Read Falam Chin 1 SANSIARNAK 14 Bible Online

1 SANSIARNAK 14 - Falam Chin bible

1 SANSIARNAK 14

¹Ṭaiar siangpahrang Hiram in David hnenah palai a thlah ih siangpahrang inn saknak hrangah sidar thing pawl, lung sertu pawl le zungthiam pawl tla a kuat.

²BAWIPA in Israel siangpahrang ah i tuah zo ih Amah ih minung pawl ruangah ka uknak cu a ṭhangso a si, ti cu David in a thei.

³Jerusalem khua ahcun David in nupi tampi a ṭhi ih fapa le fanu tampi a nei.

⁴Jerusalem ih a hrinmi a fapa pawl ih hmin cu: Shammua, Shobab, Nathan, Solomon,

⁵Ibhar, Elishua, Elpelet,

⁶Nogah, Nefeg, Jafia,

⁷Elishamma, Beeliada le Elifelet an si.

⁸Filistin mi pawl in Israel ram pumpi tlunah David cu siangpahrang a si zo, ti an theih tikah kai dingin an ralkap pawl an feh. Cumi cu David in a theih tikah Filistin ralkap do dingin a pok.

⁹Filistin pawl cu Refaim phairawn an thleng ih cuih hrawng mi pawl an ram ciamco.

¹⁰David in BAWIPA hnenah, “Filistin mi pawl hi ka do ding maw? Ka neh hai ding maw?” tiah a sut. BAWIPA in, “Do aw, na neh ding,” a ti.

¹¹Curuangah David in Filistin mi pawl cu Baal Perazim ah a do ih a neh. Cutikah David in, “Ral pawl nehsuak dingah BAWIPA in tilian bangin i hmang a si,” a ti. Curuangah cuih hmun cu Baal Perazim [16] tiah an ko.

¹²Cutawkah Filistin mi pawl in an milem pawl tla an tlansan thluh ih cupawl cu ur dingah David in thu a pek ih an ur ṭheh.

¹³A rei hlanah phairawn ih ummi pawl kha Filistin mi pawl in an ra ram sal lala.

¹⁴David in BAWIPA a sut lala ih BAWIPA in, “Hitawk lam cun do hlah aw; heel awla khatlam in balsam theikung pawl umnak kiangin do aw.

¹⁵Cuih theikung tlunih mi feh thawm vek na theih tikah do aw; ziangahtile Filistin ralkap nehtu dingah na hmaiah Keimah ka feh ding,” a ti.

¹⁶David cun Pathian ih thupekmi vekin a tuah ih Filistin ral pawl cu Gibeon in Gezer thleng tiang a dawihlo.

¹⁷David ih hmin cu khuazakip ah a thang ih BAWIPA ih ruangah miphun hmuahhmuah in amah cu an ṭih.