Read Falam Chin SEEMTIRNAK 48 Bible Online

SEEMTIRNAK 48 - Falam Chin bible

SEEMTIRNAK 48

¹Tawkfang a rei hnuah Josef cu, “Na pa a na a si,” ti ah an sim. Curuangah Josef cu a fapa pahnih Manasseh le Efraim thawn a pa veh dingah an feh.

²“Na fapa Josef cu nangmah zoh dingah a ra a si,” ti ah an sim tikah, Jakob cu a to thei nalo cingin ihkhun parah a hung to.

³Jakob in Josef hnenah, “Ziangkimtithei Pathian cu Kanaan ram Luz khua ah ka hnenah a lang ih thlawsuah i pek.

⁴Pathian in, ‘Tefa tampi ka lo pek ding ih na tesinfa pawl cu miphun tampi-ah an cang ding. Hi ram cu na tesinfa pawl hnenah kumkhua in anmah ih ta-ah ka pe ding,’ ti ah i ti.

⁵Na fapa pahnih Izipt ram ka ra thlen hlanih na hrinmi tla cu ka fapa ngaingai ah siar an si ding. Reuben le Simeon ka fapa an si tlukin Efraim le Manasseh khal ka fapa an si ding.

⁶Asinain anmah ih hnu ih na hrinmi na faate pawl cu nangmah ih ta an si ding. Roconak ahcun an u Efraim le Manasseh thawn ṭawmcih an si ding.

⁷Hitiih ka tinak cu ziangah a si tile Mesopotamia ram ihsin ka ra kir ih Kanaan ramsung ka thlen hnu Efrath khua kan thlen hlan deuhte ah, ka riahsiattertu bikah, na nu Rachel in in thihsan ih Efrath lamzin ah ka phumta a si,” ti ah a ti. (Efrath cu atu ahcun Bethlehem tiin kawh a si.)

⁸Josef ih fapa pahnih cu Jakob in a hmuh tikah, “Hi nauhak pawl cu zoso an si?” ti ah a sut.

⁹Cutikah Josef in, “Annih cu hi Izipt ram ah Pathian ih i pekmi ka fapa an si,” ti ah a ti. Cule Jakob in, “Ka hnenah rak hruai awla thlawsuah ka pe hai ding,” ti ah a ti.

¹⁰A tar zo hrangah Jakob cu a mit a mal thlang ih ṭhatein khua a hmu thei lo. Josef in a fapa pawl cu a pa ih hnenah a hruai ih a pa cun a pom ih a hnam hai.

¹¹Jakob in Josef hnenah, “Nangmah ton sal ding hman hi ka rak zum dah lo. Asinain atu cu Pathian in na faate pawl tla i hmuhter a si,” ti ah a ti.

¹²Cutikah Josef in a pa ih cawn par ihsin a faate pawl cu a lak hnuah a pa ih hmaiah leilung dai in a kuun ih upatnak a pek.

¹³Josef in a fapa pahnih cu an kut veve in a kai ih a pa Jakob ih kehlam um dingah Efraim cu a vorhlam kut in a hruai ih, a pa ih vorhlam um dingah Manasseh cu a kehlam kut in a hruai ih a fehpi.

¹⁴Asinain Jakob in a kut kalh-aw in a nauta deuh Efraim ih lu parah a vorhlam kut a suang ih a upa deuh Manasseh ih lu parah a kehlam kut a suang.

¹⁵Cule Josef cu thlawsuahnak a pek ih: “Ka pu Abraham le ka pa Isaak in An nun sungih an renmi Pathian, Cuih Pathian in nannih cu thluasuah lo pe hai hram seh. Tuihsun tiangin i fingkhawitu Pathian in nannih cu bawngmal lo sawm hram seh.

¹⁶Siatsuahnak tinkim sung ihsin i runtu vanmi in, Nannih cu thluasuah lo pe hram seh. Ka hmin le ka pu Abraham le ka pa Isaak ih hmin cu, Anmah thawngin nung ringring hram seh. Te le fa tampi nei in, Leilung parah miphun tampi ah cang hai seh,” ti ah a ti.

¹⁷Cun a pa in a vorhlam kut cu Efraim lu parih a suan kha Josef in a hmuh tikah a lung a kim lo ngaingai ih a pa ih kut cu Efraim ih lu ihsin Manasseh ih lu ah ṭhawn dingin a lak sak.

¹⁸Cule a pa hnenah, “Ka pa, khati cun a si lo ding. Hi pa hi fa upa a si ruangah a lu parah na vorhlam kut re aw,” ti ah a ti.

¹⁹Asinain a pa in a duh lo; “Ka thei ko ka fapa, ka thei ko. Manasseh ih tesinfa pawl khal miphun tumzet ah an cang ve ko ding. Asinain anih hnakin a naupa cu a tum sawn ding ih a tesinfa pawl cu miphun tumzet ah an cang ding,” ti ah a ti.

²⁰Cutiin cuih ni-ah thluasuahnak a pek hai: “Israel mi pawl in midang hrangah Pathian ih thluasuah an dil tikah, ‘Efraim le Manasseh thluasuah vanluh teih an um bangin, Pathian in lo thluasuah hram seh,’ an ti ding,” ti ah a ti. Cuticun Jakob in Efraim cu Manasseh hlanah a ret.

²¹Cun Jakob in Josef hnenah, “Kei cu ka thi cing ding. Asinain Pathian cu na hnenah a um ding ih na pu le na pa pawl ih ram ah a lo kirter leh ding.

²²Cule Amor mi pawl hnen ihsin ka li le ka nam thawn ka lakmi ram hmuahhmuah lakih ram ṭhabik Shekhem cu na unau pawl coter loin nangmah hnenah ka lo pek a si,” ti ah a ti.