Read Falam Chin 2 SIANGPAHRANG 1 Bible Online

2 SIANGPAHRANG 1 - Falam Chin bible

2 SIANGPAHRANG 1

¹Israel siangpahrang Ahab a thih hnuah Israel do dingin Moab mi pawl ral an tho.

²Israel siangpahrang Ahaziah cu Samaria ih a siangpahrang inn diphun par zaute ihsin a tla ih besezet in a tuahmawh aw. Curuangah a nun ding le nun lo ding theih duh ah, Ekron khua ih an khawzing Baalzebub thuron dingah Filistin ram Ekron khua ahcun mi a thlah.

³Asinain BAWIPA ih vancungmi pakhat in Tishbe khua ih profet Elijah cu siangpahrang Ahaziah ih mi thlahmi pawl tong dingah a fial ih an hnenah, “Ziangah so Ekron khua ih Baalzebub khawzing tong dingah nan feh? Israel ramah Pathian a um lo maw si?

⁴Nan siangpahrang hnenah, BAWIPA in ‘Na nung lo ding. Na tuahmawh awknak in na thi ding,’ a lo ti, tiah va sim uh,” tiih sim dingah a fial. BAWIPA ih thupekmi vekin Elijah in a tuah ih,

⁵curuangah siangpahrang ih mi thlahmi pawl cu an kir. Siangpahrang in, “Ziangah nan kir?” tiah a rak sut.

⁶Annih in, “Mi pakhat kan tong ih a lo thlahtu siangpahrang hnenah va kir uhla a hnenah BAWIPA in, ‘Zianghrangah Ekron ih Baalzebub khawzing tong dingin mi na thlah? Israel ramah Pathian a um lo maw si? Na nung lo ding na tuahmawh awknak in na thi ding,’ tiah va sim uh, in ti ruangah kan kir a si,” tiah an ti.

⁷Cutikah siangpahrang in, “Nan tonmi pa cu ziangvek milai so a si?” tiah a sut.

⁸Annih in, “Savun ih tuahmi korfualpi a hruk ih savun taikhap a khap a si,” an ti. Cutikah siangpahrang in, ‘Elijah a si cu!” tiah a hun ti.

⁹Cule siangpahrang in Elijah hruai dingah ralbawi pakhat le ralkap sawmnga a thlah. Elijah cu tlang parih a to laiah ralbawipa in a va hmu ih a hnenah, “Pathian ih milaipa, siangpahrang in rung seh a lo ti,” tiah a ti.

¹⁰Cutikah Elijah in, “Pathian ih milai ka si ahcun van ihsin meisa rung tla sehla nangmah le na milai pawl lo kaang thluhseh!” tiah a ti. A ti vete in van ihsin meisa a rung tla ih ralbawipa le a ralkap pawl cu an kaangthat thluh.

¹¹Siangpahrang in a dang ralbawi pakhat le ralkap sawmnga a thlah sal ih Elijah hnenah an va feh. Ralbawipa in, “Pathian ih milaipa, siangpahrang in zamrangte in rungseh a lo ti,” a ti.

¹²Cutikah Elijah in, “Pathian ih milai ka si ahcun van ihsin meisa rung tla sehla nangmah le na ralkap pawl lo kaang thluhseh!” a ti. A ti vete in van ihsin Pathian ih meisa a rung tla ih ralbawipa le a ralkap pawl cu an kangthat thluh.

¹³Siangpahrang in a dang ralbawi pakhat le ralkap sawmnga a thlah lala. Ralbawipa cu Elijah hnenah a hung feh ih Elijah hmaiah a khuk a bil ih, “Maw Pathian ih milaipa, keimah le ka milai pawl parah hin zaangfahnak nei hram awla kan nunnak cu in zuah hraam aw.

¹⁴Ka hlanih ralbawi pahnih le an ralkap pawl cu vanih meisa in a kaangthat thluh. Asinain kei cu i zaangfah hram aw,” tiah a dil.

¹⁵Cutikah BAWIPA ih vancungmi in Elijah hnenah, “Amah thawn vung feh aw. Zianghman ṭih duh hlah,” tiah a ti. Curuangah Elijah cu ralbawipa thawn siangpahrang hnenah an feh ih,

¹⁶a hnenah, “BAWIPA in ‘Israel ramih Pathian um lo bangin Ekron khua Baalzebub khawzing hnenih mi na thlah ruangah tuih na ihnak ihkhun khan na tho nawn lo ding. Na thi ding a si,’ a ti,” tiah a sim.

¹⁷Elijah hnen ih BAWIPA ih ṭongkam vekin Ahaziah cu a thi. Ahaziah cu fapa a neih lo ruangah a unau Joram in, Judah siangpahrang Jehoshafat ih fapa Jehoram ih siangpahrang a ṭuan kum hnihnak ah, Israel siangpahrang a ṭuan.

¹⁸Siangpahrang Ahaziah ih hnaṭuanmi hmuahhmuah cu Israel Siangpahrang Pawlih Thuanthu Cabu sungah ngan ṭheh a si.