Read Falam Chin SEEMTIRNAK 38 Bible Online

SEEMTIRNAK 38 - Falam Chin bible

SEEMTIRNAK 38

¹Cuih caanah Judah cun a unau pawl a taanta ih Adullam khuami Hirah hnenah a vung um.

²Cutawkah Kanaan mipa Shua ih fanu a hmu ih a nupi ah a ṭhit.

³A nupi cu fa a vun ih fapa a hring ih a hminah Er a sak.

⁴A nupi cu fa a vun sal ih fapa a hring lala ih a hminah Onan a sak.

⁵A nupi in fapa a hring lala ih a hminah Shelah a sak. A nupi ih Shelah a hrin laiah Judah cu Khezib khua ah a um.

⁶Cun Judah in a fapa upa bik Er cu nupi a holh ih a nupi hmin cu Tamar a si.

⁷Asinain Er cu BAWIPA hmaiah misiava a si ruangah BAWIPA in a nunnak a cemter.

⁸Cutikah Judah in Onan hnenah, “Na u-ih nupi cu ihpi awla na u in tesinfa a neih theinak dingah a pasal ih unau na si bangtuk in na ṭuanvo cu kimter aw,” ti ah a ti.

⁹Asinain faate a neih khalle amah ih tefa an si lo ding ti kha Onan in a thei. Curuangah a u-ih nupi thawn an pawl-awk tinin a u-ih hrangah faate seem thei lo dingin a ci cu leilungah a tlakter.

¹⁰A nuncan cu BAWIPA ih lungkimmi a si lo hrangah BAWIPA in a nunnak a cemter ve.

¹¹Cule Judah in a fapa ih nupi Tamar hnenah, “Ka fapa Shelah a ṭhan ih tlangval a si hlan cu na pa ih inn ah va kir hrih awla nuhmei in va um hrih aw,” ti ah a ti. Hitiih a tinak cu a ule pahnih an thih vekin Shelah khal a thi ve pang ding ti a phan ruangah a si. Curuangah Tamar cu a pa ih inn ah a kir.

¹²Caan a hung rei deuh tikah Shua ih fanu, Judah ih nupi cu a thi. A mithi ngai a reh tikah a tuurual pawl ih hmul an mehnak Timnah khua ah a rualpi Adullam khuami Hirah thawn an feh.

¹³Cule Tamar hnenah, “Na pasal ih pa cu a tuu pawl hmulmet dingah Timnah ah a feh a si,” ti ah mi in an sim.

¹⁴Cuhrangah a hruk ringringmi nuhmei hnipuan cu a phoih ih hmaihuhnak puanpaate in a hmai a hup ih, Timnah lamzinih a ummi Enaim khuasung luhnak ah a to. Shelah cu a tlangval zo naón amah cu Shelah hrangah ṭhit an tum lo ti kha Tamar in a thei.

¹⁵Judah in Tamar cu a hmu ih a hmai a huh awk ruangah hlawhhlang a si ti ah a ruat.

¹⁶A hnenah lamzin kapah a va feh ih, “Ra awla kan ittlang ding,” ti ah a ti. A fapa ih nupi a si kha a thei lo. Cutikah Tamar in, “Ziang so i pek ding?” ti ah a sut.

¹⁷Judah in, “Ka ṭilva sung ihsin me note pakhat ka lo kuat ding,” ti ah a ti. Tamar in, “Na run kuat hlan tiang thutiamkamnak i pekta a si ahcun na sim vekin si ko seh,” ti ah a ti.

¹⁸Judah in, “Ziang so thutiamkamnak ah ka lo pek ding?” ti ah a suh tikah, Tamar in, “Na hminkhennak le a hridai le atuih na kenmi na kianghrol i pe aw,” ti ah a ti. A ti vekin a pek. Cun an pawl-aw ih Tamar cu fa a vun.

¹⁹Tamar cu a tho ih inn ah a feh. A hmaihuhnak puan cu a phoih ih a nuhmei hnipuan a hruk sal.

²⁰Cuih hnuah Judah cun a thutiamkamnak thil va tlen sal dingah Adullam khuami a rualpipa cu me note pakhat thawn Tamar hnenah a hei tirh; asinain Tamar cu a va hmu nawn lo.

²¹A kiangkapih mi pawl cu, “Enaim lamzin kiangih a ummi hlawhhlangnu kha khuiah so a si?” ti ah a suh tikah annih in, “Cutawkah hlawhhlangnu a um dah lo,” an ti.

²²Cuhrangah Judah hnenah a kir ih, “Nunau nu ka tong lo; a kiangkap mi pawl in, ‘Cutawkah hlawhhlangnu a um dah lo,’ an ti,” ti ah a sim.

²³Cutikah Judah in, “A hnenih ka thilri pawl cu lak sal tum nawn hlah; mual kan pho pang ding. Na va tong thei lo naón me note ka kuat ngaingai cu a tawk zo,” ti ah a ti.

²⁴Thla thum hnuah Judah cu, “Na fapa ih nupi Tamar cu hlawhhlang a ṭuan ih midang thawn fasawn a vun zo,” ti ah mi in an sim. Cutikah Judah in, “Khawsung ihsin suah uhla mei in ur that uh,” ti ah thu a pek.

²⁵Tamar cu an suah ih an hruai laiah a pasal ih pa Judah hnenah thu a cah ih, “Hi thilri a neitupa ih fa ka vun a si; hi thilri hi zo ih ta so a si, zohhnik uh; hminkhennak le a hridai le kianghrol an si hi,” ti ah a ti.

²⁶Cumi cu Judah in a theih tikah, “Hi nu hi midik a si ih keimah sawn misual ka si. Ka fapa Shelah hrangah ṭhi zo ding ka rak si naón,” ti ah a ti. Cuih hnu cun Tamar cu a ihpi nawn lo.

²⁷Cun a nithla a kim tikah faphir a ken kha an thei.

²⁸A pum a na ih culaiah a fa pakhat in a kut pakhat a run suah. Cutikah nau dongtu in a ngel ah pat hrisen a rak khih ih, “Hihi suak hmasa a si,” ti ah a ti.

²⁹Asinain a kut cu a dirhsal ih a dang pakhat sawn hmaisa-ah a suak. Cutikah nau dongtu in, “Nangmah riangri maw a rung suak hmaisa,” ti ah a ti. Cuhrangah a hmin ah Perez[70] an sak.

³⁰Cuih hnuah a unau a suak ih a kutih patsen khihmi a si. A hmin ah Zerah[71]an sak.