Read Falam Chin 2 SAMUEL 20 Bible Online

2 SAMUEL 20 - Falam Chin bible

2 SAMUEL 20

¹Culai ah Benjamin mi Bikri ih fapa Sheba an timi pa pakhat a um ih amah cu mi hlotlauzet a si. Cule Sheba cun tawtawrawt tum tahrat in, “David hnenah covo kan nei lo, Jesse fapa ziang ṭhahnem lo! Israel mi pawl, tlungthluh uh,” tiah a au ciamco.

²Curuangah Israel mi pawl cun David cu an tlansan ih Bikari ih fapa Sheba hnenah an feh. Sikhalsehla Judah mi pawl cun David cu an duh thotho ih Jordan tiva ihsin Jerusalem tiang an thlun.

³David cu Jerusalem a siangpahrang inn ah a feh ih a inn kilkhawitu dingih a retta mi a nusun pahra pawl cu a lak ih palik a kilter. An ṭulmi hmuahhmuah cu a pek thluh. Asinain an hnenah a it lo. An thih ni tiangin a dangte in a ret hai ih nuhmei bangin an um.

⁴Siangpahrang in Amasa a ko ih, “Judah mi pawl cu hmun khatah ko thluh awla, tipsun ah hitawk ah ra uh,” tiah a ti.

⁵A tivek in Amasa cu a feh ih Judah mi pawl cu a ko. Asinain siangpahrang ih ni a tin ni ah Amasa cu a kir lo.

⁶Curuangah siangpahrang in Abishai a ko ih, “Absalom hnak hman in Sheba in harsatnak in pe sawn ding a sihi! Curuangah ka ralkap pawl fehpi awla Sheba cu va dawi uh. Culo ahcun kulhmi khawpi hrekkhat a la pang dingih kan kut sung ihsin a luat pang ding,” tiah a ti.

⁷Curuangah Joab ih milai pawl, Kereth mi, Peleth mi le ralkap dang pawl tla in Abishai cu an thlun. Sheba dawi dingah cun Jerusalem ihsin an suak.

⁸Cule Gibeon ih a ummi lungto tumpi an thlen tikah Amasa thawn an tong aw. Joab cu a ralthuam a hruk ih a ralnam cu a kawm sungah a than ih a taikhap ah a thlaih. Hmaiah a suak ih cutikah a ralnam cu a tla.

⁹Cule Joab in Amasa hnenah, “Ka rual, na dam maw?” a ti ih hnam zik vekin a vorhlam kut in Amasa ih khahmul a hei kaih.

¹⁰Joab ih ralnam a ken kha a thei lo ih Amasa cu a ralring lo. Curuangah Joab in Amasa cu a pum ah a sun ih a sungril pawl cu leilung ah a suak thluh. Sun saal hman ṭul loin hmakhatte ah Amasa cu a thi. Cule Joab le a nau Abishai cun Sheba cu an dawi vivo.

¹¹Amasa ih ruak kiangah cun Joab ih ralkap pakhat a ding ih, “David le Joab a ṭantu hmuahhmuah in Joab thluh uh,” tiah a au.

¹²Lamzin laifangah Amasa ih ruak cu a thisen thawn ciah-aw in a um. Cumi a hmutu pohpoh cu an cawlhta ṭheu ruangah Joab ih ralkap pa in Amasa ih ruak cu lamzin ihsin hramlakah a dir ih puan pakhat a khuh.

¹³Cutiih lamzin ihsin a ruak an dirh hnuah Sheba dawi dingah an zatein Joab cu an thlun.

¹⁴Israel miphun umnak ram hmuahhmuah pal phah in Sheba cu a feh vivo ih Abel Beth Maakah timi khawpi ah a va thleng. Bikri miphun pawl an kokhawm aw ih a cuih khawpi ahcun an hei thlun.

¹⁵Cun Joab ih ralkap pawl khal an thleng ve ih a cuih khawpi cu an kulh. An khawpi kulhnak phardawl cu tlu seh tiah Joab ih ralkap pawl cun phardawl hnuai ih leilung cu an lai ciamco. Cule phardawl lan theinak dingah a leng ihsin leilung in an khahsilh.

¹⁶A cuih khawpi sungah cun nunau fim pakhat a um ih khawsungih phardawl parih sin, “Ngaihnik uh, ngaihnik uh! Joab cu hinah ratter hram uh; a hnenih thusim ka duh,” tiah a au.

¹⁷Joab cu a va feh ih, “Joab na si maw?” tiah a rak sut. “Ka si,” tiah Joab in a ti. “Bawipa, rak ngaihnik aw,” tiah anih in a ti. “Ka ngai ko,” tiah Joab in a ti.

¹⁸Cutikah nunau nu in, “Hlanlaipi ihsin, ‘Abel ah feh uhla thu cu a cat ding,’ tiah an rak ti ṭheu ih an ti vekin a cat ngaingai ṭheu.

¹⁹Kan khua hi rem awknak khua le an zohsomi khawpi a si ih, Israel ram sungah hin mi kilkhawitu nu bangtuk a si. Ziangah so cubangtuk khua cu a siatsuah na tum? Pathian ih ta a si mi cu na siatbal ko sawh ding maw?” tiah a ti.

²⁰Cutikah Joab in, “Asilo. Nan khawpi cu ka siatsuah hrimhrim lo ding.

²¹Kan tummi khal a si lo. Efraim tlangpar rammi Bikri ih fapa Sheba an timi in siangpahrang David cu a do ruangah a si. Cupa pakhat cu in rak pe uhla hih khua ihsin ka kir ding,” tiah a ti. Cule nunau nu cun, “Cupa ih lu cu phardawl tlun ihsin na hnenah kan rak hlon mai ding,” tiah a ti.

²²A feh ih a ruahnak hmuahhmuah cu khawsungmi pawl a va sim. Sheba ih lu cu an tan ngaingai ih Joab ih hnenah phardawl tlun ihsin an vun hlon. Joab in tawtawrawt a tum ih, a ralkap pawl thawn a cuih khawpi cu an taan ih an khua ah an tlung. Joab cu siangpahrang hnenah Jerusalem ah a kir.

²³Joab cu Israel ralkap pawl hotu a si. Jehoiada ih fapa Benaiah cu siangpahrang David ih inn kilvengtu Kereth mi le Peleth mi pawl hotu a si.

²⁴Adoniram cu leiram an ṭuanter mi pawl hmuahhmuah hotu a si; cule Ahilud ih fapa Jehoshafat cu sungṭuan a si.

²⁵Sheva cu zung cazipi a si. Zadok le Abiathar cu puithiam an si ih,

²⁶Jair khuami Ira khal David ih puithiam pakhat a si ve.