Read Falam Chin SEEMTIRNAK 37 Bible Online

SEEMTIRNAK 37 - Falam Chin bible

SEEMTIRNAK 37

¹Jakob cu a pa umnak Kanaan ramah a umta.

²Jakob ih innsang thuanthu cu hi vekin a si. Josef cu tlangval no kum hleisarih a si ih a pa ih nusun Bilhah le Zilpah ih fapa pawl, a ule pawl hnenah tuu le me a khal ve ṭheu. A ule pawl ih thiltuah sualmi pawl cu a pa a sim ṭheu.

³Josef cu a pa Jakob in a tar hnu ih a neihmi a si ruangah a fapa dang hnakin a duh cuang. Curuangah angki saupi baanfual[68] a ṭhit sak.

⁴Cutiih an pa in Josef a duh deuh cu a ule pawl in an hmuh tikah Josef cu an hua ih awkaa ṭha-in an biak hrimhrim dah lo.

⁵Voikhat ah Josef cu mang a man ih a mang cu a ule hnenah a sim. A mang a sim tikah a ule cun an hua sinsin.

⁶An hnenah, “Ka mang cu ngaihnik uh.

⁷Ka mangah lo ah kan zatein kan feh ih sangvut kan teel ciamco; cutikah ka sangvut teel cu a tho ih dingzetin a ding. Cule nan sangvut teel pawl cu ka sangvut teel ih kimvelah an ding ih an kuun,” ti ah a ti.

⁸Cutikah a u le pawl cun, “Kan tlunah siangpahrang si dingin le thunei dingah na ruat-aw maw si?” ti ah an sut. Cun a mang a sim ruangah a ule pawl cun an huat a luar sinsin.

⁹Cuih hnuah Josef cun mang a man lala ih a u le hnenah, “Mang ka man ih ka mangah ni le thlapi le arsi hleikhat cu ka hmaiah an kuun ka hmu,” ti ah a sim.

¹⁰A mang cu a pa le a ule hnenah a sim ih a pa in, “Ziangvek mang ngelcel so na man? Na nu le na unau pawl le keimah tiangin na hmaiah ra in kan kuun ding maw si?” ti ah a kawk ciamco.

¹¹A u le pawl cun an nahsiik ngaingai. Asinain a pa cun acuih thuhla pawl cu a thinlungte-ah a ret ringring.

¹²Cun Josef ule pawl cu an pa ih ṭilva khal dingah Shekhem ah an feh.

¹³Cule a pa Jakob in Josef hnenah, “Na ule pawl cu Shekhem ah ka ṭilva an khal. Na tim tuah awla an hnenah ka lo thlah ding,” ti ah a ti. Josef cun, “Ka tim aw thluh zo,” ti ah a ti.

¹⁴A pa in a hnenah, “Va feh awla na ule pawl le ṭilva pawl an himdam maw va zoh aw. Ra kir sal awla an thuhla i ra sim sal aw,” ti ah a ti. Cuhrangah a pa in Josef cu Hebron phairawn ihsin a hei tirh. Cutiin Josef cu Shekhem a thlen tikah,

¹⁵mipa pakhat in hramlakih a vah rero kha a hmu. “Ziang so na hawl rero?” ti ah Josef cu a sut.

¹⁶Cutikah Josef in, “Ka ule pawl ka hawl a si; ṭilva khuitawkah so an khalh, i sim hram aw,” ti ah a ti.

¹⁷Cupa cun, “Hi tawkah an um nawn lo. Dothan ah kan feh ding an ti cu ka theita,” ti ah a ti. Curuangah Josef cu Dothan ah a feh ih a ule pawl hnenah a va thleng.

¹⁸A ule pawl in an hnen a ra thlen hlan a hlatpi in an rak hmu. Cuvete in thusia an ruatkhawm ih amah that dingin thu an phiar.

¹⁹“Mang man pa a ra.

²⁰Rahnik uh, kan that pei ih a ruak cu hi tikhur caar pakhatkhatah kan hlon pei. Sahrang in a deh a si kan ti leh ding. Cule a mang pawl ziangtin a cang kan zohhnik pei,” ti ah pakhat le pakhat an ti aw.

²¹Cutiin an ti cu Reuben in a thei ih Josef cu hum a tum. Reuben in, “A thah lawmmam cu that hlah uhsi.

²²Josef cu that hram hlah uh. Hi ramṭhing lakih tikhur caar sungah hin thla uh. Asinain amah cu tuahmawh hlah uh,” ti ah a ti. Himtein a humsuak a si ahcun a pa hnenih kuat kir leh dingin Reuben ih tummi a si.

²³Josef cu a ule hnen a thlen ngaingai tikah a angkifual baansau cu an hlit.

²⁴An kaihrem ih tikhur caar sungah an thlak.

²⁵Rawl an ei laiah khualtlawng mi ruunkhat Ishmael mi pawl Gilead ihsin Izipt ram pan ih an feh kha rin lopi-ah an hmu. An kalauk pawl cun pazuksi, thingthling le masala pawl an phur.

²⁶Cutikah Judah in a unau pawl hnenah, “Kan naupa kan thah ih laithat kan sinak cu kan thup khalle kan hrangah ziangso a ṭhahnem?

²⁷Hi Ishmael mi pawl hnenah kan zuar sawn pei. Cutiih kan zuar asile amah kan tuahmawh a ṭul lem lo; thu ngai ih kan ti asile kan nau a si ih kan thii le kan sa a si,” ti ah a ti. Cutiih a timi cu a unau dang pawl khal an lung a kim.

²⁸Cun Midian[69] mi sumtuah pawl an ra thlen tikah tikhur sung ihsin Josef cu an suah ih Ishmael mi hnenah ngun tangka kul ah an zuar. Cuticun Ishmael mi in Josef cu Izipt ramah an hruai.

²⁹Cun Reuben in tikhur sung cu a zoh ih Josef a hmuh lo tikah a ning a hang ih a riahsiatnak langter dingah a hnipuan a thlek thluh.

³⁰Cule a unau hnenah a kir ih, “Kan naupa tikhur sungah a um nawn lo. Ziangtin so kan ti ding?” ti ah a ti.

³¹Cun a unau pawl cun me an that ih Josef ih korfualpi cu me thisen sungah an hnim.

³²Cule korfualpi cu an pa ih hnenah an keng ih, “Hihi kan hmu, na fapa ta a si maw, zohhnik?” ti ah an ti.

³³Cutikah an pa in Josef ih korfualpi a si kha a thei lohli ih, “A si, amah ih ta a si! Sahrang in maw a deh zo! Josef cu thlekbauh thluh zo a si cu!” ti ah a ti.

³⁴Jakob cu a hnipuan a thlek ih a riahsiatnak langter dingah buri a hruk ih reipi mithi ngai in a um cuahco.

³⁵A fapa le a fanu pawl an ra ih an ra hneem rero; asinain an hneem thei cuang lo. “Amah hnen mithi khua ih ka thlen ve lai hlan lo, ka fapa ngai in ka um ding,” ti ah a ti. Curuangah a fapa Josef ngai in nitin a ṭap.

³⁶Cule Josef cu Midian mi pawl in Izipt ramah an fehpi ih Izipt siangpahrang ih inn kiltu ralbawipa Potifar hnenah an zuar.