Read Falam Chin 2 SAMUEL 16 Bible Online

2 SAMUEL 16 - Falam Chin bible

2 SAMUEL 16

¹David cu tlangpar ihsin malte a feh tikah, ruah lopi in, Mefibosheth ih hnen-um pa Ziba in a rak hmuak. Ziba cun laak pahnih a hruai ih laak pawl cun sang zawl zahnih, caar mi sabit rah bawr zakhat, thingrah lawh tharmi bawr zakhat le sabitti saphaw thawl khat an phur.

²Siangpahrang David in, “Thil hi zatzat cu khuiah so na heih ding?” tiah a sut. Cutikah Ziba in, “Laak pawl cu siangpahrang ih innsang pawl to dingah an si; sang le thingrah pawl cu na minung pawl ih ei dingah a si; sabitti cu na minung pawl hramlakih an bang tikih an in dingah a si,” tiah a ti.

³Siangpahrang in, “Na bawipa Saul ih fapa sin Mefibosheth cu khuiah so a um?” tiah a sut. Cutikah Ziba in, “Jerusalem ah a um; ziangahtile a pu Saul ih uknak cu a tuih ṭumah Israel mi pawl in ‘Ka hnenah in pe sal hmang ding’, tiih a zum ruangah a si,” tiah a ti.

⁴Siangpahrang in Ziba hnenah, “Mefibosheth ih ta hmuahhmuah cu na ta an si thluh sokhaw,” a ti. Cule Ziba cun a lu a kun ih, “Kei cu na sal ka si ko. Siangpahrang nangmah ih mithmai ṭha a cotu si ringring hram ninglaw,” a ti.

⁵An feh vivo ih Bahurim khua an thlen tikah Saul ih sungkhat a si mi, Gera ih fapa Shimei cu David tong dingah mi camriam phah in a ra suak.

⁶David le a kuthnuai bawi pawl cu lungto in a deng hai ih ralkap pawl le a kiltu pawl in David cu an kulh ṭhepṭhep naón a deng thotho.

⁷Shimei in David cu a cam ih, “Tlan aw, tlan zaang aw; laithat pa, mi sualral pa;

⁸Saul ih uknak cu na long ih Saul ih sungkhat pawl tampi na thah ruangah BAWIPA Pathian in atu-ah na parah phuba a la a si. Atu-ah BAWIPA in na uknak cu na fapa Absalom hnenah a pek zo. Na cem a si, laithat pa!” tiah a cam ciamco.

⁹Cutikah Zeruiah ih fapa Abishai in siangpahrang hnenah, “Maw siangpahrang bawipa, ziangah so hih uico pa ih cam cu na tuar cuahco men? Ka va feh pei ih a lu ka va tan pei,” tiah a ti.

¹⁰Siangpahrang in Abishai le a u Joab hnenah, “Himi cu nannih thawn a seng lo. Pathian ih a fial ruangah i cam a si ahcun, ‘Ziangah so na cam?’ tiah zoso a ti thei ding?” tiah a ti.

¹¹Cule David in Abishai le a kuthnuai bawi pawl hnenah, “Ka sungsuak ka fapa rori hman in a thah i tum a si ruangah hi Benjamin pa ih thil tuahmi parah mangbang ding zianghman a um lo. BAWIPA in a fial a si ruangah a parah zianghman ti hlah uh, a duh tawkin i cam seh.

¹²BAWIPA in ka zonzaih harsatnak hi a run hmu pei ih, a tuih in cam rero can ai ah BAWIPA in malza i sawm tla a si thei,” tiah a ti.

¹³Curuangah David le a milai pawl cu an feh vivo. An dungin Shimei cun a thlun ih an fehnak tlangpar zinkap ihsin a feh ih a feh phah cun a cam vivo hai ih lungto le hnawmhne in a deng phah vivo.

¹⁴Siangpahrang David le a milai pawl cu Jordan an thlen tikah cun an bang hnephnep ih cutawkah David cu a cawl.

¹⁵Absalom le a hnenih a ṭangmi Israel mi hmuahhmuah cu Jerusalem khua ah an lut ih Ahithofel tla a tel.

¹⁶Cule David ih rinsanmi a rualpa Hushai in Absalom cu a tong ih, “Siangpahrang a nun sau hram seh! Siangpahrang a nun sau hram seh,” tiah a ti.

¹⁷Cutikah Absalom in, “Na rualpa David ih milai na si nawn lo mawsi? Ziangah so amah na thlun lo?” tiah a sut.

¹⁸Hushai in, “Ziangtin so ka thlun thei ding? BAWIPA Pathian ih a hrilmi le hi minung pawl le Israel misenpi ih an hrilmi lawng kei ka thlun ding a si. Na hnenah ka um ding.

¹⁹Thungai ih kan ti ahcun, ka bawipa ih fapa rian loin zoso ka ren cuang ding? Na pa ih hna ka ṭuan vekin atu-ah nangmah ih hna ka ṭuan ding,” tiah Absalom cu a ti.

²⁰Cule Absalom cu a her ih Ahithofel hnenah, “Na ruahnak in sim hnik! Ziangtin so thil kan tuah pei?” tiah a sut.

²¹Cutikah Ahithofel in, “Feh awla na pa ih inn, siangpahrang inn kilkhawitu dingih a taantami a nupisun pawl va ihpi aw. Cutiih na tuah asile a pa ih thin a hengter nasa zo tiah Israel mi hmuahhmuah in an lo thei ding ih na hnenih a ṭangtu pawl cu an ṭang sinsin ding,” tiah a ti.

²²Curuangah siangpahrang inn diphun parah deu an sak ih Israel misenpi mithmuh ah Absalom in a pa ih nupisun pawl cu a ihpi a si.

²³A cuih san ahcun Ahithofel ih ruahnak cu Pathian ih ṭongkam ngaingai bangin an rak thlun. David khal in a rak thlun ih Absalom tla in a thlun ve.