Read Falam Chin 1 SIANGPAHRANG 2 Bible Online

1 SIANGPAHRANG 2 - Falam Chin bible

1 SIANGPAHRANG 2

¹David cu a thihnak tikcu a nai thlang ih a fapa Solomon a ko ih thu a cah:

²“Kei cu ka thi thlang ding. Ka thih hnuah ralṭhazet le pacang bang in um awla,

³BAWIPA na Pathian ih thupekmi pawl cu tuah aw. Moses Daan sungih ngan vekin, BAWIPA ih Daan le thupekmi hmuahhmuah cu thlun awla, cuticun na thil tuahmi hmuahhmuah ah le na fehnak kipah na hlawh a tling ding.

⁴BAWIPA in ka hnenah, ‘Na tesinfa pawl in ka thupekmi an thinlung le an thazaang zate thawn an thlun a si ahcun Israel ram an uk ringring ding’ tiah thu i kam a si. A Daan le a thupekmi pawl na thlun a si ahcun BAWIPA in a thukamnak cu a kimter ding.

⁵“Cuih tlunah thil dang na theih dingih ka duhmi cu Joab ih i ti daan hi a si. Israel ralkap pawl hotu, Ner fapa Abner le Jether fapa Amasa cu Joab in a that a si. Ral an do laiih mi an thahmi phulak in ral um nawn lo hnuah an thisen a luanter. Mawhnak a nei lomi a thah ih, a taikhap le a kedam ah thisen a hnih ruangah, mimawh a si.

⁶Curuangah ruat ṭha awla, daitein tar thih ih a thih tiang cu na zuah lo pei.

⁷“Asinain Gilead mi Barzillai ih fapa pawl cu ṭhatein na zoh pei. Ziangahtile na u Absalom ṭih ih ka tlan laiah i zaangfahtu an si.

⁸“Cule Benjamin ram Bahurim khua ih Gera fapa Shimei khal na hngilh lo dingah ka duh. Mahanaim ka thlen ni ah nasa zetin i cam ciamco. Asinain Jordan Tiva ka thlen tikah i rak hmuak ih amah cu that lo dingah BAWIPA hmin saal in thu ka kamta a si.

⁹Sikhalsehla cuti men cun na luatter lo pei. Thuruat thiam na si ih that lo cun na zuah hrimhrim lo pei,” a ti.

¹⁰Cuih hnuah David cu a thi ih Jerusalem ah an phum.

¹¹Israel ram kum sawmli sung a uk. Hebron in kum sarih sung a uk ih Jerusalem in kum sawmthum le kum thum a uk.

¹²David ih ai ah a fapa Solomon siangpahrang a cang ih a ram cu hngetzet in a uk.

¹³Cule Adonijah cu Solomon nu Bathsheba hnenah a leng. Adonijah ih nu cu Haggith a si. Bathsheba in Adonijah hnen ah, “Thu ṭha in na ra leng maw?” tiah a sut. Adonijah in, “Asi, thuṭha in ka ra.

¹⁴Thil pakhat dil duhmi ka lo nei,” a ti. Bathsheba in, “Ziang so a si?” tiah a sut.

¹⁵Cutikah Adonijah in, “Siangpahrang cang zo ding ka si ih, Israel mi khal in siangpahrang a si ding, tiah in rak zum ti cu na thei. Asinain zumnak vekin thil a cang lo ih BAWIPA ih lungkimnak in ka nau Solomon sawn siangpahrang a cang.

¹⁶Cu a si ruangah thil pakhat ka lo dil duh ih i el hram hlah aw,” tiah a ti.

¹⁷Bathsheba in, “Ziang so a si? I sim hnik!” a ti. Adonijah in, “Shunem mi fala Abishag cu ka nupi dingah Siangpahrang Solomon i biak sak aw, nang cu a lo el lo ding tiah ka zum,” a ti.

¹⁸Cutikah Bathsheba in, “A tha! Siangpahrang ka lo ton sak ding,” tiah a ti.

¹⁹A tivek in Bathsheba cu a feh ih Adonijah ai-awh in siangpahrang a va tong. A nu a rat kha a hmuh tikah siangpahrang Solomon cu a ding ih a nu ih hmaiah cun upatnak in a lu a kun. Cuih hnuah a siangpahrang tokham ah a to ih, a nu cu a vorhlam ah tokham dang pakhat parah a to.

²⁰Cule a nu in, “Thil pakhat ka lo dil duh ih i el siang hlah aw,” a ti. “Ziang so a si, ka nu? Ka lo el lo ding,” a ti.

²¹A nu in, “Abishag hi na u Adonijah ih nupi ah coter aw,” tiah a ti.

²²Cutikah siangpahrang in, “Ziangah so Adonijah ih hrangah Abishag cu i dil? A hrangah siangpahrang tokham tla hi dil lawlawta he! Adonijah cu ka u a si ih puithiam Abiathar le Joab tla amah ih hnenah an ṭang a sisi!” tiah a ti.

²³Cule Solomon in,” Adonijah in himi i dil ruangah amah ih nunnak in a kuan pei. A nunnak in a kuan lo a si ahcun Pathian in keimah i that seh.

