Read Falam Chin 2 SAMUEL 22 Bible Online

2 SAMUEL 22 - Falam Chin bible

2 SAMUEL 22

¹Siangpahrang David cu Saul le midang a ral pawl kut sung ihsin BAWIPA Pathian in a luatter tikah BAWIPA hnenih a sakmi hla cu a tanglam pawl hi an si:

²BAWIPA cu ka Lungpi a si, Amah cu ka ralhruang le I tlentu a si.

³Ka Pathian cu ka beunak Lungpi le ka himnak a si. Amah in ralphaw bangin i hum ih, I ṭan ruangah ka him a si. BAWIPA cu i runtu a si, I hum ih thi luannak ihsin i luatter.

⁴BAWIPA cu ka ko ih, Ka ral pawl ih kutsung ihsin i luatter. BAWIPA cu thangṭhat uh!

⁵Thihnak tilet cun i khuh ih, Siatnak tisuar cu ka par ihsin a luang.

⁶Thihnak in a hridai in i ṭemih, Thlan khur in thang i kam.

⁷Ka thin a pit ih BAWIPA ih hnenah ka au, Ka Pathian hnenah bomnak ka dil. A biakinn sungah ka aw a thei ih, Bomnak ka dilnak cu i run ngai.

⁸BAWIPA cu a thin a heng ruangah, Leilung pumpi a hnin; Vanhram tiangin a hnin ṭheh.

⁹A hnar sung ihsin meikhu a suah, A ka in mei-alh le meivam a suak.

¹⁰BAWIPA in van cu a run hlip ih a rung ṭum, Khawdur tla cu a ke hnuai ah a ret.

¹¹Cherubim to in a rung ṭum, Thli parah cuangin zamrang zetin a zam.

¹²Khawthim sungah a zual aw ih, Khawdur sah zetin a kulh.

¹³A umnak hmai ih tleunak sungin, Nimthlakau meivam a suak zohzo.

¹⁴Cun BAWIPA cu van ihsin khawri bangin a hrum, Cungnungbik BAWIPA ih aw cu a khawk durdo.

¹⁵A conkiang pawl a kap ih, A ral pawl an ṭhekdarh aw thluh. A nimthla a kau ih, A ral pawl an tlan thluh.

¹⁶BAWIPA in a ral pawl a kawkih, A thinheng in a hro hai tikah, Tipi thuanthum ih tawdeng cu a lang ih, Leilung ih hramṭohnak tiangin an lang thluh. A hnar ihsin a thaw a phawt tikah cun.

¹⁷BAWIPA in van ihsin i run dawh ih i kai ngah, A thukzet mi tidai sung ihsin i suah ngah.

¹⁸Ka hrangih a cak tukmi ka ral pawl le Keimah i huatu pawl ih kut sungin i run zo.

¹⁹Ka thin a pih laitak ah in do, Asinain BAWIPA cun i hum a si.

²⁰Phannak hmun ihsin i hruai suak, Zalennak hmunah i thlenpi, Ka parih a lung a awi ruangah i hum a si.

²¹Midik ka si man cu BAWIPA in i pek a si; Mawh neiloin ka kut a fai ruangah i thluasuah a si.

²²BAWIPA ih in hmuhmi lamzin ka thlun; Ka Pathian hnen ihsin ka pial lo.

²³Amah ih daan hmuahhmuah ka thlun, A thupek mi pawl ka fehsan dah lo.

²⁴Sualnak cu ka hrial ih, Soiselnak um lo ka si kha a thei.

²⁵Midik ka si man cu BAWIPA in i pek a si, Mawh neiloin ka kut a fai ruangah, i thluasuah a si.

²⁶Rintlak mi hnenah cun rintlak BAWIPA na si. A famkim mi hnenah cun famkim Pathian na si.

²⁷A thianghlimmi minung parah cun a thianghlim in na lang ih, Mi hrokhrawl pawl hnenah cun an sualnak hawl fetfettu na si.

²⁸Mi hnuai dor pawl cu na run ih, Mi hngal pawl cu na namthlak.

²⁹Maw BAWIPA nang cu ka mei-inn na si ih, Ka thimnak hmuahhmuah na tleuter.

³⁰Ka ral pawl do dingah thazaang i pek, An hauhruang pawl lan thei dingah cahnak i pek.

³¹Hi Pathian ih thil tuahmi pawl cu an famkim a si, A thu pawl cu ziangtluk rintlak so an si! Beunak a hawltu hrangah cun, Amah cu ralphaw a si.

³²BAWIPA amah lawng Pathian a si, Pathian Amah lawng hi kan Lungpi a si.

³³Pathian cu ka beunak cak a si, Amah in ka lamzin a tluangter.

³⁴Ka ke cu zukneng ke bangin a zamrang ih, Tlang parah khoh zetin i dinter.

³⁵Dar li hman nawp thei dingah, Amah in raldo i zirh.

³⁶Maw BAWIPA, na runnak phaw i pek, I bawm ih mi mak ah i tuah.

³⁷Luat zetin ka ke i karter ih, Rilh bahnak ka tong dah lo.

³⁸Ka ral pawl cu ka dawi hai ih ka siatsuah thluh, Ka neh thluh hlanlo ka kir dah lo.

³⁹Ka vuakthlu hai ih an tho thei nawn lo; Ka ke hramah an bokta.

⁴⁰Raldonak hrangah cahnak i pek, Ka ral pawl ih parah nehnak i pek.

⁴¹Ka ral pawl cu ka hnen ihsin na tlanter; I huatu pawl ka siatsuah thluh.

⁴²Bomnak an dil naón zohman in an run thei lo; BAWIPA an ko naón an aunak a let lo.

⁴³Ka rial hai ih leivut vekah an cang; Ka pal hai ih lamzin ih ciarbek vekah an cang.

⁴⁴I dodaltu hnenin i luatter ih, Miphun tampi tlunah uktu bawi ah i tuah; Ka theih dah lomi tla ka ukmi ah an cang.

⁴⁵Ramdang mi tla ka hmaiah an kuun ih, Ka thupek mi an theih vete in an thlun.

⁴⁶Ramdang mi cu an thin a nau ih, An ralhruang sung ihsin khur thlohthlo in an ra suak.

⁴⁷BAWIPA cu a nung! Lungpi cu thangṭhat uh, Pathian cu cawisaang sin uh, Ka rundamnak Lungpi cu.

⁴⁸Ka aiah phuba latu cu Amah a si, Miphun tampi ka hnuai ah a ret.

⁴⁹I raltu pawl ih kutsung ihsin i luatter. Maw BAWIPA, ka ral pawl ih tlunah nangmah in nehnak i pek; Mi siatsuahtu pawl ih kut ihsin i run zo.

⁵⁰Curuangah miphun zakip hnenah BAWIPA ka lo thangṭhat ding; Na hmin thangṭhatnak cu hla in ka sak ding.

⁵¹Pathian in a siangpahrang hnen ah nehnak a pek; A cat lomi a duhdawtnak cu, kumkhua in a langter; A hril ciami David le a tesinfa pawl hnenah.