Read Falam Chin SEEMTIRNAK 43 Bible Online

SEEMTIRNAK 43 - Falam Chin bible

SEEMTIRNAK 43

¹Kanaan ram ah paam cu a luar sinsin ih,

²Jakob ih sungte pawl cu Izipt ram ihsin an leimi rawl an ei ṭheh tikah Jakob in a fapa pawl hnenah, “Vung feh sal uhla kan hrangah rawl vung lei sal uh,” ti ah a ti.

³Cutikah Judah in, “Nan naupa nan ratpi lo ahcun ka hmel hman in hmu thei lo ding, ti ah Izipt ramih bawipa in fiangtein ralrinnak in pe zo.

⁴Kan naupa kan hnenih na fehter a si ahcun kan feh ding ih na hrangah rawl kan lei ding.

⁵Na fehter siang lo a si ahcun kan feh lo ding. Ziangahtile cupa cun nan naupa nan rak hruai lo a si ahcun in tong thei lo ding, ti ah in ti zo,” ti ah a ti.

⁶Cutikah an pa Israel in, “Ziangtin so ka zawn maltetal ruat loin nau pakhat kan nei hrih ti tiangtiang cupa ih hnenah nan va sim?” ti ah a ti.

⁷Cule a fapa pawl in, “Nan pa a nunglai maw? Unau dang nan nei maw? ti ah kanmah le kan innsang thuhla lawnglawng cupa cun in sut ih, let loin kan um thei fawn lo. Nan naupa nan rak hruai pei ti ah in ti ding ti cu kan rak ruat hrimhrim lo,” ti ah an ti.

⁸Cun Judah in a pa ih hnenah, “Kan naupa cu keimah hnenah fehter aw. Kan tim kan tuah pei ih kan feh ding. Cutiih kan tuah lawngah nangmah siseh kan faate pawl le kanmah siseh kan zatein rilrawng thihnak in kan luat thei ding a si.

⁹Kan naupa hrangah ka nunnak in ka kam a si; mawhphurh ding a um khalle keimah in ka phur ko pei. Na hnenah damte le himte ih ka kirpi lo a si ahcun ka nunsung hmuahhmuah na hmaiah mawhthluk ka tuar pei.

¹⁰Hitiin rei hlah uhsila Izipt ram ah feh in voihnih hman kan let man zo ding naón,” ti ah a ti.

¹¹Cutikah an pa in, “Cuti ding thotho a si ahcun hiti in tuah uh: Kan ramsung ihsin a suakmi lakih a ṭha bik pawl thingthling, khuaitizu, rimhmui, khumkhal le mekei rah maltete ciar keng uhla cupa cu laksawng vung pe uh.

¹²Nan dip sungih paisa nan hmuh salmi pawl tla cu nan khirh a ṭul ding hrangah paisa khal a let hnih in nan keng pei. Paisa an lo khirh cu an tisual a si ding.

¹³Nan tim tuah in nan naupa cu hruai uhla cupa ih hnenah cun fehpi uh.

¹⁴Nan unau pakhat pa le Benjamin cu nan hnenih an rakir sal theinak dingah Ziangkimtithei Pathian in cupa cu nan parah zaangfahnak thinlung neiter hram seh. Kei cu ka faate pawl hloral thluh ding hi ka tuar ding hrimhrim a si ahcun ka tuar a si ko pei cu,” ti ah a ti.

¹⁵Cuhrangah laksawng pawl an keng ih paisa khal a let hnih in an pai. An tim an tuah ih Izipt ram ahcun an feh. Benjamin khal an hruai ih Josef cu an va tong.

¹⁶An hnenih Benjamin a tel cu Josef in a hmuh tikah a hnenum pa hnenah, “Hi pawl hi ka inn sungah hruai hai aw; ṭilva pakhat that awla suang aw; ziangahtile tuih sunah keimah thawn rawl kan eitlang ding,” ti ah a ti.

¹⁷Josef ih a sim vekin a hnenum pa in a tuah ih a inn sungah a fehpi hai.

