Read Falam Chin SEEMTIRNAK 40 Bible Online

SEEMTIRNAK 40 - Falam Chin bible

SEEMTIRNAK 40

¹Caan a hung rei deuh tikah Izipt siangpahrang ih sabitti petu le sangtuah hotu in an bawipa cu a thin an hengter.

²Faro cu a hnaṭuantu pahnih parah a thin a heng ngaingai ih,

³Josef an retnak hmun, siangpahrang inn kiltu bawipa ih innah thawngah a thlak hai.

⁴Siangpahrang inn kiltu bawi in Josef cu cuih thawngtla pahnihte hnenah a ret ih an hna a ṭuanter. Cutiin thawng sungah caan reipi an umtlang.

⁵Zan khatah thawnginn ah Izipt siangpahrang ih sabitti petu le sangtuah hotu an pahnih in sullam neimi mang an man veve.

⁶Zingpit ah Josef cu an hnenah a va feh ih an thinlung nuamlozet ih an um ngiongio kha a hmu.

⁷Josef in, “Zianghrangah tuih sun hi nan riah a siazet cuang?” ti ah a suh tikah,

⁸annih in, “Mang kan man veve ih kan mang in leh saktu hitawk ah zohman an um lo,” ti ah an ti. Cutikah Josef in, “Mang leh theinak cu Pathian ih pekmi a si. Nan mang cu i sim hnik uh,” ti ah a ti.

⁹Cutikah sabitti petu in a mang cu a sim ih, “Ka mangah sabit hri pakhat ka hmaiah ka hmu ih,

¹⁰hnge pathum a nei. Sabit hnge pawl cu an cerh ih an cerhvete in a par an par ih a rah pawl tla an hmin.

¹¹Faro ih hai ka keng ih sabit rah pawl cu ka lo ih hai sungah ka sawr. Cule Faro hnenah ka pek,” ti ah a ti.

¹²Cutikah Josef in, “Atican cu hiti in a si: A hnge pathum cu ni thum a si.

¹³Nithum sungah Faro in a lo thlah ding; a lo ngaithiam ding ih na hnaṭuanmi na ṭuan sal ding. Sabitti petu na rak si bangin sabit hai cu Faro hnenah na pe sal ding.

¹⁴Cutiih na lamzin a tluan ṭheh tikah hi thawnginn ihsin i suah theinak dingah i hngilh hlah awla ka thuhla cu Faro hnenah rak sim hram aw.

¹⁵Thungai in kan ti asile, Hebru mi pawl ih ram ihsin rukmi ka si. Hitawk khalah thawng in thlak theinak dingah zianghman tuah sualmi ka nei lo,” ti ah a ti.

¹⁶Josef ih mang a lehmi cu thuṭha lam a si kha sangtuah hotupa in a hmuh tikah, “Kei khal mang ka nei ve; ka mangah ka lu parah sang kho thum an um ih,

¹⁷a tlunta bikih kho sungah Faro hrangih sang rawh mi a phunphun an um. Asinain cuih rawl pawl cu vate in an ei ciamco,” ti ah a ti.

¹⁸Cutikah Josef in, “Atican cu hiti in a si: Kho pathum cu ni thum a si.

¹⁹Nithum ah Faro in a lo suah ding ih na lu a lo tan ding. Na ruak cu thingkung parah a thlai ding ih vate in na sa cu an ei ciamco ding,” ti ah a ti.

²⁰Cuvek ngaingai in ni thumnak ni, Faro suah camah, Faro in a kuthnuai-ih bawi pawl hmuahhmuah hrangah puai a tuah ih sabitti petupa le a sangtuah hotupa cu thawnginn ihsin a suah ih a bawi pawl hmaiah an rak hruai.

²¹Sabitti petupa cu a hlanih a ṭuanmi hna a ṭuanter sal.

²²Asinain sangtuah hotupa cu a hngawng in a thlai ih a thi. Josef ih lehsakmi vek cekci in an mangih tican cu a kim ṭheh.

²³Asinain sabitti petupa in Josef cu thei nawn loin a hngilhta.