Read Falam Chin 2 SAMUEL 4 Bible Online

2 SAMUEL 4 - Falam Chin bible

2 SAMUEL 4

¹Hebron ah Abner an that a si, ti kha Saul fapa Ishbosheth in a theih tikah a thin a phang ngaingai ih Israel mi hmuahhmuah khal an thin a nuam lo.

²Midang an siim tikih an hotu bawi pahnih Ishbosheth in a nei ih an hmin ah Baanah le Rekhab an si. Anmah cu Benjamin miphun, Beeroth khua Rimmon ih fapa an si. Beeroth cu Benjamin ram sungah siarcih a si.

³Beeroth ih a rak um hmasatu pawl cu Gittaim ah an tlan ih cutawk minung ah an cangta.

⁴Cun Saul ih fapa Jonathan in fapa pakhat a nei ih a hmin cu Mefibosheth a si. Saul le Jonathan an thihnak thu Jezreel ihsin a ra than tikah Mefibosheth cu kum nga a kim. Amah a umtu nu in a lak ih a tlanpi. Asinain zamrang tukin a tlanpi ruangah a thlak pang ih Mefibosheth cu a ke pahnih in a bai ta.

⁵Rekhab le Baanah cu Ishbosheth ih inn lamah an feh ih sunah an va thleng. Ishbosheth cu sunih a colh laifang a si.

⁶A sangka kiltu nunau nu cu sangvut a hrik rero laiah a ih a hmu ih a it that. Cutiih a ihthat laiah Rekhab le Baanah cu a thupte in an vung lut.

⁷Innsung an thlen vete in Ishbosheth ihnak khaan sungah an lutih a ihthat laifangah Ishbosheth cu an sun ih an that. A lu an tan ih an lak hnuah zanvar Jordan Phairawn in an feh ih Hebron khua ah an thleng.

⁸Ishbosheth ih lu cu David hnenah an fehpi ih a hnenah, “A lo raltu le a thah a lo tumtu Saul ih fapa Ishbosheth ih lu cu hihi a si. Tuihsun ah BAWIPA Pathian in Saul le a tesinfa pawl parih phulaknak cu siangpahrang na hnenah a lo pek a si,” tiah an ti.

⁹Cutikah David in, “Ṭihphannak hmuahhmuah sung ihsin i runtu a nungmi BAWIPA ih hmin in siat ka serh a si!

¹⁰Ziklag ah ra tahrat in Saul ih thihnak thu i ra simtu cun thuṭha ka phur tiah a ruat. Asinain amah cu ka kai ih ka that. Thuthang a rak ken ruangih hlawhman ka pekmi cu thih a si.

¹¹Mawhnak nei lomi amah ih inn sungih a it lai mi rori a va thattu misual pawl ih hrangah cun ziangtlukin so a har sinsin ding. Ishbosheth nan thah ruangah atu rori ah nan parah phu ka lak ding ih lei parah hin nan ci ka hmit thluh ding,” a ti.

¹²David in thu a pekih a ralkap pawl in Rekhab le Baanah cu an that ih an kut le an ke pawl an tan ih Hebron ih tili kiangah an thlai. Cun Ishbosheth ih lu cu an lak hnuah Hebron ahcun Abner ih thlaan ah an phum.