Read Falam Chin SEEMTIRNAK 32 Bible Online

SEEMTIRNAK 32 - Falam Chin bible

SEEMTIRNAK 32

¹Jakob cu a pok sal ih lamzinah Pathian ih vancungmi pawl in an rak tong.

²Jakob in a hmuh tikah, “Pathian ih ralkap pawl an si,” ti ah a ti. Curuangah cuih hmun cu Mahanaim[58] ti ah hmin a sak.

³Cule Jakob cun Edom ram Seir an timi hmunih a um mi a u-pa Esau tong dingin mi a hei thlah.

⁴A thlahmi pawl hnenah, “Ka bawipa Esau hnenah ṭihzahnak thawn na siahhlawh keimah Jakob in thu ka lo cah a si. Laban hnenah kum reipi ka um ih atu lawngah ka ra kir.

⁵Caw le laak pawl, tuu le me pawl le salnu le salpa ka nei a si. Ka u nangmah mithmai ṭha co thei dingah hiti in thu ka lo cahnak a si,” ti ah va sim dingin a tirh.

⁶A thlahmi an ra kir tikah Jakob hnenah, “Na u Esau hnenah kan va feh ih amah cu nangmah tong dingin a ra pok zo. Minung zali thawn an ra,” ti ah an sim.

⁷Cumi a theih tikah Jakob cun a ṭih ih a thin a phang thlohthlo. Curuangah a hnenih ummi a milai pawl le tuu le me pawl, caw le kalauk pawl cu bur hnih ah a ṭhen.

⁸Ziangah cutiin a ṭhen tile, “Esau in bur khat pawl a thah khalle a dang bur khat tal cu an luat na hman maw!” tiih a ruah ruangah a si.

⁹Cutikah Jakob cu thla a cam ih, “Maw Pathian, ka pu Abraham le ka pa Isaak ih Pathian, i ngai hram aw. BAWIPA, nangmah in, ‘Na khua le na sungkhat hnenah kir sal awla na hrangah na lamzin ka tluangter ding,’ i ti.

¹⁰Kei na salpa hnenih na thlentermi na zaangfahnak le rinsantlak na sinak hi a cotu si dingah malte hman ka tlak lo. Zianghman nei loin kianghrol pakhat lawng thawn Jordan tiva ka rak tan; atu-ah cun minung le ṭilva bur hnih thawn ka ra kir sal zo.

¹¹Curuangah ka u Esau ih kutsung ihsin, maw BAWIPA, i run hram aw. Ka u Esau a ra ding ih nunau le nauhak hman zuah loin in that thluh pang ding ti ka phang tuk a si.

¹²‘Na lamzin ka tluangter ding ih tesinfa tampi ka lo pe ding; na tesinfa pawl cu tifinriat kapih vunnel zat in an tam ding ih siarcawk lo an si ding,’ ti ah thu i kammi kha vun mangsal hram aw,” ti ah a ti.

¹³Cutawkih zan khat a riak hnuah, a u Esau laksawng pe dingin a neihmi sung ihsin a tanglam pawl a hril.

¹⁴Mepi zahnih le mecang kul, tuupi zahnih le tuucang kul,

¹⁵hnawisawr mi kalauk sawmthum le an faate ciar, cawpi sawmli le cawcang pahra, laakpi kul le laakcang pahra tla an si.

¹⁶Ṭilva phun khat cu hnenum pakhat ciar a kilter ih an hnenah, “Ka hmaiah feh uhla bur khat le bur khat cu hlat aw nawn in feh uh,” ti ah a ti.

¹⁷Hmaisa bikih a fehtupa hnenah, “Ka u Esau in a lo tong ih, ‘Na bawipa zo a si? Khuiah na feh ding? Na hmaiih ṭilva pawl neitu zo a si?’ tiih a lo sut tikah,

¹⁸‘Hi ṭilva pawl cu na siahhlawh Jakob ih ta an si ih a bawipa nangmah Esau hrangah laksawng a lo pekmi an si. Amah Jakob cu kan dungte-ah a ra lai,’ na rak ti pei,” ti ah a ti.

¹⁹Hmaisa bik pa hnenih a ti bangtuk in pahnihnak, pathumnak le an zate hnen khalah bangrep in thu a pek. “Esau nan ton tikah,

²⁰‘Asi, na salpa Jakob cu kan dungte-ah a ra lai,’ ti ah nan rak ti pei,” ti ah a ti. Jakob cun ka hmaiih ka fehtermi laksawng in a thinlung cu ka nemter deuh ding ih ka ton ngaingai tikah i ngaithiam thei men ding, ti ah a ruat.

²¹A laksawng pawl hmaiah a fehter ih amah cu cuihzan cu a riahbuk ah a riak.

²²A cuih zan zankhuathim ah Jakob cu a tho ih a nupi pahnih le a nusun pahnih le a faate hleikhat thawn Jabbok tiva an tan.

²³A innsangmi pawl tiva ralih a hruai thluh hnuah a neihmi dang hmuahhmuah khal tiva ralah a hei ṭhawn thluh.

²⁴Amah lawng a rung taang. Cuih zanah mi pakhat in Jakob cu zing khuavang zik tiang a rung buan ciamco.

²⁵Jakob a neh thei lo ti kha a buantu pa in a theih tikah, Jakob ih khel kha a sawh in a sawh ih, an buan-awk rero laiah cun Jakob ih khel hlikhlok a pelh.

²⁶Cutikah mi pa in, “I thlah aw, khua a van zik thlang hi!” ti ah a ti. Sikhalsehla Jakob cun, “I thlawsuah lo ahcun ka lo thlah lo ding,” ti ah a ti.

²⁷Cule mi pa in, “Na hmin zoso a si?” ti ah a sut ih Jakob in, “Jakob ka si,” a ti.

²⁸Cule mi pa in, “Atu thok ihsin na hmin cu Jakob a si nawn lo pei. Milai thawn siseh, Pathian thawn siseh nan tawng aw ih na neh ruangah na hmin cu Israel[59] ti a si pei,” ti ah a ti.

²⁹Cutikah Jakob in, “Na hmin i sim hram aw,” ti ah a dil. Anih in, “Ziangah so ka hmin i suh?” ti ah a ti ih cuih hnuah Jakob cu thluasuah a pek.

³⁰Jakob cun, “Pathian cu hmaiton tein ka tong zo; asinain ka nung lai a si,” ti ah a ti ih acuih hmun cu Peniel[60] ti ah hmin a sak.

³¹Peniel ihsin a pawh zawng ah ni a hung suak cerco. Jakob cu a ke a bai; ziangahtile a khelruh a pelh ruangah a si.

³²Curuangah tuih san tiangin Israel ih tesinfa pawl cun sakhel hlikhlok parih satit ei loin an run iikta; ziangahtile Jakob ih khel sawhpelhnak a rak ton ruangah a si.