Read Falam Chin SEEMTIRNAK 42 Bible Online

SEEMTIRNAK 42 - Falam Chin bible

SEEMTIRNAK 42

¹Jakob in Izipt ramah rawl a um ti a theih tikah a fapa pawl hnenah, “Ziangah so hiti ih nan um men?

²Izipt ramah rawl a um ti ka thei. Rawl loih kan thih thluh lonak dingah vung feh uhla rawl vung lei uh,” ti ah a ti.

³Cubangin Josef ih unau pawl pahra cu Izipt ramah rawl lei dingah an feh.

⁴Asinain Jakob cun Josef thawn nukhat hrin a si mi Benjamin cu a fehter lo. Ziangahtile tuahmawh a tong pang ding ti a phang.

⁵Kanaan ram sungih paam a tlun ve ruangah mi dang vekin Jakob fapa pawl cu rawl lei dingah an feh.

⁶Josef cu Izipt ram uktu bawi a si hrangah ramkip ihsin a rami mikip hnenah rawl a zuar. Cuhrangah Josef ih ule pawl khal Josef hmaiah an ra ih upatnak in an hmai leilung dai in an kun.

⁷Josef in a hmuh tikah a ule an si kha a thei naón a thei lo vekin a umter-aw. Ṭonghrang zetin an hnenah, “Khuilaminso nan rat?” ti ah a sut. Annih in, “Rawl lei dingah Kanaan ram in kan ra,” ti ah an sawn.

⁸Josef cun a ule an si ti a thei naón annih cun an thei lo.

⁹A mangih anmah ih thuhla a rak man tla a vun cing ih, “Nannih cu mi thlingthlatu nan si. Kan ramih ṭonṭaihnak zawn theih duh ah nan ra a si,” ti ah a ti hai.

¹⁰Asinain annih cun, “Bawipa, kan si hrimhrim lo. Kannih na sal le pawl hi rawl lei ding lawngih ra kan si.

¹¹Kan zatein unau rual kan si. Bawipa, mi dik kan si ko; mi thlingthlatu kan si hrimhrim lo,” ti ah an ti.

¹²Asinain Josef cun, “Asilo, kan ram derdainak thlingthlak duh ah nan ra a si ko,” a ti thotho.

¹³Cule annih in, “Bawipa, kan zate cun unau hleihnih kan si ih Kanaan ramih um mi pakhat ih fapa kan si. Kan nau nauta bik cu atu-ah kan pa hnenah inn ah a um ih kan unau pakhat cu a thi zo,” ti ah an ti.

¹⁴Cutikah Josef in, “Ka ti zo vekin nannih cu mi thlingthlatu nan si ko.

¹⁵Nan si le si lo fianternak ah hiti in ka lo hniksak ding: Faro hmin in ka lo kam; nan nau nauta bik hitawk a rat lo ahcun nan tlung thei lo ding.

¹⁶Nanmah lak ihsin pakhatkhat in va hruai uh. Nan thu a fiang hlan lo a dang pawl cu thawngah ka lo thla ding. Cuti a si lole Faro hmin saal in ka sim: nannih cu thlingthlatu nan si tengteng,” ti ah a ti hai.

¹⁷Cuticun an unauza in ni thum sung thawngah a thlak hai.

¹⁸A ni thumnak ni ah Josef in, “Pathian hmai ka zah ruangah hiti ih nan tuah asile thihnak in nan luat ding.

¹⁹Mi dik nan si ngaingai ahcun atu nan umnak thawnginn ah pakhat cu nan taangta pei ih midang cu rilrawng in a ummi nan innsang hnenah nan leimi nan rawl thawn nan va tlung pei.

²⁰Sikhalsehla nan simmi a dik le dik lo theihnak ah nan nau nauta bik ka hnenah nan rak hruai tengteng pei. Cuti nan tuah asile nan thi lo ding,” ti ah a ti. Cumi cu an unauza an lung a kimtlang.

