Read Falam Chin 1 SIANGPAHRANG 14 Bible Online

1 SIANGPAHRANG 14 - Falam Chin bible

1 SIANGPAHRANG 14

¹Cuih caanah Siangpahrang Jeroboam ih fapa Abijah a na.

²Curuangah Jeroboam in a nupi hnenah, “Zohman ih theihthiam lo dingin phundang in tuah awla, profet Ahijah umnak Shiloh khua ah va feh aw. ‘Israel siangpahrang na cang ding,’ tiih a rak simtu cu amah profet Ahijah a si.

³A hrangah sang zawl hra, sangrawh malte le khuaitizu palang khat hei keng aw. Kan fapa ziangtin a um ding, ti thu va sut awla a lo sim ko ding,” tiah a ti.

⁴Curuangah a nupi cu Shiloh khua Ahijah inn ah a va feh. Ahijah cu a tarzet zo ih a mit khal a mal zo.

⁵An fapa a nat ruangih Jeroboam a hnenih a ratnak ding thu kha Pathian in a rak sim cia zo. Cule Jeroboam nupi hnenih a rak sim ding thu khal a sim cia zo. Jeroboam nupi cu a feh ih midang vekah a tuah-aw ih Ahijah hnen ah a va thleng.

⁶Asinain sangka kiang a thlen kha Ahijah in a theih tikah, “Rung lut aw. Jeroboam nupi na si ka lo thei ko. Ziangah so midang vekih na tuah awk ciamco? Na hrangah thu ṭha lo ka nei a si.

⁷Va kir awla na pasal Jeroboam va sim aw. BAWIPA, Israel ih Pathian in a hnenah hiti in a ti a si: ‘Miseenpi sung ihsin nangmah cu ka miphun Israel mi uktu dingah ka lo hril.

⁸Ram uknak cu David tesinfa pawl hnen ihsin ka lak ih nangmah ka lo pek. Sikhalsehla ka thu famkim zetin a ngai ih, ka thupekmi thlun tahrat in ka lungkim mi lawnglawng a tuahtu ka siahhlawh David vek cu na si lo.

⁹Na hlanih ram a rak uktu siangpahrang pawl hnakin luar deuh in na sual a si. Keimah i hnong zo ih biak dingah milem le zuk pawl na tuah ruangah ka thin i hengter zo. Kei cu na dunglamah i hlon zo a si.

¹⁰Curuangah na uknak parah thil poimawh ka thlengter dingih na tesinfa pawl mipa hmuahhmuah upa siseh nauhak siseh, ka thiter thluh ding. Na innsang le na sungkhat pawl ka phiatfai thluh ding ih eek an ur ṭheu bangin an reh hlanlo ka ur ding.

¹¹Khawpi sungih a thimi na sungkhat pawl cu uico in an ruak an ei ding; hramlak ih a thimi pawl cu langta in an ei ding. BAWIPA a si mi Keimah in ka sim zo,’ a ti va ti aw,” tiah a ti.

¹²Cule Ahijah in Jeroboam nupi hnenah cun, “Atu va tlung aw. Nan khua na thlen vete in nan fapa cu a thi ding.

¹³Israel mi hmuahhmuah in an ṭah ding ih an phum ding. Jeroboam innsang sungah amah lawnglawng ṭhate ih phummi a si ding. Ziangahtile amah ih tlun lawnglawng ah Israel ih Pathian BAWIPA cu a lung a awi.

¹⁴Israel mi uktu dingah BAWIPA in siangpahrang dang pakhat a ret ding ih amah in Jeroboam ih uknak cu a cemter ding.

¹⁵BAWIPA in Israel cu a hrem dingih tiva sungih phaikung a hnin vekin Israel cu a hnin ringring ding. BAWIPA in an pipu hnenih a pekmi hi ramṭha le ramnuam ihsin Israel mi pawl cu a botcat ding ih Eufrates Tiva ral ah khin a ṭhekdarh thluh ding. Ziangahtile khawzingnu Asherah ih lem an tuah ruangah BAWIPA ih thin an hengter zo.

¹⁶BAWIPA in Israel cu a dungtun ding, ziangahtile Jeroboam in sualnak a tuah ih Israel mi pawl khal sualnak sungah a hruai thluh zo, tiah a ti.

¹⁷Jeroboam nupi cu a suak ih Tirzah ah a tlung. A inn a luh zawng ah an fapa cu a thi.

¹⁸Israel mi pawl in an ṭah ih an phum. BAWIPA in a siahhlawh profet Ahijah hnenih a simmi vekin a kim a si.

¹⁹Siangpahrang Jeroboam ih tuahmi, ral a donak le ram a uknak thu pawl cu Israel Siangpahrang Pawlih Thuanthu Cabu sungah an ngan ṭheh a si.

²⁰Jeroboam in kum kul hluanhnih sung siangpahrang a ṭuan. Cu hnuah a thi ih an phum. Cule a fapa Nadab in siangpahrang a run ṭuan.

²¹Solomon fapa Rehoboam[8] cu kum sawmli le kum khat a ti tikah Judah siangpahrang a cang ih, BAWIPA an biaknak dingah BAWIPA amah in Israel ram hmuahhmuah sungin a hrilmi Jerusalem khawpi ihsin kum hleisarih sung a uk. Rehoboam ih nu cu Ammon mi Naamah a si.

²²Judah mi pawl in BAWIPA ih parah sualnak an tuah ih an pipu pawl ih sualnak an tuahmi hmuahhmuah hnakin BAWIPA ih thinhengnak tam sawn an suahter.

²³Pathian biaknak hmun tampi an dawl; an biak dingah tlangpar le thingpi thuai ah lungserh an phun ih thingserh khal an phun.

²⁴Cuih khawzing biaknak hmun ahcun nunau siseh mipa siseh hlawhhlang an um ih cumi cu thildang hmuahhmuah hnakin fihnungza bik a si. Israel mi pawl Kanaan ram sung an luh laiah BAWIPA in Kanaan mi a dawihlo mi pawl in fihnungza le ningzakza thil an rak tuahmi pawl kha Judah mi pawl in an tuah ṭheh ve a si.

²⁵Rehoboam in siangpahrang a ṭuannak kum nga a tinak kumah Izipt ram siangpahrang Shishak in Jerusalem khua a do ih a neh.

²⁶Biakinn sung le siangpahrang inn sungih a ummi hlawnthil le thil mankhung pawl hmuahhmuah, Solomon ih a tuahmi sui ralphaw pawl tiangin a lak ṭheh.

²⁷Cuih an lakmi pawl ai ah siangpahrang Rehoboam in daar ralphaw a tuah ih cu pawl cu siangpahrang inn kiltu bawi pawl ih kutah a ret.

²⁸Siangpahrang bawipa Biakinn a feh tin in inn kiltu pawl in ralphaw cu an keng ih cuih hnuah inn kiltu umnak khaan ah an retsal ṭheu.

²⁹Siangpahrang Rehoboam in a tuahmi dangdang pawl cu Judah Siangpahrang Pawlih Thuanthu Cabu sungah kimten an ngan a si.

³⁰Kum hi hmuah sungah hin Rehoboam le Jeroboam cu cat loin an do aw ringring.

³¹Rehoboam cu a thi ih David khawpi siangpahrang pawl phumnak thlaan ah an phum. A nu cu Ammon mi Naamah a si. Cule a fapa Ahijah in siangpahrang a run ṭuan.