Read Falam Chin 2 SAMUEL 21 Bible Online

2 SAMUEL 21 - Falam Chin bible

2 SAMUEL 21

¹David a lal sungah kum khat hnu kum khat a peh in kum thum khengte paampi a tlung. Curuangah BAWIPA Pathian hnenah David in a sut ih BAWIPA cun, “Saul in Gibeon mi a thah hai ruangah Saul le a innsang pawl cu laithat an si,” tiah a ti.

²(Gibeon mi pawl cu Israel mi an si lo. Israel mi pawl in humhim dingih an rak tiammi Amor miphun pawl lakah a taangsun miphun fate pakhat an si. Asinain Saul in Israel mi le Judah mi pawl a ham tuk ruangah Gibeon mi pawl cu an ci in hmih thluh a rak tum a si.)

³Curuangah David in Gibeon mi pawl cu a ko ih an hnenah, “Nan hrangih ka tuah theimi ziangtal a um maw? Pathian ih miphun parah thluasuah vanluh tlung hram seh, tiah thlaza camtu nan sinak dingah nan parih thil ṭha lo an tuah zomi rem sal ka duh a si,” tiah a ti.

⁴Cutikah annih in, “Saul le a innsang thawn kan ral awknak cu sui le ngun khal in a rem thei lo ding; Israel mi khal zohman a thah kan duh lo,” an ti. “Cuti asile nan hrangah ziangso tuah ningla nan duh?” tiah David in a sut.

⁵Cutikah annih in, “Saul cun Israel ram sungah hin pakhat hman taang loin kan ci ih hmih thluh in tum a si.

⁶Cu a si ruangah Saul ih tesinfa mipa pasarih in pe awla, Pathian ih hrilmi siangpahrang Saul ih khawpi Gibeah rori ah BAWIPA Pathian hmaiah kan that hai ding,” tiah an ti. “Ka lo pe hai ding,” tiah David in a ti.

⁷Sikhalsehla BAWIPA ih hmin salin David le Jonathan in thukam awknak an rak tuah zo ruangah, Saul ih fapa sin Jonathan ih fapa Mefibosheth cu David in a luatter.

⁸Saul ih fapa pahnih - Aiah ih fanu Rizpah thawn an hrin mi Armoni le Mefibosheth cu a kai. Cun Saul ih fanu Merab le Meholah khuami Barzillai fapa Adriel ih hrinmi fapa panga khal a kai.

⁹An pasarih cu David in Gibeon mi hnenah a pek ih tlangpar ah BAWIPA ih hmaiah an that. An pasarih in hmun khatah an thi. An thah tikcu cu ṭhal cem zawng, barli sangvut khawm hram an thawh tikcu a si.

¹⁰Cutikah Aiah ih fanu, Saul ih nusun Rizpah in buri puan a lak ih lungpi parah ihphah ah a phah ih, rawl lak tikcu ih thokin fur ruah tlak hlanlo tiang an ruak cu sunih vate pawl in siseh, zanih ramsa pawl in siseh an ei lonak ding a kil ringring.

¹¹Rizpah ih thil timi cu David in a theih tikah,

¹²a feh ih Saul ih ruh pawl le Saul ih fapa Jonathan ih ruh pawl cu Gilead ih Jabesh mi pawl hnen ihsin a va lak. (Gilboa tlang parih Filistin mi pawl in Saul an thah sunah, Saul le Jonathan ih ruak cu Filistin mi pawl cun Bethshan ih senpi khawmnak hmunah an thlai. Cutawk ihsin Jabesh mi pawl in an va fir a si.)

¹³David in Saul le Jonathan ih ruh pawl cu a lak ih Saul ih tefa pasarih an thahmi pawl ih ruh tla cu a khawm.

¹⁴Cule Benjamin ram Zela khua ummi Saul ih pa Kish ih thlaan ah Saul le a fapa Jonathan ih ruh pawl cu an phum. Siangpahrang David ih thupek bangtuk in ziang hmuahhmuah cu an tuah ṭheh. Cuih hnu lawngah an ram hrangih thla an cammi cu BAWIPA Pathian in a sang a si.

¹⁵Filistin mi le Israel mi pawl karlakah ral a tho sal. Cule David le a ralkap pawl cu an feh ih Filistin mi pawl cu an do. Cuti ih an do awk laiah David cu a baangzet.

¹⁶Cutikah mitum zet, mikei phun, Ishbibenob an timi pa cu ralnam phundang a pai ih, pawng hra a ritmi dar feipi kengin a ra ih David cu thah a tum.

¹⁷Asinain culai fangah Zeruiah ih fapa Abishai in David cu a ra run ih Filistin pa cu a zon ih a that. Cule David ralkap pawl in an hnenah feh tahrat ih raldo ve nawn lo dingin David cu thu an kamter. “Israel mi hrangah tleunak na si ih in mihsan ding cu kan lo siang lo,” an ti.

¹⁸Gob an timi hmunah Israel mi le Filistin mi cu an do-aw sal. Cutawkah Hushah mi Sibbekai in mikei vekih a tumzet mi Saf cu a that.

¹⁹Cuih hnuah Gob ahcun Filistin mi thawn an do-aw lala. Cutawkah Bethlehem khuami Jair ih fapa Elhanan in Git khuami mitumzet pa, a feiko cu thiamtlang tia a si mi Goliath a that.

²⁰Cun Gath ah do awknak a um lala ih cutawk khua ah raldo hiarzet mitumpi pakhat a um. Amah cun a kut ah kutzung paruk le a ke ah kezung paruk fingfing, a zatein zung kul hluanli a nei.

²¹Israel mi pawl cu a zuam hai ih, cutikah David ih unau Shammah ih fapa Jonathan in cupa cu a that.

²²Hi mikei vekih a tummi minung pali pawl cu Gath ih mitum pawl ih tesinfa an si ih David le a ralkap pawl in an that a si.