a um.

¹⁸Ishmael ih tesinfa pawl cu Izipt ram in nisuahnak, Assiria ram fehnak lam, Havilah le Shur karlak ramah an um. Abraham tesinfa hnenih um loin a dangte in an um.

¹⁹Abraham fapa Isaak ih thuanthu cu hiti in a si.

²⁰Mesopotamia ram Aram mi Bethuel ih fanu, Laban ih farnu, Rebekah a ṭhit tikah Isaak cu kum sawmli a si.

²¹Rebekah in fa a neih lo ruangah Isaak in BAWIPA ih hnenah thla a camsak. BAWIPA in a thlacam cu a thei ih Rebekah cu fa a vun.

²²A pum sungah faphir an seem ih an eng-awk rero kha a theih tikah a don a har ih, “Hiti a si ahcun ziangso ka nun man a um?” ti ah a ti. Cule BAWIPA hnenah thla a cam ih,

²³BAWIPA in, “Na pum sungah miphun pahnih an um. A ral-aw phun hrimhrim in an suak ding; Pakhat cu a dang pa hnakin a cak deuh ding ih, A upa sawn in a naupa a rian ding,” ti ah a ti.

²⁴Rebekah cu a nithla a kim tikah faphir a hring.

²⁵A suak hmaisa pa cu misen a si ih a pumpuluk in hmul a nei. Curuangah Esau[32] ti ah a hmin an sak.

²⁶A nauta pa a rung suah tikah a upa Esau ih kedil kaihnget tahratin a suak. Curuangah a hminah Jakob[33] an sak. Fapa a neih tikah Isaak cu kum sawmruk a ti.

²⁷Cun an unau an ṭhang vivo ih Esau cu sakapzet a si ih hramlakih ramtawi duh zettu-ah a cang. Jakob cu midai a si ih inn lawnglawng ah a um.

²⁸A sakahmi a ei ṭheu ruangah Isaak in Esau cu a duh deuh; asinain a nu Rebekah cun Jakob a duh sawn.

²⁹Nikhat cu Jakob in pehang a suan laifangah a ramtawihnak in Esau cu a ra tlung.

³⁰A ril a rawn tuk ruangah a naupa Jakob hnenah, “Ka ril a rawng tuk lawmmam, na tihang sente kha kaa khatte talin i pe aw,” ti ah a dil. (Curuangah Edom[34] tiih an kawhnak a si.)

³¹Asinain Jakob in, “Na fatir covo i pe awla ka lo pe ding,” ti ah a ti.

³²Cutikah Esau in, “Ka lo pe ding; rilrawng in ka thi zik thlang ih ka covo cu ka hrangah ziangso ṭhathnemnak a neih?” ti ah a ti.

³³Cule Jakob in, “Ka covo ka lo pe tengteng ding, tiin thu i kam hmaisa aw,” ti ah a ti. Cutiin Esau cun thu a kam ih fatir a sinak covo cu Jakob hnenah a zuar.

³⁴Cule Jakob in sang le pehang a suanmi cu a pek. Esau in a in a ei hnuah a tho ih a feh. Fatir a sinak covo cu zianghman ah a siar lo.