Read Falam Chin 2 SIANGPAHRANG 9 Bible Online

2 SIANGPAHRANG 9 - Falam Chin bible

2 SIANGPAHRANG 9

¹Culai ah profet Elisha in profet pawl lakih mino pakhat a ko ih, “Na timtuah awla Gilead ram Ramoth ah va feh aw. Hi olif hriak thawl hi pai awla,

²cutawk na thlen tikah Nimshi ih tupa Jehu, Jehoshafat ih fapa va hawl aw. A rualpi pawl um lonak khaan pakhat ah ko awla,

³hi olif siti hi a lu ah toih in, ‘Israel siangpahrang dingah BAWIPA in hriak a lo culh a si,’ ti aw. Cule zamrangte in ra tlan aw,” tiah a ti.

⁴Cuticun tlangval no profet pakhat cu Ramoth ahcun a feh ih,

⁵bawi pawl an tonkhawm awk laifang a va tong. Cutikah profet in, “Bawipa ka lo tongta duh a si,” a ti. Jehu cun, “Zo sawn so in biak?” a ti. Cutikah profet cun, “Bawipa nangmah,” a ti.

⁶Cule an pahnih cun inn sungah an lut ih profet in olif hriak cu Jehu lu ah a toih ih, “BAWIPA, Israel ih Pathian in ‘Ka miphun Israel mi siangpahrang ah hriak ka lo culh a si.

⁷Ka profet pawl le ka hnaṭuantu pawl Jezebel in a thah ruangah amah ka hrem theinak dingah Ahab fapa, siangpahrang na bawipa cu na that pei.

⁸Ahab innsang le a tesinfa pawl cu an thih a ṭul a si; a no siseh, a tar siseh, a innsang ih mipa hmuahhmuah ka cihmit thluh hai ding.

⁹Nebat fapa siangpahrang Jeroboam innsang le Ahijah fapa siangpahrang Baasha innsang parih thil ka tuah vekin Ahab innsang par khalah ka tuah ve ding.

¹⁰Jezebel cu zohman in an phum lo ding; a ruak cu Jezreel ramah uico in an ei ding,’ a ti,” tiah a sim. Cumi a sim ṭheh vete in profet mino pa cu a suak ih a tlan.

¹¹Jehu cu a rualpi bawi pawl hnenah cun a va kir. Annih in, “Ziang thuhla so a um? Kha mi-aa pa cun ziangah so a lo ton duh?” tiah an sut. Jehu cun, “Ziangvek minung a si ti le ziang a duh ti cu nan thei ko a si lo maw?” a ti.

¹²Annih in, “Asilo, kan thei lo ngaingai sokhaw. A lo timi cu in sim hnik aw,” tiah an ti. Cutikah Jehu cun, “BAWIPA in ‘Israel siangpahrang ah hriak ka lo culh,’ a lo ti, i ti,” tiah a sim.

¹³Cuvete in a rualpi bawi pawl cun an korfual pawl an hliit ih Jehu dinnak dingah kailawn tlunta bik ah an phah ih tawtawrawt an tum hnuah, “Jehu cu siangpahrang a si,” tiah an aw neih patawp suah in an au ciamco.

¹⁴Cun Jehu in siangpahrang Joram cu a phiar. Siangpahrang Joram cu Siria siangpahrang Hazael a do ih Ramoth ah hriamhma a pu ih a hma dam tum in Jezreel ah a fehnak ihsin khui hmanah a suak hrih lo. Jehu in a rualpi bawi pawl hnenah cun, “Ka lam ṭangtu nan si ahcun Jezreel khuami pawl va sim ding ah zohman Ramoth khawpi ihsin nan suak lo pei,” tiah a ti.

¹⁶Cule a rangleng parah a to ih Jezreel lamah cun a suak. Joram cu a dam ngah hrih lo ih Judah siangpahrang Ahaziah in a rak veh laifang a si.

¹⁷Jezreel khua kotka kiltu in Jehu le a milai pawl an rat kha a hmu ih, “Rangpar in mi an ra ka hmu,” tiah a au. Joram cun, “Kanmah ih rualpi an si, ti le kan ral pawl an si, ti zingzoitu ah rang ralkap pakhat in hei thlah aw,” tiah thu a pek.

¹⁸An thlah mipa cun Jehu cu a tong ih a hnenah, “Rualpi ṭha in na ra maw, tiah siangpahrang in theih a duh,” a ti. Cutikah Jehu in, “Cumi cu nangih hnaṭuan a si lo, ka dungin i thlun sawn aw!” a ti. Kotka kiltu cun, “Kan thlah mipa cun a va tong naón a ra kirsal nawn lo,” a ti.

