Read Falam Chin SEEMTIRNAK 44 Bible Online

SEEMTIRNAK 44 - Falam Chin bible

SEEMTIRNAK 44

¹Josef in a inn kiltu hnenum pa ih hnenah, “Hi pawl ih dip sungah an phurh thei zat in rawl than awla, an dip sungih tlunta bik ciarah an paisa ret aw.

²Cule ka ngun khuathai hi an nauta bikih dip sung tlunta bikah a paisa thawn ret aw,” ti ah a fial. A ti bangtuk in a hnenum pa cun a tuah thluh.

³A thaizing zingpitte in an laak pawl thawn an tlunter hai.

⁴Khua ihsin malte an feh hnuah Josef in a inn kiltu hnenum pa hnenah, “Zamrang in kha milai pawl kha va dawi aw. Na man hai tikah, ‘A ṭhami cu ziangah so a sia in nan rulh,’

⁵‘Ziangah so ka bawipa ih ngun khuathai nan ruk? Ka bawipa ih sabitti innak a si ih, tinzohnak ih a hmanmi khal a si. Thil ṭha lo ngaingai nan tuah a si,’ ti ah na ti pei,” a ti.

⁶A hnenum pa cun a dawi ih a man tikah Josef ih sim vekin a va ti.

⁷Cutikah annih in, “Bawipa hiti ih na ṭong rero hi na ti duhmi ziangso a si? Cuvek lawmmam tuah cu kan ruah dah lomi a si.

⁸Kan dip sungih kan hmuhmi paisa cu Kanaan ram ihsin kan run keng ih na hnenah kan lo khirh sal ti na thei ko. Cuih hnuah cun ziangah so na bawipa inn ihsin sui le ngun cu kan ruk ding?

⁹Cuhrangah bawipa, kanmah lakah pakhatkhat in kan ruk a si ahcun cupa cu thah siseh; cule a dang pawl cu na salah in kai ko aw,” ti ah an ti.

¹⁰Anih in, “Asi, nan timi cu ka lung a kim; asinain nanmah lakih pakhatkhat hnenah ngun khuathai ka hmuh a si ahcun cupa lawng cu ka sal ah a cang pei ih midang cu nan tlung thei ko ding,” ti ah a ti.

¹¹Curuangah zamrangin an dip pawl cu an ṭhum ih an dip ciar cu an ong.

¹²Josef ih hnenum pa cun upabik pa ih dip ihsin nautabik pa ih dip tiang feltein a hawl tikah Benjamin ih dip sungah ngun khuathai cu a hmu.

¹³Cutikah an riahsia in an hnipuan an thlek ih an laak pawl parah an thilri cu an suang sal ih khuasung ah an kir sal.

¹⁴Judah le a unau pawl Josef innih an thlen sal tikah Josef cu inn ah a rak um lai. A hmaiah an bok ih,

¹⁵Josef in, “Nan thil tuahmi hi ziangso a si? Keimah vekih thuneimi bawi cun tinzohnak hmang in in kai thotho ding ti nan thei lo maw?” ti ah a ti.

¹⁶Cutikah Judah in, “Bawipa, na hnenah ṭong ding zianghman kan nei lo. Ziangtin so kan lo el thei ding? Ziangtin so thiam kan co awkter thei ding? Pathian in kan mawhnak cu a langter thluh zo. Curuangah bawipa, a dip sungih ngun khuathai an hmuhmi pa lawng si loin kan zatein na sal kan cang ko pei,” ti ah a ti.

¹⁷Cutikah Josef in, “Si hlah ee, cuticun ka ti lo ding. A dip sungih ka ngun khuathai an hmuhmi pa lawng ka salah a cang ding. Mi dang pawl cu nan pa ih hnenah harhdam tein va tlung uh,” ti ah a ti.

¹⁸Cule Judah cun Josef cu a hei naih ih, “Bawipa, zaangfahte in thusimnak caan i pe hrih hram aw. Ka parah na thin heng hram hlah aw, bawipa, nang cu amah Izipt ram siangpahrang vek thotho na si.

¹⁹Bawipa nangmah in, ‘Pa nan nei maw? Unau dang teh nan nei maw? tiih in suh tikah,

²⁰‘Pa kan nei ih a tarzet zo; nau kan nei ih tlolsam a si lai hrih. Kan pa a tarzet hnu ih a suakmi a si. Kan naupa ih u-pa a thi zo ih amah thawn nukhat sungsuak ahcun amah lawng a nung lai a si; curuangah kan pa in amah cu a duh cuang,’ ti ah kan lo sim.

²¹Cutikah bawipa nangmah in, ‘Nan naupa cu rak hruai uh, a hmuh ka duh a si,’ ti ah in ti laiah khan,

²²‘Kan pa a taan thei lo ding; a taan ahcun kan pa cu a thi men ding,’ ti ah kan lo ti.

²³Cutikah nangmah in, ‘Nan hnenih nan naupa a rat ve lo ahcun ka hmel hman in hmu thei lo ding,’ ti ah in ti.

²⁴“Na salpa a si mi kan pa hnenih kan kir tikah, na ti vekin kan sim.

²⁵Cutikah anih in, ‘Vung fehsal uhla kan hrangah rawl vung lei sal uh,’ in ti.

²⁶Kannih in, ‘Kan feh lo ding; ziangahtile kan nau nautabik a tel lo ahcun kan lo simmi pa kan vung tong thei lo ding. Kan nau nautabik a tel lawngah kan feh ding,’ kan ti tikah,

²⁷kan pa cun, ‘Ka nupi Rachel in fapa pahnih i hrin ih,

²⁸pakhat cu a um nawn lo. Sahrang in a thlekbauh thluh a si pei ti ka zum; ziangahtile tuih sun tiangin ka hmu nawn lo.

²⁹Cuih tlunah hi a taangmi ka fapa nan lak lala ih ziangmaw tiih a thih pang asile riahsia thinhar in ka thi ngaingai ding a si,’ ti ah in ti.

³⁰“Curuangah bawipa, ka pa hnenah keimah lawng ka kir ih ka nau a hmuh lo asile kan pa cu a thi rori ding a si. Kan pa ih nunnak le hi pa ih nunnak cu a zom-aw a si.

³¹Curuangah bawipa, kan pa hi a tar zawng ah thihpi tlak riahsiatnak a parah kan thlenter ngaingai ding.

³²Cuih tlunah bawipa, hi ka nauhakpa ih hrangah ka pa hnenah ka nunnak ka kamta a si. ‘Na hnenih hi nauhakpa ka rak kirpi lo asile na hmaiah ka nunsung hmuahhmuah mawh ka phur ding,’ ka ti zomi a si.

³³Curuangah bawipa, hi nauhakpa cu a ule pawl thawn tlungter hram awla, keimah sawn hi na salah ka rung taang pei.

³⁴Nauhakpa tel locun ziangtinso ka pa ih hnenah ka tlun ngam ding? Ka pa ih tuar dingmi riahsiatnak cu ziangtinso ka hmuh ngam ding?” ti ah a ti.