Read Falam Chin 1 SIANGPAHRANG 9 Bible Online

1 SIANGPAHRANG 9 - Falam Chin bible

1 SIANGPAHRANG 9

¹Siangpahrang Solomon in Biakinn le siangpahrang inn le sak a duh mi hmuahhmuah a sak ṭheh tikah,

²BAWIPA cu Gibeon khua a hnenih a rak lang vekin, a hnenah a lang sal.

³BAWIPA in a hnenah, “Na thlacamnak ka thei zo. Keimah biaknak hrangih na sakmi hi Biakinn cu ka thianghlimter ih hi innah ka hmin ka ret zo. Ka kilveng dingih kumkhua in ka hum ding a si.

⁴Na pa David in dikzet le felzetin ka hna a ṭuan vekin nang khal keimah i rian ih ka thupekmi le ka daan pekmi hmuahhmuah na thlun a si ahcun,

⁵na pa David hnenah, ‘Na tesinfa pawl in Israel an uk ringring ding,’ tiih ka rak kammi cu ka kimter ding.

⁶Asinain nangmah siseh na tesinfa pawl siseh keimah in thlun lo ih ka daan pekmi le ka thupekmi pawl nan bal ih khawzing dangdang nan rian ih nan biak a si ahcun,

⁷ka minung Israel mi pawl cu ka pek ciami ramsung ihsin ka ṭhio thluh hai ding a si. Keimah biaknak hrangih ka thianhlimtermi hi Biakinn hi ka hnong ding ih leilung tlun mi hmuahhmuah in Israel mi pawl cu an hmuhsuam ding ih an nautatzet ding.

⁸Hi Biakinn cu innrop ah a cang ding ih a kiangkap ih a fehtu hmuahhmuah an mang a bangzet ding ih, ‘Ziangah so hi ram le hi Biakinn parah BAWIPA in hi lawmmam in a tuah?’ tiah an ti rero ding.

⁹Cutikah midang pawl in, “Israel mi pawl in an pipu pawl Izipt ram ihsin a hruaisuaktu BAWIPA an Pathian an dungtun ih khawzing dangdang an rian ih an biak ruangah an parah BAWIPA in hi bangtuk siatsuahnak a thlenter a si,’ an ti ding,” tiah a ti.

¹⁰Solomon in Biakinn le a siangpahrang inn cu kum kul sung a sak ih a ṭheh.

¹¹A hnaṭuannak hrangih a ṭulmi sidar thing, farthing le sui pawl hmuahhmuah cu ṭai-ar Siangpahrang Hiram in a pek. Inn pawl a sak ṭheh hnuah Galilee peng ih khua khawkul cu Solomon in Hiram a pek.

¹²Cuih khua kul pawl zoh dingah Hiram cu a feh ih a zoh tikah a duh lem lo.

¹³Curuangah Solomon hnenah, “I pekmi khua pawl cu a hi-so-maw an si, unau pa!” tiah a ti. Curuangah cuih ram cu Kabul [6] tiah tuihsan tiangin an kota.

¹⁴Hiram in Solomon cu sui phurh za le phurh kul hluannga a rak kuat a si.

¹⁵Siangpahrang Solomon in hranhram hneek copih hnaṭuan a fialmi hnaṭuantu pawl in Biakinn le siangpahrang inn cu an sak. Khawpi in nisuahnak lamah leilung khahsilh tahrat in Millo a din suah ih khawpi kulhnak phar khal an dawl. Cule Hazor khua, Megiddo khua le Gezer khua pawl tla an din sal.

¹⁶Izipt ram siangpahrang in Gezer khua cu a rak do ih a rak lak. Khawsung mi pawl a that ih an khua cu mei in a ur ṭheh. Cule a fanu in Solomon a pasal tikah a pasal neihnak laksawng ah cuih khua cu a fanu a ṭhen.

¹⁷Cule Solomon in a din sal a si. Cuih tlunah hranhram ih hneekmi hnaṭuantu pawl hmangin Thlanglam Beth Horon,

¹⁸Baalath le Judah hramlak ih a ummi Tamar khua,

¹⁹a rawl retnak khua pawl le a rang le a rangleng retnak khua pawl, Jerusalem ah siseh, Lebanon ah siseh, a ukmi ramsung hmundang hmuahhmuah ah siseh, dinsal a duhmi khua pawl cu Solomon in a dinsal thluh a si.

²⁰Cutiih a hmanmi a hnaṭuantu pawl cu Israel mi pawl in Kanaan ram an lak tikah an rak thah lomi Kanaan mi pawl ih tesinfa pawl an si. Cumi pawl cu Amor mi, Hit mi, Periz mi, Hiv mi le Jebus mi an si ih an tesinfa pawl cu tuihsan tiangin sal an si lai hrih.

²²Solomon in Israel mi pawl cu salah a hmang lo. Annih cu a ralkap pawl, a kuthnuai bawi pawl, a ralkap hotu pawl, a leng mawng hotu pawl le a rang ralkap pawlah a hmang a si.

²³Solomon in a sakmi inn a phunphun a ṭuantu pawl hmuahhmuah hotu dingah hotu zanga le sawmnga a ret.

²⁴Izipt ram siangpahrang fanu, Solomon ih nupi cu David khawpi ihsin a suak ih Solomon in a hrangih a sakmi siangpahrang inn ah a ṭhawn; cuih hnuah Solomon in leilung khahsilh tahrat in Millo khawpi a sak.

²⁵Kum khatah voithum Solomon in mei-ur thawinak le remnak thawinak pawl BAWIPA hrangih a dawlmi biakṭheng parah a pek. BAWIPA hnenah rimhmui khal a ur ih a pek. Cuticun Solomon in Biakinn sak cu a ṭheh.

²⁶Siangpahrang Solomon in Eziongeber khua ah tangphawlawng tampi a tuah. Eziongeber cu Edom ram, Aqaba Tifinriat tikel ih um Elath khua kiangih a ummi khua a si.

²⁷Siangpahrang Hiram in a tangphawlawng ralkap thiamzet pawl cu Solomon ih tangphawlawng ralkap pawl thawn ṭuantlang dingah a kuat.

²⁸Cu pawl cu Ofir ramah an feh ih Solomon hrangah sui phurh zali hrawng an rak phurh a si.