Read Falam Chin 1 SIANGPAHRANG 22 Bible Online

1 SIANGPAHRANG 22 - Falam Chin bible

1 SIANGPAHRANG 22

¹Israel le Siria karlakah kum hnih sung ral a dai.

²Asinain a kum thumnak ah Judah siangpahrang Jehoshafat cu Israel siangpahrang Ahab tong dingah a feh.

³Cule Ahab in a kuthnuai bawi pawl hnenah, “Ziangah so Gilead ramih Ramoth khua cu Siria siangpahrang kutsung ihsin a lak kan tum lo? Kanmah ih ta a sisi!” a ti.

⁴Cun Jehoshafat hnenah, “Ramoth ka do ding ih i bawm pei maw?” tiah a sut. Jehoshafat in, “Ka lo bawm ding. Ka ralkap pawl le ka rang ralkap pawl khal an tiar aw ko.

⁵Asinain hmaisabik ah BAWIPA kan ron hnik pei,” tiah a ti.

⁶Curuangah Ahab in profet pawl a ko ih an zatein zali an ra. An hnenah, “Ramoth ka do pei maw?” tiah a sut. Annih in, “Do aw. BAWIPA in nehnak a lo pe ding,” tiah an ti.

⁷Asinain Jehoshafat in, “BAWIPA kan ron theinak dingah profet dang an um nawn lo maw?” tiah a sut.

⁸Ahab in, “A dang pakhat a um hrih. Amah cu Imlah fapa Mikaiah a si. Asinain anih cu ka hua. Ziangahtile ka hrangah thu ṭha a ṭong dah lo. Thusia lawnglawng a sim ṭheu,” a ti. Jehoshafat in, “Cuticun ṭong hlah aw,” a ti.

⁹Curuangah siangpahrang Ahab in zamrangte ih Mikaiah va ko dingah a zungih bawi pakhat a fial.

¹⁰Siangpahrang pahnih, Ahab le Jehoshafat cu an siangpahrang thuam hruk in Samaria khawpi kulhnak hauhruang kotka lengih fang rialnak hmunah siangpahrang tokham parah an to ih, an hmaiah cun profet pawl cu profet ṭong in an ṭong rero.

¹¹Anmah lakih profet pakhat, Khenaanah ih fapa Zedekiah in thir ki a tuah ih Ahab hnenah, “BAWIPA in, ‘Hi ki hin Siria pawl nan do ding ih an ci nan hmit thluh ding,’ a ti,” tiah a sim.

¹²Profet dang pawl khal in cuvek thotho in an sim ṭheh. “Ramoth khua do uhla nan neh ding, BAWIPA in nehnak a lo pe ding,” tiah an ti cio.

¹³A culaiah Mikaiah ko dingih thlahmi bawi in Mikaiah cu, “Profet dang pawl in kan siangpahrang ih neh ding thu lawng an sim a si. Nang khal cutiin sim ve aw,” tiah a forh.

¹⁴Asinain Mikaiah in, “BAWIPA ih hminin ka sim: BAWIPA ih sim ding i fialmi lawng ka sim ding a si,” tiah a ti.

¹⁵Mikaiah cu siangpahrang hmai ih a thlen tikah siangpahrang bawipa in, “Mikaiah, siangpahrang Jehoshafat le keimah in Ramoth khua kan do pei maw, do lo so, sim hnik?” tiah a ti. Mikaiah in, “Do aw he! Na neh ding. BAWIPA in nehnak a lo pe ding,” tiah a sawn.

¹⁶Asinain Ahab in, “BAWIPA hmin saal in ka hnenih thu na sim tikah thudik lawnglawng i sim aw, tiah voi ziangzat so ka lo ti ding?” tiah a kawk.

¹⁷Cutikah Mikaiah in, “Israel mi pawl cu khaaltu nei lo tuurual bangin tlang parah vakvai in an um ṭheh ka hmu. BAWIPA in, ‘Hi misenpi pawl hi hotu an nei lo; an inn ah tlung thluh hai seh,’ a ti,” tiah a sim.

