Read Falam Chin SEEMTIRNAK 36 Bible Online

SEEMTIRNAK 36 - Falam Chin bible

SEEMTIRNAK 36

¹Esau ih tesinfa pawl cu a hnuailam bangtuk in an si. (Esau cu Edom ti tla-in an ko.)

²Esau cu Kanaan nunau pawl nupi ah a nei. Hit mi Elon ih fanu Adah, Hiv mi Zibeon ih fapa Anah ih fanu Oholibamah, le

³Ishmael ih fanu Nebaioth ih farnu Basemath tla an si.

⁴Esau ih nupi Adah in Elifas a hring; Basemath in Reuel a hring ih,

⁵Oholibamah in Jeush, Jalam le Korah a nei. Hi pawl cu Esau in Kanaan ramih a neihmi fapa pawl an si.

⁶Cun Esau in a nupi pawl, a fanu le a fapa pawl, a sungkhat pawl le a cawrual le Kanaan ram a um sungih a neihmi hmuahhmuah a lak ih a nau Jakob thawn an umtlangnak ihsin a ṭhawn ih hmun dangah a feh.

⁷Ziangah a ceer tile Jakob thawn an umnak loram in a daih hai lo ruangah a si. Ṭilva tamtuk an nei ih curuangah hmun khatah an umtlang thei nawn lo.

⁸Esau cu a feh ih tlangpar ram Seir ah a um. Esau cu Edom ti a si.

⁹Cun Edom miphun ih pa Esau cu tlangpar ram Seir ahcun a um ih tesinfa tampi a nei.

¹⁰Esau ih fapa pawl cu Adah ih hrinmi Elifas le Basemath ih hrinmi Reuel tla an si.

¹¹Elifas ih fapa panga pawl cu Teman, Omar, Zefo, Gatam, le Kenas an si.

¹²Esau fapa Elifas ih nusun pakhat cu Timna a si ih amah in Amalek a hring. Hi pawl cu Esau nupi Adah ih faate pawl an si.

¹³Reuel ih fapa pali pawl cu Nahath, Zerah, Shammah le Mizzah tla an si. Hi pawl cu Esau nupi Basemath ih faate pawl an si.

¹⁴Cule Zibeon ih fapa Anah fanu Esau ih nupi Oholibamah in fapa pathum a neihmi tla cu Jeush, Jalam le Korah an si.

¹⁵Esau ih tesinfa sung ihsin cithlahtu pawl cu hihi an si. Esau ih fapa upa bik Elifas ih fapa pawl cu Teman, Omar, Zefo, Kenas,

¹⁶Korah, Gatam le Amalek an si. Edom ramih Elifas sungsuak ih cithlahtu pawl cu hihi an si. Anmah tla cu Adah ih tesinfa pawl an si.

¹⁷Esau ih fapa Reuel ih hrinmi fapa, cithlahtu pawl cu Nahath, Zerah, Shammah, le Mizzah tla an si. Edom ramih Reuel sungsuak ih cithlahtu pawl cu anmah hi an si. Anmah tla cu Esau nupi Basemath ih tesinfa pawl an si.

¹⁸Cun Esau nupi Oholibamah ih fapa, cithlahtu pawl cu Jeush, Jalam le Korah tla an si. Anmah cu Anah ih fanu Esau ih nupi Oholibamah ih hrinmi an si.

¹⁹Hi pawl cu Esau ih tesinfa, Edom ih phunhnam tla an si.

²⁰Hihi Hor miphun Seir ih fapa pawl, a ramih rak um ciami an si. Lotan, Shobal, Zibeon, Anah,

²¹Dishon, Ezer le Dishan tla an si. Annih cu Edom ramih ummi Seir fapa an si ih Hor miphun ih cithlahtu pawl an si.

²²Lotan ih fapa cu Hori le Heman an si. Timna cu Lotan ih farnu a si.

²³Shobal ih fapa pawl cu Alvan, Manahath, Ebal, Shefo le Onam an si.

²⁴Zibeon ih fapa pahnih tla cu Aiah le Anah an si. Hi Anah cu a pa Zibeon ih laak pawl a khalh laiah ramcaar lakih cirhti hlum a hmu suaktu kha a si.

²⁵Anah ih faale pawl cu Dishon le a fanu Oholibamah an si.

²⁶Dishon ih fapa pawl cu Hemdan, Eshban, Ithran le Kheran an si.

²⁷Ezer ih fapa pawl cu Bilhan, Zaavan le Akan an si.

²⁸Dishan ih fapa cu Uz le Aran an si.

²⁹Cun Hor miphun ih cithlahtu pawl cu Lotan, Shobal, Zibeon, Anah,

³⁰Dishon, Ezer le Dishan tla an si. Anmah cu Seir ramah Hor miphun pawl ih cithlahtu an si.

³¹Israel siangpahrang pawl in an uk hlanih Edom ram a uktu siangpahrang pawl cu hihi an si.

³²Beor fapa Bela in Edom ram a uk ih a khawpi hmin cu Dinhabah a si.

³³Bela cu a thi ih a ai ah Bozrah khuami Zerah ih fapa Jobab in Edom ram cu a run uk.

³⁴Jobab a thi ih a ai ah Teman miphun pawl ih ram sungih ummi Husham in a uk.

³⁵Husham cu a thi ih a ai ah, Moab ramih Median mi a nehtu Bedad ih fapa Hadad in a uk. A khawpi hmin cu Avith a si.

³⁶Hadad cu a thi ih a ai ah Masrekah khua ih Samlah in a uk.

³⁷Samlah cu a thi ih a ai ah Eufrates tiva kap Rehoboth khuami Shaul in a uk.

³⁸Shaul cu a thi ih a ai ah Akbor ih fapa Baal Hanan in a uk.

³⁹Cun Akbor ih fapa Baal Hanan cu a thi ih a ai ah Hadad in a uk. A khawpi hmin cu Pau a si. A nupi hmin cu Mehetabel a si ih Matred ih fanu a si. Matred cu Mezahab ih fanu a si.

⁴⁰Hi pawl cu an hnam le an umnak khua ciarih lal an si ih Esau ih tesinfa pawl an si: Timna, Alvah, Jetheth,

⁴¹Oholibamah, Elah, Pinon,

⁴²Kenaz, Teman, Mibzar,

⁴³Magdiel le Iram an si. Anmah tla cu an umnak ciarah ram neitu le lal an si ih Edom ram sungah hotu an si. Edom miphun ih pa cu Esau a si.