Read Falam Chin 1 SIANGPAHRANG 8 Bible Online

1 SIANGPAHRANG 8 - Falam Chin bible

1 SIANGPAHRANG 8

¹Siangpahrang Solomon in Israel hotu pawl, an phun ciarih hotu pawl le an innsang ciarih hotu pawl cu, BAWIPA Thukam Kuang kha David Khawpi, Zion khua ihsin biakinn ih keng dingah Jerusalem ah a kokhawm.

²Thla sarih thla, Ethanim[4] an timi thla sung, Puanthlam Puai tikcu ah an tongkhawm aw.

³An hotu pawl hmuahhmuah an thlen ṭheh tikah puithiam pawl in Thukam Kuang cu an lak ih,

⁴Levi pawl tla in an bawm ih, BAWIPA ih Puanthlam cu a sungih thilri pawl hmuahhmuah thawn Biakinn ah an phur.

⁵Siangpahrang Solomon le Israel misenpi pawl cu Thukam Kuang hmaiah an pumkhawm aw ih thawinak ah a siar ih siar cawk lo tuu le caw an that.

⁶Cule puithiam pawl in Thukam Kuang cu an lak ih biakinn sungta khaan Hmun Thianghlim Bik hmun, cherubim pawl ih thla hnuai ah an ret.

⁷A pharh-aw mi cherubim thla pawl cun Thukam Kuang le a zawnnak fung pawl cu an khuh ṭheh.

⁸A zawnnak fung pawl cu an sauzet ih, Hmun Thianghlim Bik sungta khaan hmai ih Biakinn khaanpi sungin a zim pawl cu hmuh a theih, asinain a leng cun hmuh a theih lo. A zawnnak fung pawl cu tuihsun tiang cutawk ah an um lai.

⁹Izipt ram ihsin Israel mi an suak ih BAWIPA in an hnenah thukam a tuahnak Sinai Tlang parih Moses in lungpher pahnih a rak ret mi siar lo Thukam Kuang sungah a dang zianghman a um lo.

¹⁰Puithiam pawl in Biakinn an taan ih an taan ṭheh vete in Biakinn sung cu mero a rung khat lohli.

¹¹Biakinn cu BAWIPA ih sunlawinak huham in a khah thluh ruangah puithiam pawl cu Biakinn ah kir tahratin an hna an ṭuan thei lo.

¹²Cule Solomon in, “Maw BAWIPA, nangmah in ni cu vanah khin na ret,[5] Asinain mero sahzet le thimzet sungih um na hril sawn;

¹³hittawk ah biakinn mawizet ka lo sak sak zo, Kumkhua na umnak hrangah,” tiah thla a cam.

¹⁴Cutawkih misenpi an din laiah siangpahrang Solomon cu anmah lam hoi in a ding ih an hrangah Pathian thlawsuah a dil.

¹⁵“Israel ih Pathian BAWIPA cu thangṭhat in um seh!. Ziangahtile ka pa David hnenah,

¹⁶‘Izipt ram ihsin ka minung Israel mi pawl ka hruaisuak ni ih thokin tuihsun tiang Israel ram pumpi sungah keimah in biaknak dingah Biakinn an saknak ding hmun le khawpi khui hmanah ka hril lo. Sikhalsehla ka minung pawl uktu dingah nangmah David ka lo hril,’ ti ih a thukam cu a kimter a si,” tiah a ti.

¹⁷Cuih tlunah Solomon in, “Ka pa David in Israel ih Pathian BAWIPA biaknak ah Biakinn sak a rak duhzet,

¹⁸asinain BAWIPA in ka pa David hnenah, ‘Na tumtahmi parah ka lung a awizet.

¹⁹Sikhalsehla Biakinn saktu cu nang na si lo ding, na fapa a si sawn ding,’ tiah a rak ti.

²⁰Atu-ah cuih a thutiam cu BAWIPA in a kimter ih ka pa David to-nak Israel siangpahrang ih tokham cu keimah in ka luah zo. Cule Israel ih Pathian BAWIPA biaknak ah Biakinn khal ka sak zo.

²¹BAWIPA in kan pi le kan pu pawl Izipt ram ihsin a rak suahpi lai ih thukamnak a rak tuahmi ngannak lungpher pahnih retnak kuang khal hi Biakinn sungah ka ret zo a si,” tiah a ti.

²²Cule misenpi hmuhhngan ah Solomon cu a feh ih biakṭheng hmaiah a va ding. A baan phar tahratin thla a cam.

²³“Maw BAWIPA, Israel ih Pathian, van ah siseh, leilung ah siseh, nangmah bangtuk Pathian khuihmanah an um lo. Na thukammi cu na kimter ringring ih thinlung takte ih a lo thluntu na minung pawl parah cun a cat dah lomi duhdawtnak na langter a si.

²⁴Ka pa David hnenih na kammi na kimter ih tuihsun ah cuih na thukamnak cu na tuahsuak zo.

