Read Falam Chin SEEMTIRNAK 31 Bible Online

SEEMTIRNAK 31 - Falam Chin bible

SEEMTIRNAK 31

¹Voikhat cu Laban fapa pawl in, “Kan pa ih ta a si mi hmuahhmuah Jakob in a lak ṭheh a si. Kan pa ih neihmi a lak ruangah hiti in a lian a si,” ti ah an ti kha Jakob in a thei.

²Cuih tlunah Laban cu a hlan bangtuk in a parah a mithmai a ṭha nawn lo ti kha Jakob in a hmu.

³Cutikah BAWIPA in Jakob hnenah, “Na sungkhat le na laicin ih ramah kir thlang aw. Na hnenah ka um ding,” ti ah a ti.

⁴Curuangah ṭilva pawl a khalhnak hmunah amah ra tong dingin Rachel le Leah cu a cah.

⁵An hnenah, “Nan pa ih mithmai cu ka parah a hlan bangtuk a si nawn lo tihi ka thei a si; asinain ka pa ih Pathian cu ka hnenah a um ringring ko.

⁶Ka thazaang neihmi hmuahhmuah thawn nan pa ih hna ka ṭuan cu nan pahnih in nan thei.

⁷Asinain nan pa in i bum ih ka hlawhman hi voi hra a ṭhin zo. Sikhalsehla ka parih siatsuahnak a thlenter ding cu Pathian in i siang lo a si.

⁸Nan pa Laban in, ‘A ṭialcipmi me pohpoh cu na hlawhman a si ding,’ i ti tikah me pohpoh in a ṭialcipmi faate an nei. Cule ‘A ṭialkaumi me pohpoh cu na hlawhman an si ding,’ i ti tikah me pohpoh in a ṭialkaumi faate an nei.

⁹Pathian cun nan pa hnen ihsin ṭilva pawl kha a lak ih keimah i pek a si.

¹⁰“Cun ṭilva an hur caanah mang ka nei ih ka mangah mepi a pawltu mecang pohpoh cu ṭialngaanmi le ṭialcipmi le ṭialkaumi hlir an si kha ka hmu.

¹¹Cule Pathian ih vancungmi in ka mangah cun, ‘Jakob,’ ti ah i ko ih, ‘Hinah ka um!’ ti ah ka ti.

¹²Cule vancungmi cun, ‘Zohhnik, mepi a pawltu mecang pohpoh cu ṭialngaan le ṭialcip le ṭialkau hlir an si. Hitiih cang dingin keimah ih tuahmi a si. Ziangahtile na parah Laban ih thil a tuahzia ka hmu thluh.

¹³Keimah cu hriak toih in hngilhlonak lung na phun ih thu na kamnak Bethel ah na hnenih a rak langmi Pathian ka si. Atu cu na tim tuah awla hi ram hi taan in na suahnak khua le ramah kir thlang aw,’ i ti,” ti ah a sim hai.

¹⁴Cutikah Rachel le Leah in, “Kan pa hnen ihsin kan co ding ro zianghman a um lo.

¹⁵Kannih tla cu ramdangmi tlukah in ruat ko lo maw? Kannih cu in zuar ih kan manih a ngahmi paisa hmuahhmuah cu a hmang thluh zo fawn.

¹⁶Pathian in kan pa hnen ihsin a lakmi lennak hmuahhmuah cu kanmah le kan faate pawl ih ta a si zo. Curuangah Pathian ih a lo sim bangtuk in tuah ko aw,” ti ah an ti.

¹⁷Curuangah Jakob cu Kanaan ramih a pa hnen feh dingah a tim a tuah thluh. A nupi le a faate pawl cu kalauk a toter.

¹⁸A ṭilva hmuahhmuah cu hmaiah a fehter ih Mesopotamia ram a um sungih a ngahmi thilri hmuahhmuah thawn a pok.

