Read Falam Chin 2 SIANGPAHRANG 21 Bible Online

2 SIANGPAHRANG 21 - Falam Chin bible

2 SIANGPAHRANG 21

¹Manasseh cu kum hleihnih a ti ah Judah siangpahrang a cang ih Jerusalem ihsin Judah ram kum sawmnga le kum nga sung a uk. A nu cu Hefzibah a si.

²Israel mi Kanaan ram an luh laiah BAWIPA ih a dawihlo mi miphun pawl ih fihnungza thiltuah daan pawl a thlun ruangah Manasseh cu BAWIPA ih parah a sual.

³Manasseh in a pa Hezekiah ih a siatbal thluh zomi khawzing an biaknak inn pawl cu a thar in a sak sal; Baal khawzing biaknak biakṭheng pawl a don ih Israel Siangpahrang Ahab ih a rak tuah zo bangin khawzingnu Asherah lem tla a tuah. Manasseh cun arsi pawl tla a biak.

⁴BAWIPA in amah biaknak hrangah a timi BAWIPA Biakinn sungah cun khawzing dang pawl biaknak hrangah biakṭheng pawl a dawl.

⁵BAWIPA Biakinn ih khaan pahnih sungah arsi pawl biaknak ah biakṭheng pahnih a dawl.

⁶Mei-ur thawinak hrangah a fapa tiangin a pek. Aizingnak le mitkher a tuah; kutṭial zohthiam pawl le tinzohthiam pawl a leeng. BAWIPA ih mithmuh ah a sualnak cu a siazet ih BAWIPA thin a hengter.

⁷BAWIPA ih Biakinn hmun thu ah BAWIPA in David le a fapa Solomon hnenah, “Jerusalem khawpiih hi Biakinn cu Israel miphun hleihnih pawl ih ram hmuahhmuah lakah keimah biaknak hrangih ka hril mi hmun a si.

⁸Israel mi pawl in ka thupekmi an ngai ih ka salpa Moses ih pekmi Daan cu kimten an thlun ṭheh a si ahcun an pupa hnenih ka rak pekmi hi ram ihsin zohman in an dawisuak hai lo ding,” tiah a rak ti.

⁹Sikhalsehla Judah mi pawl in BAWIPA ih thu cu an ngai lo. Kanaan ram an luh laiah BAWIPA ih dawihlo mi miphun pawl ih thilsual an tuahmi hnakin luar deuh in thilsual Manasseh in a tuahter hai a si.

¹⁰BAWIPA in a siahhlawh profet pawl hnenin a phuang ih,

¹¹“Kanaan mi pawl ih rak tuahmi sualnak hnakin thilsual deuh, fihnung tuksumza sualnak cu Manasseh in a tuah zo a si; a milem pawl biaknak in Judah cu a sualter zo a si.

¹²Curuangah Israel Pathian BAWIPA keimah in Jerusalem le Judah parah siatsuahnak nasa zetin ka thlenter ding ih a hmutu le a theitu pawl an mang a bang ṭheh ding.

¹³Samaria ka hrem vekin le Israel Siangpahrang Ahab le a tefa pawl ka hrem bangtuk in Jerusalem ka hrem ding. Jerusalem cu milai zohman um lo tiangin ka thenfai thluh ding - an hnawtfai mi pakan cu a khupih an ret vekin Jerusalem cu ka kholhfai thluh ding.

¹⁴A taangsunmi milai pawl khal ka dungtun ding ih an ral pawl kutah ka pe hai ding; an ral pawl le a dotu pawl in an ram cu an siim dingih an thilri pawl an ram thluh ding.

¹⁵Keimah ih miphun an si ko naón, Izipt ramih an suah ni thokin tuihsun tiang ka parah an sual ringring. Ka thin in hengter tuk thlang ruangah hi bangtuk thil cu an parah ka tuah ding a si,” tiah a ti.

¹⁶Manasseh in mawhnak zianghman a nei lomi minung pawl tamtuk a that ih Jerusalem khawpi lamzin ah thisen a luang ciamco. Himi cu Judah mi pawl milem biaknak ah a hruai hai ruangah BAWIPA parih misual a siternak hlei ah a tuahmi sualnak a si.

¹⁷Manasseh thil tuahnak dangdang le a sual tuahmi pawl cu Judah Siangpahrang Pawlih Thuanthu Cabu sungah an ngan a si.

¹⁸Manasseh cu a thi ih siangpahrang innih hmuan, Uzza hmuanah an phum. Cule a fapa Amon in a ai ah siangpahrang a run ṭuan.

¹⁹Amon cu kum kul hluanhnih a ti tikah Judah siangpahrang a ṭuan ih Jerusalem ihsin kum hnih sung a uk. A nu cu Jotbah khuami Haruz ih fanu Meshullemeth a si.

²⁰A pa Manasseh vekin BAWIPA ih mithmuh ah a sual;

²¹a pa ih thiltuahmi a cawng ih a pa ih biakmi milem pawl cu a bia ve.

²²A pu le a pa pawl ih Pathian BAWIPA cu a hnong ih a thupekmi a thlun duh lo.

²³A kuthnuai ih bawi pawl in Amon cu an phiar ih siangpahrang inn sungah an that.

²⁴Asinain Judah mi pawl in Amon thattu bawi pawl cu an that ih a ai ah a fapa Josiah siangpahrang ah an tuah.

²⁵Amon ih hnaṭuanmi dang pawl cu Judah Siangpahrang Thuanthu Cabu sungah an ngan a si.

²⁶Amon cu Uzza hmuan sungah an phum; cule a fapa Josiah in a ai ah siangpahrang a run ṭuan.