²⁴Ka pa David ih tokham parah BAWIPA in hngetzet in i toh zo. BAWIPA in a thukamnak a kimter ih uknak cu keimah le ka tesinfa pawl hnenah in pek zo a si. Curuangah a nungmi Pathian hmin saal in thukamnak ka tuah: Tuih sunah Adonijah cu a thi pei,” tiah a ti.

²⁵Curuangah Siangpahrang Solomon in Benaiah hnenah thu a pek ih, Benaiah cu a feh ih Adonijah a va that.

²⁶Cule Siangpahrang Solomon in puithiam Abiathar hnenah, “Na khua le na ram Anathoth ah tlung aw. Thi tlak na si naón ka pa David hnenih na um laiah BAWIPA ih Thukham retnak Kuang kiltu na rak si ih, ka pa ih harsatnak hmuahhmuah a tuarpitu na si ruangah atu ahcun ka lo that lo ding,” tiah a ti.

²⁷Solomon in Abiathar cu BAWIPA ih puithiam hna a ṭuannak ihsin a dawi ih, cuticun BAWIPA in Shiloh ah puithiam Eli le a tesinfa pawl thu a rak phuannak a kimter a si.

²⁸Cuih thu cu Joab in a rak thei. (Joab cu Absalom ṭantu a si lo naón Adonijah ṭantu a si.) Curuangah BAWIPA ih Puanthlam ah a tlan ih biakṭheng ki pawl cu a va pom.

²⁹Siangpahrang Solomon hnenah, Joab cu BAWIPA ih Puanthlam ah a tlan ih biakṭheng kiangah a um, ti thu a than tikah Solomon in Joab hnenah mi a thlah ih biakṭheng ih a tlannak thu an va sut. Joab in, “Solomon ka ṭih ruangah BAWIPA hnenah ka tlan a si,” tiah a ti. Cutikah Joab that dingin Solomon in Benaiah a thlah.

³⁰Benaiah cu BAWIPA ih Puanthlam ah a va feh in Joab hnenah, “Siangpahrang in ra suakseh a lo ti,” tiah a ti. Cutikah Joab in, “Ka suak lo ding. Hinah ka thi sawn ding,” a ti. Benaiah cu siangpahrang hnenah a va kir ih Joab ih ṭongmi cu a va sim.

³¹Cutikah Solomon in, “Joab ih ṭongmi vekin tuah aw. That aw la phum aw. Cuti cun Joab in mawhnak nei lo minung pahnih a thah ruangah keimah le ka tesinfa pawl cu mawhphurtu kan si nawn lo ding.

³²Ka pa David ih theih loin mi a thah ruangah BAWIPA in Joab parah phuba a la ding. Joab in amah hnakih a ṭha deuh mi minung pahnih, mawhnak nei lomi, Israel ralkap hotu Abner le Judah ralkap hotu Amasa a that a si.

³³A thahmi pawl ih thisen cu Joab le a tefa sin pawl ih parah kumkhua in a tla ding. Sikhalsehla siangpahrang tokham parih a totu David ih tesinfa pawl parah cun BAWIPA ih thlawsuahnak cu kumkhua in a thleng ding a si,” a ti.

³⁴Curuangah Benaiah cu BAWIPA ih Puanthlam ah a va feh ih Joab cu a that hnuah hramlakah amah ih inn ah a phum.

³⁵Cule siangpahrang in Joab ai ah Benaiah cu ralkap hotu bawi ah a tuah ih Abiathar ai ah Zadok kha puithiam ah a tuah.

³⁶Siangpahrang Solomon in Shimei a ko ih a hnenah, “Na hrangah Jerusalem ahhin inn sak aw. Hinah um awla hi khua ihsin khui hmanah feh hlah aw.

³⁷Na suak ih Kidron Tivate na lan a si ahcun na thi ding. Cutikah mawh phurtu cu nangmah na si ding,” tiah a ti.

³⁸Cutikah Shimei in, “A ṭha, Siangpahrang Bawipa; na sim vekin ka tuah ding,” tiah a ti. Cuticun Jerusalem ah reipi a um.

³⁹Sikhalsehla kum thum hnuah Shimei ih sal pahnih cu Gath siangpahrang, Maakah fapa Akhish hnenah an tlan. Gath ramah a sal pahnih an um ti Shimei in a theih tikah,

⁴⁰a laak cu a kung a dam ih a sal hawl dingah Gath siangpahrang Akhish hnenah a feh. A sal pawl cu a va hmu ih a kirpi hai.

⁴¹Shimei ih thil tuahmi cu Solomon in a theih tikah,

⁴²Shimei cu a ko ih a hnenah, “Jerusalem taan lo dingin thu ka lo kamter ih, na taan a si ahcun na thi ding, tiah ralrinnak fiangtein ka lo pek. Na lung a kim ih ka sim vekih thlun dingah i kamta a si lo maw?

⁴³Ziangah so na thukam mi na bal ih ka thupekmi cu na thlun lo?

⁴⁴Ka pa David parih thilsual na tuahmi hmuahhmuah na thei ṭheh a si. Hi ruangah hin BAWIPA in a lo hrem ding.

⁴⁵Sikhalsehla BAWIPA in kei cu i thlawsuah ding ih David uknak cu kumkhua in a hngetter ding,” tiah a ti.

⁴⁶Siangpahrang in thu a pek ih, Benaiah a feh ih Shimei cu a that. Solomon ih uknak cu a hnget sinsin.