Read Falam Chin 2 SIANGPAHRANG 8 Bible Online

2 SIANGPAHRANG 8 - Falam Chin bible

2 SIANGPAHRANG 8

¹Shunem khua ih um, a fapa a nunter sal mi nunau hnenah, “Tho awla BAWIPA in a zonzon in kum sarih sung paam a tlunter ding ruangah, nangmah le na innsang pawl thawn hmun dangah feh in nan um le a ṭha ding” tiah Elisha in a ti.

²A thusimmi cu ngai in a innsang pawl thawn Filistin ram ah an feh ih cutawkah kum sarih sung an um.

³Kum sarih hnuah cuih nunau nu cu Israel ramah a ra kir sal ih a inn le a lo pawl ngah thei sal dingah siangpahrang dil ding a feh.

⁴Culai ah siangpahrang cu Elisha hnen-um pa Gehazi thawn thu an rak ruah aw rero. Elisha ih mangbangza tuahmi pawl cu siangpahrang in theih a duhzet.

⁵Elisha in nauhak pa a nunter salnak thu cu Gehazi in siangpahrang a sim rero laiah Shunem nunau nu cun siangpahrang hnenih a ngenmi thu cu a hun sim. Cutikah Gehazi in, “Maw siangpahrang bawipa, ka lo simmi nunau nu le Elisha ih a nunter salmi a fapa te cu hinah an ra,” tiah a ti.

⁶Siangpahrang in thu a suh vivo tikah Gehazi ih simmi cu thudik a si kha a thei vivo. Cule siangpahrang in a kuthnuai ih bawi pakhat a ko ih cuih nunau nu hnenah a hlanih a ta a rak si mi hmuahhmuah le a um lo kum sarih sung a lo sung suak rawl man hmuahhmuah tla pe thluh dingin thu a pek.

⁷Voikhat ah Elisha cu Damaskas khua-ah a feh. Culai ah Siria siangpahrang Benhadad cu a rak na ngelcel. Elisha cu Damaskas khua sungah a um, ti kha siangpahrang in a theih tikah,

⁸a kuthnuai bawi pakhat Hazael a ko ih, “Profet cu laksawng va pe awla ka nung ding maw, nung lo ding BAWIPA i sut sak hram seh,” tiah a ti.

⁹Curuangah Hazael cun Damaskas in a suakmi thilri a ṭha bik pawl a phunkim in a lak ih kalauk sawmli a phurhter ih Elisha hnenah cun a feh. Hazael in Elisha a ton tikah, “Na siahhlawh Siria siangpahrang Benhadad in a natnak in a dam ding maw, dam lo ding ti lo sut dingah i thlah a si,” tiah a ti.

¹⁰Cutikah Elisha in, “Nan siangpahrang bawipa cu a thi ding, tiah BAWIPA in ka hnenah a phuang zo a si; asinain va feh awla na nung ding, tiah va sim aw,” a ti.

¹¹Cule Elisha cun a mithmai sia in Hazael a meet ringring ih Hazael cu a um a nuam lo ih a hmai tiangin a sen ṭheh. Cun Elisha cu rinlopi in a ṭap.

¹²Cutikah Hazael in, “Bawipa, ziangah so na ṭah?” tiah a sut. Elisha in, “Israel mi parih thil siava na tuah dingmi hi ka hmuh ruangah ka ṭap a si. An ralhruang na ur ṭheh ding, an tlangval pawl ralnam in na cihmit thluh ding, an faate pawl leilung ah na vua that thluh ding ih nau keng nunau pawl na zaithlek thluh hai ding a si,” tiah a sawn.

¹³Cutikah Hazael cun, “Ziangtin so cutiih tuah theinak huham ka neih ding? Kei cu uico tluk fang ka sisi; zianghman ka si ual lo,” a ti. Elisha cun, “BAWIPA in i hmuh zo ih Siria ram siangpahrang na si ding,” a ti.

¹⁴Hazael cu a kir ih Benhadad cun, “Elisha in ziang a lo ti so?” tiah a rak sut. Cutikah Hazael in, “A nung ding, a lo ti,” tiah a sim.

¹⁵Asinain a thaisun ah Hazael in puan sahzet pakhat a lak ih tidai sungah a ciah hnuah siangpahrang ih hmai a tuam ih siangpahrang cu a that. Cuticun Hazael cu Siria siangpahrang ah a cang.

¹⁶Ahab fapa Joram cu Israel siangpahrang a sinak kum, kum nganak ah Jehoshafat ih fapa Jehoram cu,

¹⁷Judah siangpahrang ṭuan a thok. Siangpahrang a si tikah kum sawmthum le kum hnih a si ih Jerusalem khua in kum riat sung a uk.

¹⁸A nupi cu Ahab ih fanu a si ih Ahab innsung saang vekin Jehoram khal cun Israel siangpahrang pawl ih tuahmi thil ṭha lo a thlun ve. BAWIPA ih parah sualnak a tuah;

¹⁹asinain Judah ram cu BAWIPA in a siatsuah siang lo, ziangahtile a salpa David hnenah a tefa pawl in ram an uk ringring ding, ti ih thu a rak kam zo ruangah a si.

²⁰Jehoram siangpahrang a si laiah Judah do dingin Edom mi pawl ral an tho ih anmahte uk awknak an ngah.

²¹Cutikah Jehoram cu a rangleng pawl thawn Zair ah a feh ih cutawkah Edom ralkap pawl in an kulh ṭheh. Zanṭim ah Jehoram le a rangleng mawng hotu pawl cun anmah kulhtu Edom ralkap pawl cu an pahsuak ih an luat; an ralkap pawl cu an inn ciarah an tlan ṭheh.

²²Cuih thokin Edom cu Judah ram thawn peh-aw nawn loin mahte uk awknak a ngahta. Cuih ṭum thotho ah Libnah khawpi tla ral an tho a si.

²³Jehoram ih hnaṭuan mi dangdang pawl cu Judah Siangpahrang Pawlih Thuanthu Cabu timi sungah an ngan.

²⁴Cule Jehoram cu a thi ih Jerusalem David khawpi, siangpahrang thlaan ah an phum. Cuih hnuah a fapa Ahaziah in a ai ah siangpahrang a ṭuan.

²⁵Ahab ih fapa Joram in Israel siangpahrang a ṭuan ih kum hleihnihnak ah Jehoram ih fapa Ahaziah in,

²⁶Judah siangpahrang a ṭuan thok. Siangpahrang a ṭuan tikah amah cu kum kul hluanhnih a si. A ram cu Jerusalem in kum khat a uk. A nu Athaliah cu Israel siangpahrang Omri ih tunu a si.

²⁷Ahaziah cu ṭhit awknak in siangpahrang Ahab thawn an peh awk ruangah Ahab innsang vek thotho in BAWIPA ih parah sualnak a tuah a si.

²⁸Siangpahrang Ahaziah in Israel siangpahrang Joram a ṭanpi ih Siria siangpahrang Hazael cu an do. Gilead ram Ramoth ah an tawng-aw ih Joram cu hriamhma a pu.

²⁹Curuangah Jezreel khawpi ah dam duh ah a kir sal. Cutawkah Judah siangpahrang Ahaziah cun a vung veh.