Read Falam Chin 2 SIANGPAHRANG 13 Bible Online

2 SIANGPAHRANG 13 - Falam Chin bible

2 SIANGPAHRANG 13

¹Ahaziah fapa Joash cu Judah siangpahrang a ṭuan kum kul hluanthumnak ah Jehu fapa Jehoahaz Israel siangpahrang a cang ih Samaria in kum hleisarih sung a uk.

²A hlanih siangpahrang a ṭuantu, Israel mi pawl sualnak ih a hruailuttu siangpahrang Jeroboam bangtuk in BAWIPA parah sualnak a tuah ih a thilsual tuahmi cu a thlah thei dah lo.

³Curuangah BAWIPA cu Israel tlunah a thin a heng ih Siria siangpahrang Hazael le a fapa Benhadad in Israel cu voi tampi an neh.

⁴Cun Jehoahaz in BAWIPA hnenah thla a cam ih, Israel mi pawl Siria siangpahrang in siava tukih a hrem kha BAWIPA in a hmuh ruangah a thlacamnak cu a theih sak.

⁵BAWIPA in Israel mi hnenah hotu a pek ih cuih hotu cun Siria kut sungin a luatter hai ih a hlan bangtuk in Israel mi pawl cu hnangam in an um sal.

⁶Sikhalsehla siangpahrang Jeroboam in Israel a sualternak ih sualnak cu annih khal in tlansan loin an tuah rero thotho; khawzingnu Asherah ih lem cu Samaria ah a um lai ringring.

⁷Jehoahaz cun ralkap tampi a nei lo; Siria siangpahrang in a cihmit thluh ih fangcil caan ih leivut bangin a ke hnuai ih a pal beek ṭheh hai ruangah a neihmi zate cu rang ralkap sawmnga, rangleng pahra le ke ralkap thawnghra lawng an si.

⁸Jehoahaz hnaṭuanmi dangdang le ralṭha zetih a tuahmi pawl cu Israel Siangpahrang Pawlih Thuanthu Cabu sungah an ngan a si.

⁹A thi ih Samaria ah an phum. Cule a fapa Jehoash in a ai ah siangpahrang a ṭuan.

¹⁰Judah siangpahrang Joash in Judah ram a uk kum sawmthum le kum sarihnak ah Jehoahaz fapa Jehoash cu Israel siangpahrang a cang ih Samaria in kum hleiruk sung a uk.

¹¹Anih khal Israel a hruai sualtu siangpahrang Jeroboam ih sualnak cu a tuah ve ih BAWIPA ih parah a sual a si.

¹²Jehoash hnaṭuannak hmuahhmuah Judah siangpahrang Amaziah thawn an do awk laiah ralṭha zetih a donak pawl cu Israel Siangpahrang Pawlih Thuanthu Cabu sungah an ngan a si.

¹³Jehoash cu a thi ih Samaria khua, siangpahrang thlaan ah an phum. Cule a fapa Jeroboam pahnihnak in a ai ah siangpahrang a ṭuan.

¹⁴Profet Elisha cu besia zetin a na ih a thih zik zawng ah Israel siangpahrang Jehoash in a va veh. “Maw ka pa, maw ka pa; rangleng le rang ralkap bangin Israel hum theitu!” tiah ṭah phah in a ti.

¹⁵Cutikah Elisha in, “Li le thal pawl va la aw,” a ti. A tivek cun Jehoash in a lak ih,

¹⁶Elisha in “Sai aw,” a ti ih siangpahrang in a sai tum tikah Elisha in a kut cu siangpahrang ih kut parah a vun ret.

¹⁷Cule profet ih fial vekin siangpahrang cun Siria lamih a ummi sangkate a vun ong. “Na thal cu sai thlang aw,” tiah Elisha cun a ti. Siangpahrang in thal a vun sai vete in profet cun, “Nangmah hi BAWIPA ih thal na si ih nangmah hmangin Siria cu a neh ding. Siria pawl cu Afek an timi hmun ah na do ding ih na neh hai ding,” tiah a ti.

¹⁸Cun Elisha in siangpahrang cu, “Na thal dang pawl la awla leilung ah sai aw,” a ti. A tivek cun siangpahrang in leilung cu voi thum a sai.

¹⁹Cutikah Elisha cu a thin a heng ih, “Voi nga, voi ruk tluk sai cila Siria pawl na neh lanta ding naón! Atu cu voithum tiang lawng na neh ding a si,” tiah siangpahrang cu a ti.

²⁰Elisha cu a thi ih an phum. Kumtinte Moab mi, a burbur ih ummi damiah pawl in Israel ram cu an ram ṭheu.

²¹Voi khat cu mithi an phum laiah cubangtuk damiah bur khat an hmu. Mithi phumtu pawl in an miruak cu Elisha ih thlaan sungah an hlonta ih an tlan. Cule miruak le Elisha ih ruh pawl an dai awk vete in mithi cu a nungsal ih a hung ding.

²²Jehoahaz in Israel ram a uk sung hmuahhmuah ah Siria siangpahrang Hazael in Israel mi pawl cu siava zetin a hrem.

²³Sikhalsehla BAWIPA cu Israel parah zaangfahnak le lainatnak a nei ih an zawn a ruat; an siat thluh ding cu a siang lo; Abraham, Isaak le Jakob hnenih a thukamnak ruangah Israel mi pawl a bawm ringring. A minung pawl a hngilh dah lo.

²⁴Siria siangpahrang Hazael a thih tikah a fapa Benhadad siangpahrang a cang.

²⁵Cun Israel siangpahrang Jehoash in Benhadad cu voithum tiang a neh ih Jehoash ih pa Jehoahaz siangpahrang a si lai ih Benhadad in a rak lakmi khawpi pawl cu a long sal ṭheh a si.