Read Falam Chin SEEMTIRNAK 7 Bible Online

SEEMTIRNAK 7 - Falam Chin bible

SEEMTIRNAK 7

¹Noah hnenah BAWIPA in, “Nan sungte in lawng sungah lut uh; ziangahtile leilung mi hmuahhmuah lakah nangmah pakhat lawng ka mithmuh ah a dingmi na si.

²Saram thiang ei ṭha phunkim in phunkhat ah khuah sarih ciar keng aw; asinain a thiang lo ramsa cu phunkhat ah a nu le a pa khuah khat ciar lawng la aw.

³Vate khal a phunkim in phunkhat ah khuah sarih ciar in keng aw. Himi pawl cu leilung ih cithlah saaltu dingah an si.

⁴Tuih hnu ni sarih ah leilung parah ni sawmli le zan sawmli sung ruah ka surter ding ih ka tuah cia a nungmi hmuahhmuah a siatsuah thluh ding a si,” ti ah a ti.

⁵Cule BAWIPA ih thupekmi vek cekci in Noah cun a tuah ṭheh.

⁶Tilik a thawh tikah Noah cu kum zaruk a si.

⁷A nupi le a fapa pawl le an nupi pawl thawn tilik ihsin him dingah lawng sungah an lut.

⁸Ramsa le vate a thiang siseh thiang lo siseh a phunkim in a nu pakhat le a pa pakhat ciar,

⁹Pathian ih thupek vekin Noah thawn lawng sungah an lut.

¹⁰Ni sarih hnuah leilung tlunah tilik a tlung.

¹¹Noah kum zaruk a kim hnu thla hnihnak[8] ni hleisarih ni ah, leilung hnuai ih tipi cu hmunkip in an put ciamco; cun van tukvirh hmuahhmuah a ong-aw ih ruah a thlet in a thle aw;

¹²cuticun leilung parah ni sawmli le zan sawmli ruah cat loin a sur thlurthlo.

¹³Cuih ni ah Noah le a nupi, a fapa pathum Shem, Ham le Jafet le an nupi pawl cu lawng sungah an lut.

¹⁴Anmah thawn hmun khatah hramlak ramsa siseh, innzuat ṭilva siseh, a vak thiammi hmuahhmuah le vate a phunphun tla an lut.

¹⁵Ramsa a phunkim in, a nu le a pa ciar in, Noah thawn lawng sungah Pathian ih thupekmi vekin an lut.

¹⁶Cule Noah a luh ngah in BAWIPA in sangka a khar.

¹⁷Ni sawmli ti a lik hnu ah tidai a tam dutdo deuhdeuh ih an lawng cu tidai in a phuanter.

¹⁸Tidai a thuk deuhdeuh ih tidai parah lawng cu a phuan.

¹⁹Tilik cu a thuk sinsin ih tlang saangbik pawl khal a khuh thluh.

²⁰Cuih tlunah tidai cu tlangzim tlunah pi kul hluannga a kai.

²¹Leilung parih a nungmi hmuahhmuah, minung siseh, ramsa le vate siseh, cucik kharbok tiangin an thi thluh.

²²Leilung parih nunnak a neimi hmuahhmuah in an thi thluh.

²³Leilung parih a vak thiammi hmuahhmuah - minung le ramsa le vate a fate bik tiangin BAWIPA in a thihter thluh. Siatsuah lomi cu Noah le amah thawn lawng sungih a ummi lawng an si.

²⁴Tidai cu lei parah ni za le ni sawmnga sung ṭum loin a um.