²⁵Maw BAWIPA, Israel ih Pathian, ka pa David hnenah, ‘Ka thu na ngai vekin na tesinfa pawl in ka thu an ngai ve a si ahcun Israel uktu dingah na tesinfa pawl cu siangpahrang ah ka tuah ringring hai ding,’ tiih na thukamnak khal kimter hram aw.

²⁶Maw Israel ih Pathian BAWIPA, ka pa David na siahhlawh hnenih na thutiam cu run kimter hramhram aw, tiah ka lo dil a si.

²⁷“Asinain Pathian cu leilung parah a um thei ngaingai ding maw? Khawza vanrang hman hi na hrangah cun a fiak tuk a si. Curuangah hi Biakinn ka sakmi ahhin ziangtinso na tlem ding?

²⁸Sikhalsehla, BAWIPA ka Pathian, ka thlacamnak le ka lo dilnak i ngaihram awla, tuihsun ih ka aunak le ka lo ngennak cu i thei hram aw.

²⁹Nangmah kan lo biaknak dingah na hril mi hi hmun le hi Biakinn hi a sun a zan in kilveng hram aw. Hi Biakinn sungih ka thlacamnak hi run thei hram aw.

³⁰Keimah siseh, ka minung pawl siseh, hi hmunih thla kan cam tikah run ngai hram aw. Vancung ih na umnak ihsin in run ngai awla, in run thei in kan sualnak in ngaithiam hram aw.

³¹Mi pakhatkhat midang parah sual an puh ih, ‘Ka sual lo a si,’ tiih siatcam tuah dingah hi Biakinn ih biakṭheng ah an rak hruai a si ahcun,

³²Maw BAWIPA, an thu cu van ihsin run ngai awla na sal pawl an thu run ṭhen hram aw. Misual cu a sual vekin hrem awla a mawh lotu cu a mawh lo vekin run thlah hram aw.

³³“Na minung Israel pawl na parih an sual ruangah an ral pawl in an neh tikah sualsir in na hnenah an kir ih nangmah thangṭhat phah in sual ngaidam dingah hi Biakinn sungin zaangfah an lo dil a si ahcun,

³⁴vancung ihsin run thei hai aw. Na minung pawl ih sualnak cu ngaidam hram awla an pipu hnenih na pek ciami ramah hruaikir sal aw.

³⁵“Na minung pawl in na parah an sual ih ruah surter loin na hrem hai tikah, an sual an sir-aw ih hi Biakinn lam hoi in le na hmin ko in thla an cam ih nangmah an lo thangṭhat a si ahcun,

³⁶vancung ihsin run thei hram aw. Na siahhlawh pawl, Israel mi pawl sualnak cu ngaidam hram aw. An thlun ding lamzin dik hmuh awla kumkhua an neih dingih na pekmi an ram ahcun ruah surter hram aw.

³⁷“An ramah paampi a tlun tikah siseh, pulhnat a thlen tikah siseh, an lo rawl pawl thli hrang le kharbok tla in a siatsuah tikah siseh, na minung pawl ral in an ra siim tikah siseh, an parah natsia a si lole tlangrai a thlen tikah siseh,

³⁸na hnenih an thlacamnak cu run thei hram aw. Na minung Israel mi pakhatkhat thinhar riahsia ngaingai in hi Biakinn lam hoi tahratin baan phar ih thla a cam a si ahcun,

³⁹a thlacamnak run ngai hram aw. Na umnak vancung ihsin run ngai awla, a sualnak run ngaidam awla run bawm hram aw. Nangmah lawngin mi hmuahhmuah ih thinlung cu na thei. Mi pakhat fingfing parah an umdaan vekin tuah awla,

⁴⁰cuticun kan pipu pawl hnenih na rak pekmi ramih an um sung hmuahhmuah ah na minung pawl in nangmah cu an lo ṭihzah ding a si.

⁴¹“Lam hlatpi ih a ummi ramdangmi in na hmin thannak le na minung pawl hrangih thil maksak na tuahmi pawl an theih ih nangmah biak dingah le hi Biakinn ih thlacam dingah an rat a si ahcun,

⁴²

⁴³an thlacamnak cu ngai hram aw. Na umnak vancung ihsin run thei hram awla, an lo dilmi cu tuahsak hram aw. Cuticun na minung pawl bangtuk in hi leilung tlun mi hmuahhmuah in nangmah cu an lo thei ding ih an lo ṭihzah ding. Cule hi ka sakmi Biakinn ahhin nangmah cu biak ding na si ti an thei ding.

⁴⁴“Na minung pawl cu an ral pawl do dingih thu na pek tikah hi na hril zomi khawpi le na hrangih ka sak zomi hi Biakinn lam hoi in thla an cam a si ahcun,

⁴⁵an thlacamnak cu ngai hram aw. Vancung ihsin run thei awla an ral pawl ih parah nehnak pe hram aw.

