Read Falam Chin SEEMTIRNAK 28 Bible Online

SEEMTIRNAK 28 - Falam Chin bible

SEEMTIRNAK 28

¹Cun Isaak in Jakob cu a ko ih a thluasuah hnuah, “Kanaan nunau cu na ṭhi lo pei.

²Na tim tuah awla Mesopotamia ram, na nuih pa Bethuel ih inn ah va feh aw. Cutawkih nunau, na pu Laban ih fanu pakhatkhat va ṭhi aw.

³Ziangkimtithei Pathian in nan ṭhit awknak cu lo thlawsuah hramsehla faate tampi nei in miphun tampiih pa ah lo canter hram seh.

⁴Pathian in Abraham a thlawsuah zo vekin nangmah le na tesinfa pawl cu lo thlawsuah hram seh; Pathian in Abraham hnenih a pekmi na umnak ram hi co hram aw,” ti ah a ti.

⁵Cule Isaak in Jakob cu Mesopotamia ram Aram mi Bethuel ih fapa Laban hnenah a thlah. Laban cu Jakob le Esau ih nu Rebekah ih ṭapa a si.

⁶Cule Isaak in Jakob cu a thluasuah ih nupi va ṭhi dingah Mesopotamia ramah a thlah ti kha Esau in a thei. Cuih tlunah a pa in Jakob a thluasuah tikah Kanaan mi nunau cu ṭhi lo dingin a kham ih,

⁷Jakob in a nu le a pa ih thu a ngai ruangah Mesopotamia ramah a feh a si ti khal a thei fawn.

⁸Cutikah a pa Isaak in Kanaan nunau cu a duh lo ti cu Esau in fiangtein a thei ngah.

⁹Curuangah Abraham ih fapa Ishmael hnenah Esau cu a feh ih, a neih ciami a nupi pawl ih tlunah, a dang pakhat Ishmael ih fanu, Nebaiothih farnu, Mahalath a ṭhit.

¹⁰Cun Jakob cu Beer-sheba in a suak ih Haran lamah a feh.

¹¹Hmun pakhat ah a thleng ih ni a tlak zo ruangah cutawkah a riak. Lungto pakhat lukhamah a hmang ih a it.

¹²Cule a mangah leilung in van a banmi kailawn saupi a hmu. Pathian ih vancungmi pawl tla cu cuih kailawn parah an ṭum an kai.

¹³Cun BAWIPA cu a kiangah a ding. Cutikah BAWIPA in, “Keimah cu Abraham le Isaak ih Pathian BAWIPA ka si. Na ihnak hmun le ram hi nangmah le na tesinfa pawl ka lo pe ding.

¹⁴Na tesinfa pawl cu leilung parih leivut zat an si ding. An ram cu nisuah nitlak, saklam le thlanglam ah an kauh vivo ding. Nangmah le na tesinfa pawl ka lo thlawsuah bangtuk in leilung tlunih miphun hmuahhmuah in thlawsuah in dil ding.[41]

¹⁵Na hnenah ka um ding; na fehnak kipah ka lo humhim ding ih hi ramah ka lo kirter sal ding. Ka lo tiammi hmuahhmuah hi ka kimter thluh hlan lo ka lo tanta hrimhrim lo ding, ti cu ciing ringring aw,” ti ah a ti.

¹⁶Cutikah Jakob cu a ṭhang ih, “BAWIPA cu hi hmun ah a um nan homaw thei loih ka rak um,” ti ah a ti.

¹⁷Cun Jakob cu a thin a phang ih, “Ziangtluk rapthlakza hmun so a si. Vancung kotka le BAWIPA ih inn ngaingai a rak sihi!” ti ah a ti.

¹⁸A thaizing zingpitte in Jakob cu a tho ih lukhamih a hmanmi lungto cu a lak hnuah hngilhlonak lungphunah a phun. Cule hriak a toih ih Pathian hnenah a ap.

¹⁹Jakob in a cuih hmun cu Bethel[42] ti ah hmin a sak. A hlanah cun a cuih khua cu Luz ti ah an ko.

²⁰Cuih hnuah Jakob in BAWIPA Pathian hnenah, “Ka hnenah na um ih ka fehnak lamzinah i humhim ih ei ding rawl le hruk ding hnipuan i pek ih tlunah,

²¹ka pa ih inn ah himdamte in ka thlen sal thei a si ahcun BAWIPA nangmah cu ka Pathian ngaingai na si ding.

²²Hi ka phunmi hngilhlonak lungphun hi Pathian nangmah ih inn a si ding ih i pekmi hmuahhmuah sung ihsin ṭhenhra-ih ṭhenkhat ka lo pe tengteng ding,” ti ah thukam-awhnak a tuah.