Read Falam Chin 1 SANSIARNAK 12 Bible Online

1 SANSIARNAK 12 - Falam Chin bible

1 SANSIARNAK 12

¹Israel siangpahrang Saul, Kish ih fapa in a mithmuh ah David um lo dingin a dawihlo hnuah David cu Ziklag ah a um. Cutawkah mi tampi a hnenah an ra ih an um ve. Annih pawl cu raldo ṭhangmi le rinsantlak zetzet ralkap lawnglawng an si ih,

²Siangpahrang Saul vekin Benjamin miphun an si. Li le conkiang siseh, lungherhden siseh, an duhduh in keh le vorh ih sai le denthiam thiam an si.

³An hotu pawl cu Gibeah ihsin Shemaah ih fapa Ahiezer le Joash an si. An ralkap pawl cu a tanglam vekin an si: Azmaveth ih fapa Jeziel le Pelet, Anathoth ihsin Berakah le Jehu,

⁴Ralkap hminthangzet le “Sawmthum Pawl,” sungih hotu pakhat a si mi, Gibeon ihsin Ishmaiah, Gederah ihsin Jeremiah, Jahaziel, Johanan le Jozabad;

⁵Harif ihsin Eluzai, Jerimoth, Bealiah, Shemariah le Shefatiah;

⁶Korah hrin in Elkanah, Isshiah, Azarel, Joezer le Jashobeam;

⁷Gedor ihsin Jeroham ih fapa Joelah le Zebadiah.

⁸Nelrawn ah ralhruang kulhmi hmunih David a um laiah Gad mi ralkap hminthang pawl ra in a hnenah an um. Anmah cu raldo ṭhangtu an si ih phaw le fei hmannak lamah cun an thiam ngaingai; an mithmai cu zoh tikah kiosa bangin ṭihnungza an si ih an zam a ṭhatzia cu tlangpar zukneng vek an si.

⁹Anmah lakih hotu bik ihsin nautabik tiang a sangsang in hipawl hi an si: Ezer, Obadiah, Eliab, Mishmannah, Jeremiah, Attai, Eliel, Johanan, Elzabad, Jeremiah, le Makbannai an si.

¹⁴Hi Gad mi pawl hi a hrek cu ralbawi upa an si ih ralkap thawngkhat hotu an si; a hrek cu ralbawi nauta deuh an si ih zakhat hotu an si.

¹⁵Kum khat sungih thla hmaisa bik thla, Jordan Tiva ti a lian ih phai a hrut laifangah tiva cu an tan ih tiva ihsin nisuahnak lam siseh, nitlaknak lam siseh, a rak ummi minung pawl cu suk le so ah an dawihlo thluh.

¹⁶Nikhat ah Benjamin le Judah hrin in milai hrekkhat cu David umnak ruh-kulh sungah cun an va thleng.

¹⁷David cun a rak hmuak hai ih an hnenah, “Keimah bawm dingah rualpi ṭha in nan rat a si ahcun kan hnenah ra uh. Asinain ka ral pawl hnenih zuar tum in nan rat a si ahcun, nanmah tuahmawh ding cu ka tum dah lo naón, nan tummi cu kan pupa ih Pathian in a hmu ding ih a lo cawh ding a si,” tiah a ti.

¹⁸Cutikah, “Sawmthum Pawl,” sungah hotu a rung cang lehmi Amasai parah thlarau a rung thleng ih anih in: “Maw David, na minung kan si; Maw Jesse fapa, nangmah ih lam ṭang kan si. Na parah daihnak umseh, A lo bawmtu hnenah hnangamnak umseh, Pathian na hnenah a um,” a ti. Cule David in annih cu amah ih minung ah a tuah ih a ralkap sungah hotu ah a ret hai.

