Read Falam Chin 2 SAMUEL 24 Bible Online

2 SAMUEL 24 - Falam Chin bible

2 SAMUEL 24

¹Israel parah BAWIPA cu a thin a heng sal ih an hnenih harsatnak thlenter dingah David cu, “Feh awla Israel le Judah mi pawl mipum siar aw,” tiah a forh.

²Curuangah David in a ralkap hotu ralbawi Joab cu a ko ih, “Na kuthnuai ih bawi pawl thawn kan ram khatlam deng Dan ihsin khatlam deng Beersheba tiang feh awla Israel miphun hmuahhmuah mipum va siar aw. Minung ziangzat an um ti a theih ka duh,” tiah a ti.

³Asinain Joab in, “Maw siangpahrang bawipa, BAWIPA na Pathian in Israel mi pawl cu atu hnakin a let za in pungzaiter hram sehla na nunsung ah cumi cu hmu dingin run tuah hram seh. Asinain maw siangpahrang bawipa, ziangah so mipum siar cu na duh?” a ti.

⁴Sikhalsehla siangpahrang in Joab le a kuthnuai ih bawi pawl cu a thupek mi vekin a thlunter ih curuangah an suak ih Israel mi siar dingah an feh.

⁵Jordan tiva an tan ih Gad ram sung phairawn ih a ummi Aroer khawpi ih thlanglam ah an riak. Cutawk ihsin Jazer ah an hung feh ih,

⁶Gilead le Hit ramsung Kadesh ah an hung thleng. Cule Dan an hung thlen hnuah cutawk ihsin nitlaknak lamah an her-aw ih Sidon an va thleng.

⁷Cuih hnuah ralhruang ih kulh mi khawpi ṭai-ar khua ah an vung feh ih cutawk ihsin Hiv khawpi pawl le Kanaan khawpi pawl ah an thleng. A netabik ah Judah ram thlanglam bikih a ummi Beersheba khua an thleng.

⁸Cuticun an ram pumpuluk an tlawng ṭheh ih thla kua le ni kul an rei hnuah Jerusalem khua ah an kir.

⁹Siangpahrang hnenah, “Raldo dingin hriamnam a keng theitu mipa cu Israel ram ah thawng zariat an um ih, Judah ram ah thawng zanga an um,” tiah an va sim.

¹⁰Sikhalsehla cutiih mipum siarnak an tuah ngah tikah, David cu a thin a nuam lo ngaingai ih BAWIPA ih hnenah, “Thil sualzet ka tuah zo a si. Maw BAWIPA, ka sualnak i ngaidam hram aw. Aatthlakza ka tuah a si,” tiah a dil.

¹¹Cutikah David ih puithiam a ṭuantu, profet Gad hnenah BAWIPA ih ṭongkam cu a ra thleng ih, “David ih hril dingah thil pathum ka pek. Pakhatkhat hril-aw sehla a parah ka kimter ding, tiah David va sim aw,” a ti. A thaizing David a thawh tikah,

¹³profet Gad cu a hnenah a ra thleng ih BAWIPA ih ṭongmi cu a ra sim. “Hi pathum lakah khuiso na hril ding? Na uk sung hmuahhmuah ah paam kum thum sung thlen maw? Asilole na ral pawl hnen ihsin thlathum sung tlan rero maw? Asilole na ram sungih ni thum sung pulhnat thlen so na hril sawn ding? ṭhatein ruatta awla, BAWIPA hnenih va sim kir dingah thu i let aw,” tiah a ti.

¹⁴Cutikah David in, “Ka mang a bangtuk aw! Sikhalsehla minung kut sungih thlen hnak cun BAWIPA ih kut sungah thleng ninglaw! Ziangahtile BAWIPA cu mi zaangfah thiam a si,” a ti.

¹⁵Curuangah BAWIPA in Israel ram sungah a cuih zing ih thokin a tiamkammi tikcu tiang pulhnat a tlunter. Israel ram pumpuluk ah Israel mi thawng sawmsarih an thi.

¹⁶Cule BAWIPA ih vancungmi in Jerusalem khua a siatsuah zik tikah, Israel mi hrem nawn lo dingin BAWIPA cu a thinlung a thleng-aw sal ih mi a that rerotu vancungmi hnenah cun, “Bang aw! Tawk thlang seh,” tiah a ti. Culai fangah vancungmi cu Jebus mi Araunah ih fang cilnak puum kiangah a um.

¹⁷Cule Israel mi a that rerotu vancungmi cu David in a hmuh tikah BAWIPA ih hnenah, “A mawhtu cu keimah ka si. Thilsual a tuahtu cu keimah ka si. Hi mizonzai na milai pawl in ziang sualnak so an tuah? Na hremnak cu keimah le ka innsang parah thleng sawnseh,” tiah a ti.

¹⁸A cuih ni ah profet Gad cu David hnenah a va feh ih, “Araunah ih fang cilnak puum ah hung feh awla BAWIPA ih hrangah biakṭheng hung dawl aw,” tiah a ti.

¹⁹Gad ih simmi BAWIPA ih thupek cu David in a ngai ih a hung feh.

²⁰Cule Araunah in a vun zoh tikah siangpahrang bawipa le a kuthnuai ih bawi pawl an hun rero kha a vun hmu. Cuvete in a feh ih David ih hmaiah leilung dai in a kun ih,

²¹“Maw siangpahrang bawipa, ziangah so kei na salpa hi i ra len?” tiah a rak sut. Cutikah David in, “Mi tampi an thihnak pulhnat hi a reh theinak dingah na fang cilnak puum hi lo lei tahratin BAWIPA ih hrangih biakṭheng dawl ka duh ruangah ka ra a si,” tiah a ti.

²²Araunah in, “Maw siangpahrang bawipa, na ṭul mi hmuahhmuah lak awla BAWIPA ih hnenah cun pe aw. Biakṭheng parih mei-ur thawinak hrangah hinah cawcang an um. Cun tih ding zanthing ah caw hngawngkol le fang cilnak zial pawl an um,” a ti.

²³Araunah in a neihmi hmuahhmuah cu siangpahrang hnenah a pek ih, “BAWIPA na Pathian in na thawinak cu lo sang hram seh,” tiah a ti.

²⁴Asinain siangpahrang bawipa in, “Asilo, a man ka lo pe thluh ding. A man zianghman ka pek lomi cu BAWIPA ka Pathian hnenih thawinak ah ka pe lo ding,” a ti. Cule Araunah ih puum le cawcang cu ngun tangka sawmnga in a lei.

²⁵Cutawkah biakṭheng cu a dawl ih mei-ur thawinak le remnak thawinak cu BAWIPA ih hnenah a pek. Cuticun BAWIPA in a thlacamnak cu a ngai ih Israel ram sungih pulhnat cu a reh.