¹⁹Laban cu a tuu pawl ih hmul met dingah a feh ih a um lo sungah Rachel in a pa ih innsang biakmi milem pawl a rak ruk.

²⁰Aram mi Laban cu Jakob in a bum ih a fehnak ding thu cu sim lotein a um.

²¹A neihmi hmuahhmuah a keng ih a tlan. Cawl loin a feh ih Eufrates tiva a tan ih Gilead tlang lamah a feh.

²²Nithum hnuah Jakob a tlan a si ti ah Laban an sim.

²³Cutikah Laban in a hnenum pawl a ko ih Jakob cu ni sarih sung an dawi ih Gilead tlang ah an man.

²⁴Cuih zanah Laban ih mangah Pathian a lang ih a hnenah, “Ralring aw, Jakob cu ziangti hmanin hringhro cetci hlah,” ti ah a ti.

²⁵Laban in a hei man tikah Jakob cu tlang parah riahbuk a rak sak zo; Laban khal Gilead tlang ah riahbuk a sak ve.

²⁶Cutikah Laban in Jakob hnenah, “Zianghrangah i bum ih ka fanu pawl ral kaihmi nunau bangih na tlanpi?

²⁷Zianghrangah i bum ih keimah sim loin a thupte in na rak tlan ziar? I rak sim cila, na feh tikah khan lungawinak le hlasaknak thawn khuang le dar le ṭingṭang tum phahin ka lo thlah ding a sisi!

²⁸Ka fanu pawl le ka tule pawl hman i hnamterta lo. Na tuahmi hi aat-thlakza thil ṭha lo zet a si.

²⁹Nangmah siatsuah theinak cu ka nei ve ko; asinain mizanah na pa ih Pathian in, ‘Ralring aw, Jakob cu ziangti hmanin hringhro cetci hlah,’ ti ah i ti.

³⁰Na tlannak hi na pa ih inn zamrangih thlen na duhtuk ruangah a si ti ka thei ko. Sikhalsehla zianghrangah ka milem pawl tla na rak fir?” ti ah a ti.

³¹Cutikah Jakob in, “Na fanu pawl hi an duh na loin i long pang ding ti ka phan ruangah a si.

³²Sikhalsehla kan sungte lakih pakhatkhat parah na milem na hmu asile amah cu thah a si pei. Kan milai pawl hi thu theihpitu an si pei ih, hawl awla na ta a si mi pohpoh cu lak aw,” ti ah a ti. Rachel in a pa ih milem pawl a rak ru ti kha Jakob in a thei lo.

³³Cutikah Laban cu Jakob ih riahbuk sungah a lut ih a hawl; cuih hnuah Leah ih riahbuk sungah a feh; cuih hnuah an salnu pahnihte ih riahbuk sungah a lut lala. Asinain a milem pawl cu a hmu lo. A neta bikah Rachel ih riahbuk sungah a lut.

³⁴Rachel cun innsang milem pawl cu a rak lak ih kalauk phurhmi dip sungah a khum ih a rak toh-nen. Laban cun riahbuk pumpuluk in a hawl naón a hmu lo.

³⁵Cutikah Rachel in a pa ih hnenah, “Na rung luh ih ka din lo hi bawipa na thinheng hram hlah aw; nunau daan ka neih laifang a si,” ti ah a ti. Cuticun Laban in a hawl rero naón a innsang milem pawl cu a hmu thei lo.

³⁶Cutikah Jakob cu a ai a thok ih thinheng zetin Laban cu, “Ziang mawhnak so ka neih ih ziangvek daan ka tisiat ruangah so hiti ih i dawi ih i hawl ciamco?

³⁷Ka thilri zatein na zoh thluh zo; na ta a si mi ziangtal na hmu maw? Na hmuh asile na sungkhat le ka sungkhat hmaiah hin suah hnik; zo kan dik sawn ti kha relcat hai seh.

³⁸Na hnenah kum kul sung rori ka um ih cuhmuah ka um sungah na tuu le na me voikhat hman an fa a siat dah lo; na tuurual sung ihsin tuucang pakhatte hman ka ei hrih lo.