²¹Anmah le anmah cu, “Kan naupa Josef, kha tiih kan rak ti kha kan mawh ngaingai a si. Harsatnak a tuar lai kan hmu ko ih i zaangfah hram uh ti ah in leem rero naón kan zaangfah duh lo. Cu ruangah a si atu hiti ih harsatnak kanmah kan tuar,” ti ah an ti-aw.

²²Reuben in a unau pawl hnenah, “Kan naupa-ih tlunah zianghman thil ṭha lo tuah hlah uh, ka lo ti tho lo maw? Ka thu nan ngai duh lo. Atu-ah a thih man phulaknak kan tuar thlang a si,” ti ah a ti.

²³Cutiih an ṭong cu Josef in a thei ṭheh; asinain annih cun in thei ṭheh ti an thei lo. Ziangahtile Josef thawn an biak-awk tikah ṭonglettu an hmang.

²⁴Cutikah Josef cu hmun dangah a va feh ih a va ṭap. A ṭah a baan tikah an hnenah a ra sal ih anmah ih lakin Simeon cu a vun dir ih an mithmuh rori-ah a ṭeemter.

²⁵Josef in, “An dip khatión rawl than uh, an paisa cu an dip sung ciarah ret sal uhla lamzin hrang lamcaw ken uh,” ti ah thu a pek ih a thupek vekin a ule pawl parah an tuah.

²⁶A ule pawl cun an leimi rawl cu an laak parah an suang ih an tlung.

²⁷Cuih zan an riahnak ah an unau pakhat in a laak rawl pek dingin a dip cu vun ong khua a paisa cu a dip sung tlunta bikah a hmu.

²⁸“Ka paisa in khirh sal a si, ka dip sungah a um,” ti ah a au ih a unau pawl cu a sim. An lung a phang thluh ih thir rero in, “Pathian in kan parah ziang thil tak so a tuah hi?” ti ah pakhat le pakhat an sut-aw.

²⁹Kanaan ramih an pa Jakob hnen an thlen tikah an tonmi le an tuarmi hmuahhmuah cu an pa ih hnenah an sim.

³⁰“Izipt ram uktupa cu kan parah a ṭong a hrangzet ih thlingthlatu nan si, in ti ih sual in puh;

³¹thlingthlatu kan si lo, midik zumtlakmi kan si.

³²Pa pakhat ih fa unau hleihnih kan si ih kan nau pakhat cu a thi zo; nauta bik cu Kanaan ramah kan pa ih hnenah innah a um, ti ah kan sim.

³³Asinain acuih bawipa cun, zumtlakmi nan si le si lo ka theihnak ah ka hnenah pakhat cu nan taangta ding; a dang pawl cu rilrawng ih a ummi nan innsang hrangah rawl hei phurh uh.

³⁴Cule nan nau nauta bik nan rak hruai pei. Cuih hnu lawngah thlingthlatu si loin zumtlakmi nan si ti kha ka theih ngah hnuah nan unau pa ka thlah sal ding ih kan ram ah nan duhduh in thil nan zuar nan lei thei ding, ti ah in ti,” ti ah an pa an sim.

³⁵Cun an phurhmi rawl cu an suah tikah an dip sung ciarah an paisa cu an hmu ih an pafarual in an lung a phang ngaingai.

³⁶Cutikah an pa Jakob in, “Faate pakhat loin maw in taan ding. Josef cu a thi zo; Simeon le a hlo zo fawn. Atu Benjamin a lak nan tum lala. Kei hi a tuartu bik ka si hi!” ti ah a ti.

³⁷Cumi a theih tikah Reuben in, “Benjamin na hnenih ka kirpi sal lo asile ka fapa pahnih hi that hai aw. Benjamin cu ka kut sungah re ko awla ka rak kirpi tengteng ding,” ti ah a pa ih hnenah a ti.

³⁸Asinain a pa in, “Ka fapa cu ka thlah thei lo ding. A ule a thi zo ih atu amah lawng a taang. Lamzin ah tonlo a va tong pang ding. Cuvek riahsiatnak tuar thei ding ka si nawn lo; ka tar tuk zo ih ka thi ngaingai ding,” ti ah a ti.