Read Falam Chin SEEMTIRNAK 47 Bible Online

SEEMTIRNAK 47 - Falam Chin bible

SEEMTIRNAK 47

¹Josef cu Faro hnenah a feh ih, “Ka pa le ka unau pawl Kanaan ihsin an tuu le an cawrual le an neihmi hmuahhmuah tla thawn an ra thleng zo. Atu-ah Goshen ram ah an um,” ti ah a va sim.

²Cule amah hnenih a fehpimi a unau panga cu Faro hnenah a hmuh.

³Cutikah Faro in, “Nan hnaṭuan ziangso a si?” ti ah a sut ih annih in, “Bawipa, kan pu le kan pa vekin kannih khal tuukhal kan si.

⁴Hi ram ah hin bawipa, kan ra zo. Ziangahtile Kanaan ramah paam a besia tuk ih kan ṭilva pawl hrangah hrampi hman a um lo. Curuangah bawipa, zaangfahte in Goshen ram ah in umter hram aw,” ti ah an ti.

⁵Cutikah Faro in Josef hnenah, “Atu cu na pa le na unau pawl an ra thleng zo ih,

⁶Izipt ram cu an ta a si ko. Goshen ram ahcun um ko hai seh; kan ram sungih a ṭha bik hmun pakhat a si. Cun anmah lakih rinsantlak an um asile keimah ih ṭilva khaaltu pawl hotu ah ret aw,” ti ah a ti.

⁷Cun Josef in a pa Jakob cu a fehpi ih Faro a tonter. Jakob in Faro cu thluasuah a pek.

⁸Cule Faro in, “Kum ziangzatso na si?” ti ah a sut.

⁹Jakob in, “Leilung ah vakvai in kum za le sawmthum ka nung zo. Ka pu le ka pa pawl an vahvaihnak kum cu ka zat lo. Ka kum hi a mal naón ka nunsung san hi a har ngaingai a si,” ti ah a ti.

¹⁰Jakob in Faro cu thluasuah a pekta ih a feh.

¹¹Josef in a pa le a unau pawl cu Faro ih thupek bangtuk in Izipt ram sungih ram a ṭhatnak bik Rameses khawpi kiangah a umter.

¹²A pa le a unau pawl le, a pa ih sungkhat pawl hmuahhmuah cu nauta bik tiangin Josef in an ei ding rawl a pek ṭheh.

¹³Paam cu a luar deuhdeuh ih leilung tlun khui hmanah rawl a um lo. Izipt le Kanaan ramih minung pawl cu rilrawng in an cau ṭheh.

¹⁴Cutikah Izipt le Kanaan ram sung minung pawl in rawl leinak ih an hmanmi tangka hmuahhmuah cu Josef in a khawm ṭheh ih Faro inn ah a ret.

¹⁵Ramsungmi pawl ih neihmi paisa a cem thluh tikah Izipt mi pawl cu Josef hnenah an ra ih, “Rawl in pe aw. Kan paisa le a cem ṭheh zo. Ziangtal in ruahsak lo ahcun kan thi thluh ding,” ti ah an ti.

¹⁶Cutikah Josef in, “Nan paisa a cem ṭheh zo a si ahcun nan ṭilva rak keng uhla rawl in ka lo thleng hai ding,” ti ah a ti.

¹⁷Curuangah Josef hnenah an ṭilva pawl rang, tuu, me, caw le laak pawl cu an rak keng ih Josef in rawl in a rak thleng. Cuih kum cu an ṭilva hmuahhmuahih manah rawl a pek hai.

¹⁸A hmai kum cu Josef hnenah an ra sal ih, “Bawipa, nang cu kan lo pheh lo pei; kan paisa a cem ṭheh zo ih kan ṭilva hmuahhmuah khal na ta an si ṭheh zo. Bawipa, kan leiram le kan taksa ruangpi siar lo zianghman lo pek ding kan nei nawn lo.

¹⁹In thiter siang hram hlah awla, ziangtal in ruahsak aw. Kanmah kan minung le kan leiram tla rawl in in lei aw. Faro ih sal kan cang thluh ko pei ih kan ram hmuahhmuah khal amah ih ta-ah si ṭheh ko seh. Rawl loih kan thih ṭheh lonak ding le kan ram pawl tla ramṭhingih an can ṭheh lonak dingah rawl le rawlci in pe hram aw,” ti ah an dil.

²⁰Cutikah Josef in Izipt ram sungih leiram hmuahhmuah cu Faro hrangah a lei ṭheh. Paam cu a besiat zet hrangah Izipt mi hmuahhmuah in an loram an zuar ṭheh. Izipt ram hmuahhmuah cu Faro ih ta ah a cang thluh.

²¹Izipt ram khatlam deng ihsin khatlam deng tiang a ummi minung hmuahhmuah cu hnaṭuantu salah a tuah ṭheh hai.

²²Josef ih a lei lomi leiram cu puithiam pawl ih leiram lawnglawng an si. Puithiam pawl cu an leiram an zuar a ṭul lo; ziangahtile Faro in an cawm awknak a pek a si.

²³Cule Josef in Izipt mi pawl hnenah, “Atu-ah nanmah le nan leiram pawl cu Faro ih hrangah ka lo lei thluh zo a si ti nan hmu. Hinah thlaici nan hrangah a um ih nan lo ah va cing uh.

²⁴Rawlkhawm tikcu ah nan neihmi rawl ṭhen nga ṭhen khat Faro nan pek pei. A taangmi hmuahhmuah cu nanmah ih hrangah a si pei; nan loih nan tuh ding thlaici le nanmah le nan sungkhat pawl le nan faate pawl tla-ih cawm awknak hrangah a si pei,” ti ah a ti.

²⁵Cutikah annih in, “Kan nunnak in run ngah zo; bawipa, kan tlunah na ṭha ngaingai ih kannih cu Faro ih sal kan si ko ding,” ti ah an ti.

²⁶Curuangah an rawl neihmi-ih ṭhen nga ṭhen khat cu Faro pek dingin Izipt ram sungah Josef in daan a tuah. Cuih daan cu atu tiangin an hmang lai a si.

²⁷Israel mi pawl cu Izipt ram Goshen ah cuticun an um. An neinung, leiram an nei ih an karhzai ngaingai.

²⁸Jakob cu Izipt ramah kum hleisarih a um ih, amah ih kum cu za sawmli kum sarih a si.

²⁹Cun Jakob cu a thih caan a nai thlang hrangah a fapa Josef a ko ih, “Na mithmai ṭha ka co a si ahcun ka hnenah thukamnak tuah hram aw. Na kut cu ka cawn karlakah ret awla ka parah thungai zetin, rinsantlak na sinak ding le Izipt ram sungih i phum lonak dingah BAWIPA hmin in thu kam aw.

³⁰Ka thih tikah Izipt ram ihsin i fehpi awla ka pu le ka pa vekin an thlaan ah i phum aw,” ti ah a ti. Josef in, “Na sim vekin ka tuah ding,” ti ah a ti.

³¹Jakob in, “Ka tuah tengteng ding ti ah siatcam in thu i kam aw,” ti ah a ti ih Josef in thu cu a kam. Cutikah Jakob cu a ihkhun lu lamah lukuun in lungawi thu a sim.