³⁹Sahrang in na tuu a deh tikah keimah sualnak a si lo ti langter duh in a sa na hnenah ka rak keng dah lo, a ai-ah keimahte in ka rak ruul mai ringring sawn. Sun ah siseh, zanah siseh, rukru pawl in an ru asile na kuan pei i ti.

⁴⁰Voi tamzet sunih niling ka tuar ih zanih khawsik khal ka tuar. Ka it thei dah lem lo.

⁴¹Kum kul khengte na hnenih ka um sung hmuahhmuah cutiin ka rak tuar cuahco a si. Na fanu pahnih hrangah kum hleili na hna ka ṭuan; na tuuruun pawl kum ruk sung ka khal. Cucing hmanin ka hlawhman voi sawmsahra na ṭhin.

⁴²Ka pa ih Pathian, Abraham ih Pathian le Isaak ih biakmi Pathian ka hnenah um hlah sehla ka kut lawngin i dawihlo zo ding. Asinain Pathian in ka hnaṭuanmi le ka zonzaihnak a hmuh ruangah mizanah a lo kawk a si kha!” ti ah a ti.

⁴³Cule Laban in, “Hi nunau pawl hi keimah ih fanu an si; na faale pawl khal hi keimah ih faale an si ih ṭilva rual khal hi keimah ih ta hlir an si. Na hmuh mi pohpoh hi ka ta an si thluh. Asinain tuih hnuah cun hi ka fanu pawl le an faale pawl hrangah zianghman ka tuah thei nawn lo.

⁴⁴Curuangah ra awla thukamnak kan tuah sawn pei ih hminsinnakah lungdawl kan tuah pei,” ti ah Jakob cu a ti.

⁴⁵Curuangah Jakob in lungpher pakhat a lak ih hngilhlonak lung a phun.

⁴⁶Cule a hnenum pawl cu lungto peng dingin a fial. Lungto cu an peng ih an lungpen kiangah cun rawl an ei.

⁴⁷Cuih lungpen cu Laban in Jegar Sahadutha[55] ti ah hmin a sak ih Jakob in Galeed [56] ti ah hmin a sak.

⁴⁸Laban in, “Hi lungpen cu nangmah le keimah karlakah thutheitu a si ding,” ti ah a ti. Cutiin cuih hmun cu Galeed ti ah an tita.

⁴⁹Cule Laban in, “Kan ṭhen-awk tikah BAWIPA in kan umnak fingfingah in kilkhawi hram seh,” ti ah a ti. Curuangah cuih hmun cu Mizpah [57] ti ah hmin an sak lala.

⁵⁰Laban cun Jakob hnenah, “Ka fanu pawl na tisiat hai ih, nupi dang tla na ṭhit le keimah ih ka theih lo hmanah Pathian in in hmu ringring ti thei aw.

⁵¹Hitawk ah kan pahnih karlakah hngilhlonak lungphun le lungpen tla an um ti na hmuh ko.

⁵²Hi lungpen le hngilhlonak lungphun cu kan thutheitu an si ding. Nangmah do dingah hi lungpen hi ka lan lo pei ih, nang khal in keimah do dingah hi lungpen, a si lole hi lungphun hi na lan lo pei.

⁵³Abraham ih Pathian le Nahor ih Pathian cu kan karlakih thureltu a si ding,” ti ah a ti. Cutikah Jakob cun a pa Isaak ih biakmi Pathian hmin in siatcam in thu a kam.

⁵⁴Cule Jakob in ṭilva pakhat a that ih tlangpar ah thawinak a pek. A sungkhat pawl a ko ṭheh ih zanriah an ei tlang hnuah tlangpar ahcun an riak.

⁵⁵A thaizing zingpitah Laban cu a tho ih a fasuan pawl le a fanu pawl a hnamta ih thlaza a camta hnuah a khua lamah a kir.