¹⁸Cule Ahab in Jehoshafat hnenah, “Hi pa cu ka hrangah thuṭha a ṭong dah lo, ka lo ti tho lo maw? Thusia lawnglawng a sim ṭheu a si,” a ti.

¹⁹Mikaiah in a hun peh ih, “Atu BAWIPA ih ṭongkam rak ngai aw! BAWIPA cu vancung a Siangpahrang tokham parah to in a vancungmi pawl a kiang vorhlam le kehlam ah an din kha ka hmu.

²⁰Cule BAWIPA in, ‘Ahab cu Ramoth khua ah feh in thihnak a tonnak dingah zoso a vung bum ding?’ a ti. Vancungmi hrekkhat in thu pakhat an sim; a dang in thudang an sim.

²¹Netabik ah thlarau pakhat in BAWIPA cu a hei naih ih a hnenah, ‘Keimah ka vung bum pei,’ a ti. ‘Ziangtin so na bum ding?’ ti ih BAWIPA ih a sut tikah,

²²anih in, ‘Ka vung feh pei ih Ahab ih profet hmuahhmuah thuphan ka perter ṭheh ding,’ a ti. Cutikah BAWIPA in, ‘Vung feh awla vung bum aw. Na ti thei ngaingai ding,’ a ti,” tiah a ti.

²³Mikaiah in a hun peh bet ih, “A tivek in a si ngaingai hi! BAWIPA in na profet pawl na hnenah thuphan a perter ṭheh a si. BAWIPA amah rori in na parah siatsuahnak thleng dingin lai a rel zo a si,” tiah a ti.

²⁴Cutikah Zedekiah in Mikaiah cu a hun naih ih a hnakhang ah a beng ih, “Ziangtin so BAWIPA ih thlarau cu na hnen ṭong dingah ka hnen ihsin a ra ceer?” a ti.

²⁵Mikaiah in, “Inn dunglam khaan sungih na relh rero tikah cuih thu cu na thei leh ding,” a ti.

²⁶Cule siangpahrang Ahab in a kuthnuai bawi pakhat hnenah, “Mikaiah hi kai awla khawpi uktu Amon le ka fapa Joash hnenah hei hruai aw.

²⁷Va sim awla himdamte ih ka rakir sal hlanlo thawngah rak thla hai sehla sang le tidai rak pe hai seh,” tiah a ti.

²⁸Cutikah Mikaiah in, “Himdamteih na rakir a si ahcun keimah hmangin BAWIPA a ṭong lo a si ding. Mi hmuahhmuah in ka ṭong mi hi i theihpi uh,” tiah a ti.

²⁹Israel siangpahrang Ahab le Judah siangpahrang Jehoshafat cu Gilead ram Ramoth khua do dingah an suak.

³⁰Ahab in Jehoshafat hnenah, “Ral kan do tikah kei cu midang vekah ka tuah aw ding ih nang cu siangpahrang vekin na thuam-aw pei,” a ti. Cuticun Israel siangpahrang cu midang vekih tuah-aw in raldonak ahcun a feh.

³¹Siria siangpahrang in Israel siangpahrang siar lo a dang zohman do lo dingin a rangleng ralkap hotu sawmthum le pahnih pawl cu thu a pek.

³²Cule siangpahrang Jehoshafat an hmuh tikah Israel siangpahrang a si hmang tiah an ruat ih an do ciamco. Asinain Jehoshafat a au tikah,

³³Israel siangpahrang a si lo ti an thei ih an cawl.

³⁴Siria ralkap pakhat in batmi nei cuang leem loin a conkiang a hei sai meen ih a vanduainak ah siangpahrang Ahab cu daar ih tuahmi a ralthuam ih peh awknak ongte in a hei ngah. Cutikah Ahab cu, “In hriam ee!” tiah a au ih, a rangleng mawngtupa cu, “Zamrang in i tlanpi aw,” tiah thu a pek.