¹⁹Midang an thlah sal ih a hmaisa vek thotho in Jehu cu a va sut ve. Jehu cun, “Cumi cu nangih hnaṭuan a si lo; ka dungin i thlun sawn aw!” a ti.

²⁰Cule kotka kiltupa cun, “Kan thlah mipa in a va tong naón a ra kir nawn ve lo. An hotu pa in a rangleng cu thli bangin a zamter a si, Jehu a va bang so!” tiah a ti lala.

²¹Cuvete in Joram cun, “Ka rangleng rak keng zaang uh!” tiah thu a pek. An rak keng ih Joram le siangpahrang Ahaziah cu anmah ih rangleng veve in Jehu tong dingah an suak. An feh ih Naboth hmuan ah Jehu cu an tong.

²²Cutikah Joram in, “Thu ṭha in na ra maw?” tiah Jehu cu a sut. Jehu cun, “Na nu Jezebel ih thokmi milem biaknak le polsia leennak in kan ram a khah sungah cun ziang thuṭha so a um thei ding?” tiah a sawn.

²³Cuvete in Joram cu dunglam ah a her ih tlan phah in, “In phiar a sihi, Ahaziah!” tiah a au.

²⁴Cutikah Jehu cun a li le thal a suah ih a tha neih patawp in a nawp ih Joram cu a zaang ah a hei sai ih a thal in a lung a hei ngah. Joram cu a rangleng sungah cun a sawn ih a thi.

²⁵Jehu in amah bawmtu Bidkar hnenah, “A ruak khi la awla Naboth hmuan ah vun hlon aw. Joram ih pa Ahab dung ka thlun laiah nangmah thawn rangpar in hi hrawngah kan feh tlang ih BAWIPA in Ahab dodalnak a ṭong ih,

²⁶‘Mizan ah Naboth le a fapa pawl an that ih an thisen ka hmu a si. Hi hmun thotho ahhin an phu ka la ding, tiah ka lo kam a si,’ a ti kha na ciing lai a si lo maw! Curuangah BAWIPA ih sim ciami vekin Joram ruak cu la awla Naboth hmuan ah vun hlon aw,” tiah thu a pek.

²⁷Cumi cu siangpahrang Ahaziah in a hmuh tikah a rangleng in Beth Haggan khua lamah a tlan; a dungin Jehu in a dawi. “Anih khal that uh!” tiah Jehu in a ralkap pawl cu thu a pek; Ahaziah cu Ibleam khua kiang, Gur lamzin ih a rangleng thawn a tlan laiah an hriam. Asinain Megiddo khawpi cu a thleng thei ih cutawk khua ahcun a thi.

²⁸A ruak cu a kuthnuai ih bawi pawl in rangleng in Jerusalem ah an phur ih Jerusalem David khawpi, siangpahrang thlaan ah an phum.

²⁹Ahaziah cu Ahab ih fapa Joram ih Israel siangpahrang a can kum hleikhatnak ah Judah siangpahrang a cang.

³⁰Cun Jehu cu Jezreel khua a thleng. Jezebel in thuhla cu a thei thluh ih a mittlang a dumter, a sam a tuah ih siangpahrang inn ih sangkate in a hnuai ih lamzin hrawng a cuan.

³¹Jehu cu khawpi kotka in a vung lut ih Jezebel cun, “Maw Zimri![3] maw mithat pa, hinah ziangso na tuah?” tiah a vun auh.

³²Cutikah Jehu cun a hun zoh ih, “Ka lamah zoso a ṭang?” tiah a au. Siangpahrang inn ih bawi pahnih thum in sangkate in an vun zoh;

³³cule Jehu in, “Kha nu kha run hlon uh!” tiah a hun ti. Jezebel cu an vun hlon ih a thisen in phar pawl le an rang pawl cu a ṭeh ṭheh. A ruak par cun Jehu in a rangleng cu a hei mawng ih,

³⁴siangpahrang inn ah lut in rawl a ei. Cuih hnu lawngah, “Kha nunau sualral kha hei sar uhla hei phum uh, siangpahrang fanu a rak si awk hek!” tiah a ti.

³⁵A ruak sar dingah mi hrekkhat an feh ih an zoh tikah a luruh, a keruh le a baanruh lawng an hmu.

³⁶Cumi cu Jehu an va sim tikah anih in, “Hitiin a cang ding, tiah BAWIPA in a rak sim ciami a si ko; a salpa profet Elijah hnenin ‘Jezebel ih sa cu Jezreel ram sungah uico in an ei ding.

³⁷A ruak cu eek bangin an ṭhekdarh ding ih zohman in Jezebel a si ti an theithiam lo ding,’ a rak ti a si,” tiah a ti.