⁴⁶“Milai ziang bangtuk an si khalle an sual ṭheh vekin, na minung pawl khal na parah an sual ih na thinheng in an ral pawl kut sungah na pek, sal ah an kai ih ram dangih an hruai tikah ziangvek ram hla a si khalle,

⁴⁷na minung pawl ih thlacamnak cu ngai hram aw. Cutawk ramah sual sir in na hnenah thla an cam ih an rak sualzia le an rak ṭhat lo zia na hnenih an phuan a si ahcun, Maw BAWIPA, zaangfah an lo dilnak cu ngai hram aw.

⁴⁸Cuih ram ihsin thungaite le thinlung takte in an sir-aw ih an pipu hnenih na pek zomi hi ram le, na hril zomi hi khawpi le, na hrangih ka sak zomi hi Biakinn lam hoi in thla an cam ahcun,

⁴⁹an thlacamnak run ngai hram aw. Na umnak vancung ihsin run thei awla run zaangfah hram aw.

⁵⁰An sualnak hmuahhmuah le an lo dodalnak hmuahhmuah ngaidam awla, an ral pawl khal an parah zaangfahnak thinlung neihter hram aw.

⁵¹An hrangah thir vaamternak somei bangtuk a si mi Izipt ram ihsin na suahter zomi pawl hi na minung le na ta an si ko.

⁵²“Maw BAWIPA Pathian, na minung Israel mi le an siangpahrang parah na mithmai ṭha langter ringring hram awla bomnak an lo dil tikah an lo dilnak cu theihsak hram aw.

⁵³Leilung tlun miphun hmuahhmuah lakin anmah cu na ta si dingah na hril zo ih, cuih thu cu na siahhlawh Moses hnen ihsin Izipt ram in kan pipu pawl na hruaisuak tikah na rak sim zo a si,” tiah thla a cam.

⁵⁴Solomon cu BAWIPA hnenih van lamah baan phar le, biakṭheng hmaiah khuk bil ih thla a camnak hmun ihsin a hung ding.

⁵⁵Cutawkih a khawm-awmi misenpi pawl hrangah ringzet in Pathian thluasuah a dil.

⁵⁶“Ka lo pe hai ding, tiah na kam cia vekin na minung pawl hnenih daihnak a petu BAWIPA cu thangṭhat uh. A siahhlawh Moses hnen ihsin famkim zetih a thukammi hmuahhmuah cu a kimter ṭheh a si.

⁵⁷BAWIPA kan Pathian cu kan pipu pawl hnenih a rak um vekin kan hnen khalah um hram seh. In dungtun in in taanta hram hlah seh.

⁵⁸Amah ih duhnak vekih kan nun theinak dingah le kan pipu pawl hnenih a rak pekmi daan le thukham pawl kan thlun theinak dingah a thu thlun theitu in siter hram seh.

⁵⁹BAWIPA kan Pathian in tuihsun ih ka thlacamnak le ka dilnak cu a kumkhua in ciing ringring hram seh. Israel mi pawl le an siangpahrang parah nitin ih an ṭulmi vekin zaangfahnak nei hram seh.

⁶⁰Cuticun leilung tlun miphun hmuahhmuah in BAWIPA lawng hi Pathian a si ih Pathian dang an um lo, ti an thei ding.

⁶¹Nannih amah ih minung pawl khal in tuihsun ih a thu nan ngai vek hin a daan le a thupekmi hmuahhmuah cu thlun uhla BAWIPA kan Pathian ih rintlak in um ringring uh,” tiah a ti.

⁶²Cule Siangpahrang Solomon le Israel misenpi pawl in cutawkah BAWIPA hnenah thawinak an pek.

⁶³Solomon in remnak thawinak ah cawcang thawng kul hluanhnih le tuu thawng zakhat le thawng kul a that. Cuticun Siangpahrang Solomon le Israel misenpi pawl in Biakinn cu BAWIPA Biaknak inn ah an hlan a si.

⁶⁴Cuih ni ah Biakinn hmai ih a ummi a laita bik tual khal Solomon in a hlan ih, cutawkah mei-ur thawinak, thlairawl thawinak le remnak thawinak ih sathau pawl tla a pek. Hi thawinak pawl cutawk tual laifangih a peknak cu Biakinn sungih daar biakṭheng cu hi thawinak pekmi hmuahhmuah hrangah a fatet tuk ruangah a si.

⁶⁵Cule Solomon le Israel mi hmuahhmuah, saklam Hamath Tlangkawn ihsin thlanglam Izipt ramri tiang, an zatein BAWIPA Pathian mithmuh ah Puanthlam Puai ni sarih sung an tuah.

⁶⁶Niriat ni ah Solomon in senpi pawl cu an inn ciarah a tlunter. An zate in Solomon cu an lawm ciamco. BAWIPA in a siahhlawh David le a minung Israel mi pawl parih malsawmnak a pek ruangah lungawi aipuang zetin an inn ciarah an tlung.