³⁵An do awknak a nasa ngaingai ih siangpahrang Ahab cu a rangleng parah do cop in Siria ralkap pawl ṭannak lam hoi in a um. An hriamnak hma ihsin a thi a luang ih a rangleng zial cu a thisen in a khat ṭheh. Cule zanlam ah a thi.

³⁶Ni a liam zawng ah Israel ralkap pawl hnenah, “Nan khua le nan ram ciarah tlung thluh uh,” tiah thu an than.

³⁷Cuticun siangpahrang Ahab cu a thi. A ruak cu Samaria khua ah an phur ih an phum.

³⁸A rangleng cu Samaria tili ah an tleuhfai ih BAWIPA ih a rak sim cia vekin a thisen cu uico in an liak. Cutawk cu hlawhhlang pawl tla ti an bual ṭheunak a si.

³⁹Siangpahrang Ahab ih tuahmi dang hmuahhmuah, vuiho ih ceimawimi a siangpahrang inn thu le khua a dinmi pawl ih thu cu Israel Siangpahrang Pawlih Thuanthu Cabu sungah kimten an ngan a si.

⁴⁰A thih tikah a fapa Ahaziah in siangpahrang a run ṭuan.

⁴¹Israel siangpahrang Ahab in ram a uknak kum li kum ah Asa ih fapa Jehoshafat cu Judah siangpahrang a cang.

⁴²Culai ah amah cu kum sawmthum le kum nga a si ih, Jerusalem ihsin kum kul hluannga sung ram a uk. A nu cu Shilhi ih fanu Azubah a si.

⁴³A pa Asa vekin BAWIPA ih mithmuh ah thil ṭha a tuah. Asinain khawvel pawl ih milem biaknak hmun pawl cu a siatbal lo; curuangah mi tampi in cuih biaknak hmun pawl cu raithawinak ah an hmang thotho.

⁴⁴Jehoshafat in Israel siangpahrang thawn remnak a tuah.

⁴⁵Jehoshafat ih tuahmi dang hmuahhmuah, a raldonak le a ralṭhatnak pawl thawn, Judah Siangpahrang Pawlih Thuanthu Cabu sungah an ngan.

⁴⁶A pa Asa san ihsin a tanglaimi, an khawzing biaknak ih hlawhhlang hna a ṭuantu pawl hmuahhmuah, nunau siseh mipa siseh, a that ṭheh hai a si.

⁴⁷Culai ah Edom ram cu uktu siangpahrang a nei lo. An ram uktu cu siangpahrang bawmtu lawng an si ih Judah siangpahrang ih hnaṭuan pekmi an si.

⁴⁸Siangpahrang Jehoshafat in Ofir ram ihsin sui leinak dingah tipi thuanthum feh thei tangphawlawng tampi a tuah. Asinain Ofir ah an feh thei lo, ziangahtile Ezion-geber ah an lawng pawl a siat.

⁴⁹Cule Israel siangpahrang Ahaziah in a milai tipi thuanthum khual tlawng pawl le Judah siangpahrang Jehoshafat ih milai tipi thuanthum khual tlawng pawl khual tlawng tlang dingah a sawm. Asinain Jehoshafat in a el.

⁵⁰Jehoshafat cu a thi ih David khawpi siangpahrang pawl phumnak hmun ah an phum. Cule a fapa Jehoram in siangpahrang a run ṭuan.

⁵¹Judah siangpahrang Jehoshafat in an ram a uknak kum hleisarih kumah Ahab ih fapa Ahaziah cu Israel siangpahrang a cang ih Samaria khawpi ihsin kum hnih sung a uk.

⁵²A pa Ahab, a nu Jezebel le siangpahrang Jeroboam ih sualnak lamzin a thlun ih BAWIPA ih parah a sual ve. Ahab le Jezebel le Jeroboam cu Israel mi sualnak sungih a hruailuttu an si.

⁵³A pa ih a rak tuah zo vekin Ahaziah khal in Baal khawzing a biak ih a hna a ṭuan; cuticun BAWIPA Israel ih Pathian cu a thin a hengter.