Read Falam Chin 2 SAMUEL 1 Bible Online

2 SAMUEL 1 - Falam Chin bible

2 SAMUEL 1

¹Saul a thih hnuah David cu Amalek ral a nehnak ihsin a ra kir ih Ziklag khua ah ni hnih a um.

²A thaisun ah Saul thihnak hmun ihsin tlangval pakhat a ra thleng. A riahsiat ruangah a hnipuan a thlek ih a lu ah leivut a phulh aw. David hnenah a feh ih leilung dai in upatnak pekin a lu a kun.

³Cutikah David in, “Khuitawk inso na rat?” tiah a sut. Anih in, “Israel ralkap pawl lakin ka ra tlan,” a ti.

⁴“Ziang an cang, i sim hnik,” tiah David in a ti. Cutikah tlangvalpa cun, “Israel ralkap pawl cu an tlan thluh ih tampi an thi fawn. Saul le a fapa Jonathan khal an thi,” tiah a ti.

⁵“Saul le Jonathan an thi, tiah ziangtinso na theih?” tiah David in a sut sal.

⁶Tlangvalpa in, “Gilboa tlang parah ka rak um ve ih an ral pawl rangleng le rang ralkap pawl in an hun naih vivo ih culaiah Saul cu a feipi pawk in a din kha ka hmu.

⁷A her-aw ih keimah i hmu ih i ko. “Bawipa, ziangso?” tiah ka ti.

⁸“Zoso na si?” tiah i sut ih, “Amalek mi ka si,” tiah ka ti.

⁹Cutikah, “Besiazet in in tuahmawh zo ih ka thi cing ding. Ra awla i ra that aw,” tiah i ti.

¹⁰Curuangah a umnak ah ka hung so ih ka that, ziangahtile a tlu ding ih a tluk vete cun a thi thotho ding, ti ka thei. Cun a lu parih a siangpahrang lukhuh le ralnam khamnak baanhrolh cu ka lak ih atu na hnenah ka rak keng a si, bawipa,” tiah a ti.

¹¹David cu riahsia le ninghang in a hnipuan a thlek thluh ih a milai pawl hmuahhmuah khal in an thlek thluh ve.

¹²An ṭaang cuum aw in an ṭap ih, BAWIPA ih minung Israel mi tampi ralih an thih ruangah le Saul le Jonathan tla an hlohral ruangah zan tiang rawl ul in an um.

¹³Cule David in hi thu a ra simtu tlangvalpa cu, “Khuilam mi so na si?” tiah a sut. “Amalek mi ka si naón na ram sungah hin ka um,” tiah a sawn.

¹⁴David in, “Ziangtin so BAWIPA in siangpahrang ih a hril mi cu na thah ngam?” tiah a ti ih,

¹⁵a ralkap pakhat ko tahratin, “Hi pa hi that aw,” tiah thu a pek. Curuangah ralkap pa cun Amalek tlangvalpa cu a sah thluk ih a that.

¹⁶Cutikah David in, “Na thisen cu na lu parah tlaseh. BAWIPA Pathian in siangpahrang ih a hrilmi ka that a si, tiah na hmurka rori ih na phuan ruangah nangmah le nangmah na nunnak na cemter-aw a sihi,” tiah Amalek pa cu a ti.

¹⁷David in Saul le a fapa Jonathan cu hla in a ṭah ih,

¹⁸a cuih hla cu Judah mi pawl ih zir dingin thu a pek. (Hi thihhla cu Jashar Cabu sungah an ngan.)

¹⁹“Maw mi vanduai Israel bawi pawl, Nan ram tlangmual ih nan thih hi, Ralṭha hleice pawl vanduai ni a suah hi.

²⁰Gath khua ah va sim hlah uh, Ashkelon khua ih lamzin ah phuang hlah uh; Filistin nunau an lung a awi pang ding. Khawvel fanu pawl an di a riam tuk pang ding.

²¹Maw Gilboa tlang, Na parah ruah le dai khal tla hlah seh, Na leiram cu caar le kolh in thlairawl zianghman suah hlah seh! Ziangahtile ralṭha pawl ih ralphaw cu a rop duahdo ih, Saul ih ralphaw cu a tlap ṭheh.

²²Jonathan ih li le thal cu mi hriamah a hmual a na, Saul ih ralnam cu mizaangfah a nei lo. Micak zet pawl khal a ṭhio thluh ih, Ral pawl khal a saattan thluh.

²³Maw Saul le Jonathan, Nan duh awknak mangbangza a si; Nunnak ah nan hmun khat ih thihnak khalah nan hmunkhat; Muvanlai hnakin nan rangdeuh, Kiosa hnakin nan cakdeuh.

²⁴Maw Israel nunau pawl, Saul cu ṭah cio uh; Hnipuan mankhung sunglawi in, sen thliaithliai ih a lo thuamtu amah a si; Hlawnthil mankhung le suingun in a lo mawitertu amah a si.

²⁵Ral ṭha hleice ralkap pawl an van a duai ee, Raldonak ah an hloral ta; Tlang parah Jonathan cu a thita.

²⁶Maw Jonathan, ka unau duh, nangmah ruangah ka riah a sia, Ziangtluk duhnungza so ka hrangah na si! I duhdawtnak cu ziangtluk mangbangza so a si, Nunau ih duhdawtnak hnakin a thlum sawn.

²⁷Kan miṭha pawl an ral zo, An hriamnam pawl khal an hloral thluh zo,” tin a ṭah.