Read Falam Chin 2 SAMUEL 23 Bible Online

2 SAMUEL 23 - Falam Chin bible

2 SAMUEL 23

¹Jesse ih fapa, Pathian ih a khaisan mi, Jakob ih Pathian in siangpahrang si dingih a hrilmi le Israel mi hrangah hla mawi zetzet a phuahtu David ih ṭongkam neta bik cu hibangtuk in a si:

²BAWIPA ih thlarau in ka hnen ihsin a sim, A thu cu ka hmurka ah a um.

³Israel ih Pathian cun a sim zo; Israel humhimtu in ka hnenah: “Dingnak le Pathian ṭihzah in, Mi a uktu siangpahrang cu,

⁴Khawdur um lo zinglamih a tlang mi ni bangtuk a si, Ruah a han ih hrampi a tleutertu, ni bangtuk a si,” a ti.

⁵A pelh thei lo dingmi le, Kumkhua ih a hmunmi thukamnak in, BAWIPA in thu i kam zo ruangah, Ka tesinfa pawl cu Pathian in a thlawsuah ding. Cumi cu ka saduhthah a si; Cumi cu ka nehnak a si ding, Pathian in a kimter tengteng ding.

⁶Sikhalsehla Pathian a ṭihzah lotu cu, Nelrawn ih hlonhlo mi hling bangtuk an si. Kut lawngih tham theih pawl an si lo.

⁷Lak ding ahcun hreihriam le feipi hman a ṭul; Meisa ih ur thluh ding an si.

⁸David ih ralkap hminthang pawl cu hi pawl hi an si: Pakhatnak cu Takhemon mi Josheb Basshebeth a si ih “Mi Pathum,” timi lakah hotu a si. A feipi pakhat thawn ral minung zariat a do ih ṭum khatah an zatein a that thluh.

⁹Pahnihnak cu Eleazar a si ih “Mi Pathum,” lakih a tel ve mi a si. Amah cu Dodo ih fapa a si ih Ahoh hrin a si. Voikhat ah Eleazar le David in raldo dingih a khawm-aw mi Filistin mi pawl cu ṭih loin an dinhnawh ngam a si. Israel mi pawl cu an tlanhlo ṭheh.

¹⁰Asinain Eleazar cu a umnak hmun ihsin a ṭang ih Filistin mi pawl cu a ralnam in a sat ciamco hai ih a kut a hit ṭheh ih a ralnam humnak hman pharh thei nawn lo tiangin a that. A cuih ni ah BAWIPA in a cakzet mi ral a neh. Cuṭheh in Israel mi pawl cu a thi mi pawl ih ralthuam lak ding lawngah Eleazar ih hnenah an ra kir.

¹¹Pathumnak cu Harar mi, Agee ih fapa Shammah a si. Filistin ralkap pawl cu Lehi ah an khawm aw. Lehi ahcun bete lo pakhat a um. Filistin mi in Israel mi pawl cu an dawi thluh.

¹²Asinain Shammah cu lo sungih a dinnak hmun in a ṭang ih lo cu a kil ih Filistin mi pawl tampi a that. A cuih ni ah BAWIPA in a cakzet mi ral a neh a si.

¹³Lo ih rawlkhawm a cut zik thlang tikah Filistin ralkap pawl bur khat cu Refaim Phairawn ah an um. Cule “Mi Sawmthum,” sungih pathum pawl cu Adullam Lungpuk ah David hnenah an vung feh.

¹⁴David cu ralhruang sungah a um ih, Filistin ralkap bur khat cu Bethlehem ah an um.

¹⁵Cutikah David cu a lung a leng ih, “Aw, Bethlehem kotka kiangih a ummi tikhur ih tidai kha khuat khat talin in petu um hai sehla ka va duh ve,” tiah a hrum ruangro.

¹⁶Cule hminthang zet mi ralkap pathum pawl cun Filistin ral pawl cu an umnak ah an va nor ih tikhur ihsin tidai an khai ih David cu an pek. Sikhalsehla David in a in lo. BAWIPA hnenih thawinak tidai ah a hmang.

¹⁷“Maw BAWIPA, hi tidai cu ziangtinso ka in thei ding?. An nunnak pek ngam ih an khaimi a si ruangah hi tidai ka in ahcun ka ralkap pathum ih thisen in ka bang ding,” a ti. Curuangah a cuih tidai cu in loin thawinakah a thlet. A tlunih porh tlak hnaṭuanmi pawl cu hminthang ralkap pathum ih tuah mi an si.

¹⁸Joab ih nau Zeruiah ih fapa, Abishai cu “Mi Sawmthum,” ih hotu a si. Voikhat cu a feipi pakhat thawn ral zathum a do ih a that thluh. Curuangah “Mi Sawmthum,” sungah a hmin a thang ngaingai.

¹⁹Sawmthum sungih hminthang bik a si ruangah an hotu ah a cang. Asinain “Mi Pathum,” pawl cu a tluk lo.

²⁰Cun Kabzeel khuami, Jehoiada ih fapa, Benaiah cu ralkap hminthangzet le raldonak ih ralṭhazet a si. Moab ralkap hminthangzet pahnih tla a that. Vur a tlak sun ni khat ah khur sungah luhhnawh tahratin kiosa pakhat tla a that.

²¹Cule Izipt mi pa mi tumzet, feipi a kengtu pa tla a that. Benaiah cun talhtum thawn a nam ih Izipt pa ih kut sungih sin feipi cu a long ih amah ih feipi lala cun a thatta.

²²Benaiah ih ralṭhat zia cu cubangtuk a si. Amah cu “Mi Sawmthum,” lakih pakhat a si.

²³Sawmthum lakah mi hleice a si. Asinain pathum pawl cu a tluk lo. David in amah kilvengtu pawl hotu ah a ret.

²⁴Hminthang “Sawmthum,” sungih a telmi midang pawl cu a tanglam pawl hi an si: Joab ih nau Asahel, Bethlehem ihsin Dodo ih fapa Elhanan,

²⁵Harod ihsin Shammah, Harod ihsin Elika,

²⁶Pelet ihsin Helez, Tekoa ihsin Ikkesh ih fapa Ira,

²⁷Anathoth ihsin Abiezer, Hushah ihsin Mebunnai,

²⁸Ahoh ihsin Zalmon, Netofah ihsin Maharai,

²⁹Netofah ihsin Baanah ih fapa Heleb, Benjamin ram Gibeah ihsin Ribai ih fapa Ittai,

³⁰Pirathon ihsin Benaiah, Gaash kiang phairawn ram ihsin Hiddai,

³¹Arabah ihsin Abialbon, Bahurim ihsin Azmaveth,

³²Shaalbon ihsin Eliahba, Jashen ih fapa pawl, Jonathan,

³³Harar ihsin Shammah, Harar ihsin Sharar ih fapa Ahiam,

³⁴Maakah ihsin Ahasbai ih fapa Elifelet, Gilo ihsin Ahithofel ih fapa Eliam,

³⁵Karmel ihsin Hezro, Arab ihsin Paarai,

³⁶Zobah ihsin Nathan ih fapa Igal, Gad ihsin Bani,

³⁷Ammon ihsin Zelek, Beeroth ihsin Joab ih hriamnam phurtu Zeruiah ih fapa Naharai.

³⁸Jattir ihsin Ira. Jattir ihsin Gareb,

³⁹Hit mi pa Uriah. An zateón ralkap hminthang sawmthum le pasarih an um.