Read Falam Chin SEEMTIRNAK 35 Bible Online

SEEMTIRNAK 35 - Falam Chin bible

SEEMTIRNAK 35

¹Pathian in Jakob hnenah, “Na tim tuah in Bethel ah feh awla va um aw. Na u Esau hnen ihsin na tlan laiih na hnenih a langmi Pathian hrangah biakṭheng don aw,” ti ah a ti.

²Cutikah Jakob in a sungkhat le a hnenih a ummi hmuahhmuah hnenah, “Ram dang khawzing lem nan neihmi hmuahhmuah cu hlon ṭheh thlang uh; thianghlimter-aw uhla hnipuan thiang hruk uh.

³Hi hmun hin kan suak pei ih Bethel ah kan feh pei. Cutawkah ka thlaphan laiih ka thla i rak ngamtertu le ka vahvaihnak kipih i umpitu Pathian hrangah biakṭheng ka don ding a si,” ti ah a ti.

⁴Curuangah ram dang khawzing lem an neihmi le an khaih laimi hnakhai pawl an lak ih Jakob hnenah an pek. Jakob in Shekhem khuakiangih a ummi sasua kung hnuai ah cu pawl cu a phumta.

⁵Jakob le a fapa pawl cutawk ihsin an suah tikah a kiangkapih khuasungmi pawl cun an khua siksem suakin an ṭih hai ruangah Jakob le a fapa pawl cu zohman in an dungin an dawi ngam lo.

⁶An feh vivo ih an milai pawl thawn Kanaan ram Luz khua (Bethel timi khua) an thleng.

⁷Cutawkah biakṭheng a don ih a u hnen ihsin a tlan laiih Pathian a hnenih a langnak a si ruangah cu hmun cu Pathian hrangah tiin El-Bethel[62] ti ah hmin a sak.

⁸Cun Rebekah umtu Deborah a thi ih Bethel ihsin thlanglam ih a ummi sasua kung hnuai ah an phum. Curuangah acuih thingkung cu, “Allon Bacuth”[63] ti ah an ti.

⁹Jakob cu Mesopotamia ram ihsin a kir tikah Pathian cu a hnenah a lang sal ih thluasuah vanluh a pek.

¹⁰A hnenah, “Na hmin cu Jakob a si, sikhalsehla atu thokin Israel na si thlang ding,” ti ah a ti. Curuangah amah cu Israel ti ah kawh a si.

¹¹Cule Pathian in a hnenah, “Keimah cu Ziangkimtithei Pathian ka si. Faate tampi nei in ci tampi na thlah ding ih a hrekkhat cu siangpahrang tla an si ding. Na tesinfa pawl cu an tamzet ding ih miphun tampi-ah an cang ding.

¹²Abraham le Isaak hnenih ka pekmi ram cu nangmah hnenah ka lo pe ding; cule na hnu ih na tesinfa pawl hnen khalah ka pe ding,” ti ah a ti.

¹³Cutiih an biak awknak hmunah cun Jakob cu Pathian in a taanta.

¹⁴Cutawkah Jakob in hngilhlonak lungphun a phun ih in thawinak hrangah sabitti a burh hnuah hriak a toih.

¹⁵Cutawk hmun cu Bethel ti ah hmin a sak.

¹⁶Bethel ihsin an ṭhawn ih Efrath[64] khua an thlen hlan deuhte-ah Rachel cu a nithla a kim ih a nauneih pumnat cu a besia zet.

¹⁷Culaifang ah nau dongtu in, “Phang hlah aw, mipa a si,” ti ah a ti.

¹⁸Asinain Rachel cu a thi; a thihzik a hnuk a cah zawng ah a fapa cu Ben-oni[65] ti ah hmin a sakta. Asinain a pa in Benjamin [66] ti ah a ko.

¹⁹Rachel cu a thi ih atuih Bethlehem timi Efrath lamzinah an phum.

²⁰Cule Jakob in a thlaan ah hngilhlonak lung a phun ih, “Rachel lungphun,” ti a si ih cumi cu atu tiangin a um lai.

²¹Cun Jakob cu a feh vivo ih Eder lungdawlih ralah riahbuk a sak.

²²Jakob cutawkih a um laiah, a pa ih nupisun Bilhah cu Reuben in a sualpi. Cumi cu a pa Jakob in a theih tikah a thin a heng ngaingai.[67] Jakob cu fapa hleihnih a nei.

²³A nupi Leah thawn an hrinmi fapa cu upa bikah Reuben, cun Simeon, Levi, Judah, Issakhar le Zebulun an si.

²⁴Rachel thawn an hrinmi fapa cu Josef le Benjamin an si.

²⁵Rachel ih salnu Bilhah thawn an hrinmi fapa cu Dan le Naftali an si.

²⁶Cun Leah ih salnu Zilpah thawn an hrinmi fapa cu Gad le Asher an si. Hi fapa pawl cu Jakob in Mesopotamia ih a hrinmi an si.

²⁷Abraham le Isaak an umnak Mamre khua ah a pa Isaak hnenah Jakob cu a thleng. (Mamre cu Kiriath Arba a si lole Hebron ti tla in an ko.)

²⁸Isaak cu tarkuun in a nung ih kum za le sawmriat a ti ah a thi.

²⁹Cule a fapa Esau le Jakob in an phum.