¹⁹David le Filistin mi pawl cu siangpahrang Saul do dingih an feh laiah Manasseh hrin sungin ralkap hrekkhat pawl cu David hnenah an ra. David in Filistin mi a bawm a si lo; an feh tlang hnuah Filistin lal pawl in a bawipa a rak si dahmi Saul hnenah in zuar pang ding ti an phan ruangah David cu Ziklag ah an kirter a si.

²⁰Ziklag ih a kir zawng ah Manasseh hrin a hnenih a rami ralkap pawl cu: Adnah, Jozabad, Jediael, Mikhael, Jozabad, Elihu le Zillethai an si. Manasseh ramih an um laiah cun ralkap thawngkhat hotu ciar an si.

²¹Ralkap hminthang zetzet an si ruangah David ralkap pawl hotu bawi ah an cang. Neta lamah cun Israel ralkap sungah ralbawi an si.

²²Nitinte in David hnenah midang an ra vivo ih a rei hlanah David ralkap cu an tam ih an cak ngaingai.

²³BAWIPA thutiamnak vekin David cu Saul ai-ih siangpahrang cangter dingin raldo ṭhang ralkap tampi cu Hebron ah David hnenah cun an ra ciamco. A ra mi pawl cu a tanglam vekin an si:

²⁴Judah hrin in ralthuam a keng fetfet mi thawngruk le zariat; phaw le feipi an keng ciar;

²⁵Simeon hrin in raldo zir cia ralkap thawngsarih le zakhat;

²⁶Levi hrin in ralkap thawngli le zaruk;

²⁷Aaron tesinfa pawl hotu Jehoiada a thluntu ralkap thawngthum le zasarih;

²⁸Raldo thiam mino Zadok ih sungkhat minung kul hluanhnih; anmah cu hotu hlir an si;

²⁹Benjamin hrin in ralkap thawng thum; Saul cu Benjamin hrin a si hrangah Benjamin mi tam sawn in cuih sun tiang Saul an ṭan.

³⁰Efraim hrin in, an hrin sungih ralkap hminthang, thawng kul le zariat;

³¹Nitlaknak lam Manasseh in, David siangpahrang cangtertu ding ih hrilmi pawl, minung thawng hleiriat;

³²Issakhar hrin in hotu zahnih le an kuthnuai ih ralkap ciar thawn; himi pawl cu Israel hrangah ziang kan tuah ah a ṭha bik tile ziangtikah tuah ding a si, ti a theitu pawl an si.

³³Zebulun hrin in raldo hiarzet le rinsan tlakzet, ziangvek hriamnam khal a hmangthiamtu ralkap thawng sawmnga;

³⁴Naftali hrin in phaw le feipi thawn a thuam awmi ralkap bawi thawngkhat le ralkap thawng sawmthum le thawng sarih;

³⁵Dan hrin in raldo zir cia ralkap thawng kul hluanriat le zaruk;

³⁶Asher hrin in raldo zir cia ralkap thawng sawmli;

³⁷Jordan Tiva in nisuahnak lamih ummi Reuben, Gad le Nisuahnak lam Manasseh hrin pawl in hriamnam a phunphun hmangthiam ko ih zirh ciami ralkap thawng za le thawng kul.

³⁸Ralkap hizat cu raldo dingin an timtuah cia ṭheh in Hebron ah an feh; an tumtahmi cu David kha Israel siangpahrang canter ding lawnglawng a si. Israel mi dangdang khal cubangtuk tumtahnak nei in an um ṭheh.

³⁹Ramsung minung pawl ih rak tawlrel sak ciami ti le rawl, in le ei in cutawkah David thawn ni thum sung an umtlang.

⁴⁰Saklampi ih a ummi Issakhar, Zebulun le Naftali hrin pawl tiangin laak, kalauk, rang le caw pawl in sangphut, theipi sangrawh, sabit caar, sabitti le olif hriak, pawl an run phur ciamco. An ei dingah caw le tuu tla an keng. Hitiih an ken ciamco cu an ram pumpi in lungawinak an neihzia a langnak a si.