Read Falam Chin SEEMTIRNAK 49 Bible Online

SEEMTIRNAK 49 - Falam Chin bible

SEEMTIRNAK 49

¹Cun Jakob in a fapa pawl a ko ih, “Hmun khatah khawm-aw uhla hmailamah nan tlunih thil a cang dingmi ka lo sim cia hai ding,” ti ah a ti.

²“Ra uhla ngai uh, Jakob ih fapa pawl, Nan pa Israel thusimmi ngai uh.

³“Reuben, ka fatir, Nang cu ka thazaang na si, Patling ka si hnu ih ka neih hmaisa bik na si, Ka fapa pawl lakah a cak bik le a hngal bik;

⁴Nang cu tilian bangin mi thinsahlap na si, Mi thupi bik na si dah lo ding, Ziangahtile na pa ih nusun rori na sualpi, Na pa ih ihkhun parah na kai ih na baalter.

⁵“Simeon le Levi cu unau an si, An hriamhrei cu mi-ih thisen luannak ah an hmang;

⁶An thuthup relnak ah ka tel lo pei, An khawkhannakah siarcih ka si lo pei, Ziangahtile an ai a thok tikah mi an that, Nomnak menah cawcang kaiza an sat cat.

⁷An thinhengnak parah camriamnak um seh, Ziangahtile an thinhengnak a luar tuk. An thinlingnak par khalah camriamnak um seh, Ziangahtile a siakha tuk. Jakob ram sungah ka ṭhekdarh thluh hai ding, Israel mi lakah ka ṭhekdarh thluh hai ding.

⁸“Judah, nang cu na unau pawl in an lo thangṭhat ding, Na ral pawl an hngawng in na kai ding ih, Na hmaiah na unau pawl an kuun ding.

⁹Judah cu kiosa no bangtuk a si, Sa a deh thluh in a rolnak ah a kir sal, ka fapa, Judah cu kiosa vek a si; A dok aw ṭhunṭho ih a vung bok sal, Zohman in an ṭhang ngam lo.

¹⁰A siangpahrang fung a keng ih, A tesinfa pawl cu uktu an si ringring ding. Miphun tampi in ngunkhuai an pe ding ih, Upatnak in a hmaiah an kuun ding.

¹¹A laak no cu sabit kuangah a hren, Sabit kuang ṭha bikah. A hnipuan cu sabitti in a sawp, Thii bangin a senmi sabitti ah.

¹²Sabitti a in nakah a mit cu thii bangin a sen hreihrei, Cawhnawi a in ruangah a ha cu vur bangin a vaar fiahfiah.

¹³“Zebulun cu tifinriat kapah a um ding, A tikap tla cu tangphawlawng colhnak a si ding; A ram cu Sidon tiang a kau ding.

¹⁴“Issakhar cu a cakzetmi laak a si, A phurhmi thilrit tom hnih karlakah a bok;

¹⁵A colhnak hmun a ṭhatzia le, A ram a nomzia a hmuh ruangah, Thilrit phur dingah a zaang cu a tun ih, Hnaṭuan khung ṭuantu sal ah a cang.

¹⁶“Dan cu a miphun uktu a si ding, Israel miphun pawl vek thotho a si ding.

¹⁷Dan cu lamzin kapih rul vek a si ding, Zintlang ih tur neimi rulha vek a si. Rang kebeu ah a cuk ih rang totu cu dunglamah a hlon.

¹⁸“Maw BAWIPA, nangmah ih runnak ka hngak.

¹⁹“Gad cu fifir pawl in an siim ding; Asinain a do ding ih a dawi suak ding.

²⁰“Asher ih loram ihsin rawlṭha a suak ding, Siangpahrang ih ei tlak rawl a si ding.

²¹“Naftali cu a tlang dualdomi zuknengpi, Fano mawi zetzet neimi vek a si.

²²“Josef cu hramlak ih laak, Cerhti kiangih a tlangmi laak bangtuk a si, Tlang parih laak note vek a si.[75]

²³Zaangfahnak nei loin a ral pawl in an hual, An li le an thal thawn an dawi.

²⁴Asinain Jakob ih Pathian, Ziangkimtithei ih cahnak le, Israel ih Lungpi, Israel Khaltu thawngin A li cu a kiak thei ve lo ih A baan tha cu a cak teltelzet a si.

²⁵Na pa ih Pathian, nangmah a lo bawmtu le, A lo thluasuahtu Ziangkimtithei Pathian in, Van ihsin thlawsuahnak cu ruah bangin, Lei hnuai khalin tidai bangin, Te le fa, ṭilva sumhnam thlawsuahnak thawn,

²⁶Fangvui fual le rawlhan tlingin, Thlaithlak le rawl ṭuan thlawsuahnak; Khuahlan ihsin a rak ummi tlang ih thlawsuahnak le, Kumkhua a hmunmi tlangpar ih duhnungza thil pawl cu, A unau lakih mi hleice dingin sersiammi, Josef ih lu parah thleng thluh hram seh.

²⁷“Benjamin cu a hrang zetmi cinghnia paak a si; A deh ciami cu zinglamah a ei, Zanlam ah a ngahmi sa cu a ṭhendarh ciamco,” ti ah a ti.

²⁸Hi pawl hi Israel miphun hleihnih an si ih an hnenah an pa ih thucahmi an si. Pakhat hnu pakhat anmah thawn a mawitawk in thluasuah a pek ciar a si.

²⁹Cun Jakob in a fapa pawl hnenah, “Ka pu le ka pa hnenih feh ding ka si thlang. Kanaan ram Mamre ihsin nisuahnak lam Makpelah ah,

³⁰Hit mi pa Efron hnen ihsin ram le lungkua cu thlaan hrangah Abraham ih leimi a um. Cutawkah in run phum pei.

³¹Cutawkah Abraham le a nupi Sarah phum an si. Isaak le a nupi Rebekah khal cutawkah phum an si thotho. Keimah in ka nupi Leah khal cutawkah ka phum zo.

³²Cuih ram le a sungih a ummi lungkua cu Hit mi pa hnen ihsin leimi a si,” ti ah a ti.

³³A fapa pawl hnenih a thucahmi a ṭheh vete in Jakob cu a ihkhun parah a ke a com ih a thaw a cemcihta. Cuticun a pu le a pa hnenah a fehta a si.