¹⁸Josef inn an thlen tikah an thin a phang ngaingai. Ziangahtile, “Hmaisa rawl kan lei ṭumih kan paisa pawl kan dip sungih a um hrangah hitawk ah in thlenpi. Kan sual hawl in rin lopi in sal ah in kai men ding. Kan laak pawl tla in long thluh ding a si hi,” ti ah an ruat.

¹⁹Curuangah Josef hnenum pa hnenah sangka kiangah an va feh ih,

²⁰“Bawipa, rawl lei dingah hi tawk voikhat kan ra thleng zo.

²¹Kan tlung ih lamzin kan riahnak ah kan dip sung kan zoh tikah rawl leinak man paisa kan pekmi kimtein kan dip sung tlunta bikah kan hmu fingfing. Cuih paisa cu atu-ah kan rak keng.

²²Cule rawl lei saalnak ah paisa dang tla kan keng a si. Kan dip sungah zo in maw paisa a rak ret ti cu kan thei lo,” ti ah an ti.

²³Cutikah Josef hnenum pa cun, “ṭih hlah uh, nan thin khal phang hlah uh. Nan Pathian le nan pa ih Pathian in paisa cu nan dip sungah a ret a si ding. Rawl man paisa kimtein ka ngah ko,” ti ah a ti. Cuih hnuah an hnenah Simeon a rak hruai.

²⁴Cule hnenum pa in an unau rual in Josef inn sungah a fehpi hai ih an ke kholhnakah tidai a pek ih an laak khal rawl a pek.

²⁵Sun ah Josef a ra ding ih anmah thawn rawl a ra ei ding ti an theih tikah an kenmi laksawng pawl an suah ih Josef pek dingah tiar ciain an ret.

²⁶Josef a ra thleng ngaingai ih laksawng an kenmi pawl cu a inn sungah cun an pek ih a hmaiah leilung dai in an kun.

²⁷Cule Josef in an thuhla cu kimteih a sut ṭheh hnuah, “Kan dung nan rat laiah a tarzet nan timi nan pa ih thuhla in sim. Atu ziangtin a um? A harh dam lai maw?” ti ah a sut hai.

²⁸Cutikah annih in, “Kan pa, na siahhlawh, cu a dam lai a si,” ti ah an ti hnuah an khuk an bil ih a hmaiah an kun.

²⁹Cule Josef in a nau Benjamin a hmuh tikah, “A thuhla in sim reromi nan nauta bik pa cu amah hi maw a si?” a ti ih, “Pathian in thlawsuah lo pe seh, ka fapa!” ti ah a ti.

³⁰Cuti a ti hnuah Josef cu hmakhatte-ah a khaan sungah a lut, ziangahtile a nau a hmuh sal tikah a lung a hno. A suup-awk thei lo ruangah a khaan sungah cun a feh ih a ṭap ciamco.

³¹A hmai a phiah-awk hnu ah a ra suak ih a lunghnomi suup-aw phah in, “Rawl tuah uh,” ti ah a hnenum pawl thu a pek.

³²Josef cu cabuai pakhat ah rawl an tuah sak; a unau pawl a dang cabuai ah rawl an pek ih Josef hnen rawl ei ding ih a rami Izipt bawi upa pawl cu cabuai dangte-ah rawl an ei. Ziangah Izipt mi pawl a dangte-ah an ei tile Hebru mi pawl thawn rawl eitlang cu ningzakza a si, tiin an ruat.

³³A unau pawl cu Josef hmai hoi in an toter hai ih an kum vekin upabik in nautabik tiang a sangsangin an to. Cuti an to cu an hmuh tikah mangbangin pakhat le pakhat an zoh aw.

³⁴Josef cabuai ih a ummi rawl pawl an lak ih a unau pawl cu an bet, asinain Benjamin cu a unau pakhat ih comi let nga tam in rawl an pek. Cuticun an ei an in ih nuamzetin caan an hmang.