Read Falam Chin 1 SANSIARNAK 15 Bible Online

1 SANSIARNAK 15 - Falam Chin bible

1 SANSIARNAK 15

¹David in amah ih hrangah Jerusalem ah inn tampi a sak. Pathian Thukam Kuang hrangah hmun pakhat a zuah ih cutawkah puanthlam a sak.

²Cule David in, “Levi mi pawl cu Thukham Kuang phurtu dingah le amah ih hnaṭuantu dingah Pathian ih hrilmi an si ruangah anmah lawng in Pathian ih Thukam Kuang cu an phur ding,” tiah a ti.

³Puanthlam a sakmi sungih Thukam Kuang ret dingah Israel mi pawl cu David in Jerusalem ah a kokhawm ṭheh.

⁴Cuih hnuah Levi mi pawl le Aaron tesinfa pawl a ko.

⁵Kohath hrin Levi mi sung in Uriel a ra ih a hrinpi minung za le kul hotu a si.

⁶Merari hrin in Asaiah a ra ih a hrinpi zahnih le kul hotu a si.

⁷Gershom hrin in Joel a ra ih a hrinpi za le sawmthum hotu a si.

⁸Elizafan hrin in Shemaiah a ra ih a hrinpi zahnih hotu a si.

⁹Hebron hrin in Eliel a ra ih a hrinpi minung sawmriat hotu a si.

¹⁰Uzziel hrin in Amminadab a ra ih a hrinpi minung za le hleihnih hotu a si.

¹¹Cun David in puithiam Zadok, Abiathar le Levi mi paruk Uriel, Asaiah, Joel, Shemaiah, Eliel, le Amminadab pawl a ko ih,

¹²an hnenah, “Nanmah hi Levi hrin pawl ih hotu cu nan si. Ka sak ciami inn sungih BAWIPA, Israel Pathian ih Thukam Kuang nan run ret theinak dingah nanmah le nan Levi hrinpi pawl cu tithiangfai aw uh.

¹³Hitiih Thukam Kuang phurhnak ih nan tel hi a hmaisa bik a si lo; BAWIPA lungkim zawng in kan biak lo ruangah BAWIPA kan Pathian in in hrem a si kha,” tiah a ti.

¹⁴Cule BAWIPA, Israel ih Pathian ih Thukam Kuang la dingin puithiam pawl le Levi mi pawl cu an tithiangfai awter.

¹⁵Levi mi pawl in Thukam Kuang cu an liangah laang in an zawn ih BAWIPA in Moses hnenih thu a pek vekin an tuah.

¹⁶David in Levi mi hotu pawl hnenah an unau Levi mi pawl cu hla satu, ṭingṭang tumtu le darsumsel pawl tumtu tiah ṭhen dingin thu a pek.

¹⁷Hla saktu pawl sungin Joel fapa Heman, a sungkhat Berekhiah ih fapa Asaf le Merari hrin in Kushaiah ih fapa Ethan cu darsumsel tumtu dingah an hril. Anmah bawmtu dingah a hnuailam Levi mi pawl cu ṭingṭang aw-feem tumtu dingah an hril: Zekhariah, Jaaziel, Shemiramoth, Jehiel, Unni, Eliab, Maaseiah le Benaiah. Cun ṭingṭang aw-pawr tumtu dingah a hnuailam Levi mi pawl cu an hril: Mattithiah, Elifelehu, Mikneiah, Azaziah le Biakinn kilvengtu Obed Edom le Jeiel tla an si.

²²Levi mi awn-mawi tumtu pawl hotu dingah hla thiamzetmi Khenaniah an hril;

²³Thukam Kuang kiltu dingah Berekhiah le Elkanah an hril.

²⁴Thukam Kuang hmai ih tawtawrawt tumtu dingah puithiam Shebaniah, Joshafat, Nethanel, Amasai, Zekhariah, Benaiah le Eliezer pawl an hril. Obed Edom le Jehiah khal Thukam Kuang retnak sangka kiltu an si ve.

²⁵David, Israel hruaitu pawl le ralkap hotu ralbawi pawl cu Thukam Kuang la dingin Obed Edom inn ahcun an feh ih lungawinak puai tumpi an tuah.

²⁶Pathian ih bomnak Thukam Kuang phurtu Levi mi pawl ih an co tengtengnak dingah cawcang pasarih le tuu pasarih that in thawinak an tuah.

²⁷David le awn-mawi tumtu pawl, an hla hotu Khenaniah le Thukam Kuang phurtu Levi mi pawl cu puan mawi le puan mankhung an sin ciar. Cuih tlunah David cun puithiam angki ṭaangthlaih a hruk.

²⁸Cuticun Israel mi hmuahhmuah in Thukam Kuang cu an thlun ih lungawi in an au phah ih tawtawrawt, tuuki, darsumsel le ṭingṭang tum phah in Jerusalem ah an fehpi.

²⁹Thukam Kuang cu khawpi sungih an luhpi tikah Saul ih fanu Mikhal in tukvirh in a hei zoh ih siangpahrang David khir phah rero ih a laam kha a hmuh tikah a mitkem in a nautat ngaingai.