Read Falam Chin 1 SANSIARNAK 22 Bible Online

1 SANSIARNAK 22 - Falam Chin bible

1 SANSIARNAK 22

¹Cule David in, “hittawk ah hin BAWIPA ih Biakinn cu a um ding. hittawk ah hin Israel mi pawl in mei-ur thawinak an pe ding,” a ti.

²Siangpahrang David in Israel ram sungih a ummi ramdangmi hmuahhmuah a kokhawm ih hna a ṭuanter hai. Cule serthiam pawl in Biakinn saknak ah lungto an ser.

³Tlawngkhen le sangka kaihnak kopza tampi a pek ih dar tla cu zohman ih a cuai khai thei cawk lo tiangin a pek hai.

⁴Ṭai-ar le Sidon mi pawl in sidar thing an run pek.

⁵David cun, “Ka fapa Solomon ih a sak dingmi BAWIPA ih Biakinn cu a ṭha taktak mi le leilung tlunih hminthang a si a ṭul. Solomon cu a no hrih ih zianghman a tithiam hrih lo ruangah keimah in ziang hmuahhmuah ka timtuahta thluh a ṭul a si,” a ti. Curuangah David in a nunsungah thilri tampi a khawl a si.

⁶David in a fapa Solomon cu a ko ih BAWIPA, Israel ih Pathian Biakinn sak dingah thu a pek.

⁷A hnenah, “Ka fapa, BAWIPA ka Pathian hminthannak ah biakinn sak ka duh.

⁸Sikhalsehla BAWIPA in, ‘Ral tamtuk na do ih mi tamtuk na that zo a si,’ i ti. Thisen tamtuk ka luanter zo ruangah a hrangih biakinn sak ding cu i sen lo a si.

⁹Asinain thu i tiam ih, ‘Fapa na nei ding ih a ral pawl kut in ka humhim ding ruangah daihnak thawn ram a uk ding. Amah ih hmin cu Solomon[18] a si ding; ziangahtile amah ih uk sungah Israel ramah daihnak le humhimnak ka leenter ding.

¹⁰Amah in ka hrangah Biakinn a sak ding. Amah cu ka fapa a si ding ih kei cu a pa ka si ding. Amah ih uknak cu Israel tlunah kumkhua in ka hmunter ding,’ a ti.

¹¹“Curuangah ka fapa, BAWIPA na Pathian cu na hnenah um hram seh; amah ih thutiam bangin na BAWIPA hrangih Biakinn cu tlamtling zetin sak suak hram aw.

¹²Israel ram cu Amah ih Daan vekin na uk theinak dingah BAWIPA na Pathian in fimnak le theihthiamnak lo pe hram seh.

¹³BAWIPA in Israel hrangih Moses hnenih a pekmi Daan pawl na thlun a si ahcun na lamzin a tluang ding ih na hlawhtling ding. Cakzet le ralṭhazet in um awla, zianghman ṭih le phannak khal nei hlah.

¹⁴Biakinn saknak ah sui phurh thawng zakhat le ngun phurh million khat biakinn saknak ah harsa zetin ka khawl zo. Cuih hlei ah dar le thir cu phurh siar cawk lo a um a si. Thing le lungto pawl tla ka khawl zo ih nangmah khal in na run beet hrih pei.

¹⁵Hnaṭuantu tampi na nei. Lungto laitu, lungto sertu, zungthiam le kutzungthiam dang a phunphun,

¹⁶sui le ngun serthiamtu le dar le thir serthiamtu tampi an um. Atu in hnaṭuan thok awla BAWIPA in lo umpi hram seh,” tiah a ti.

¹⁷Cule David in Israel mi hruaitu pawl cu Solomon bawm dingah thu a pek.

¹⁸“BAWIPA nan Pathian in nan ram pumpuluk ah daihnak a lo pek. Hi ramih a rak um miphun pawl cu i nehter thluh ih atu ahcun nan kuthnuai le BAWIPA ih kuthnuai ah an um ṭheh zo.

¹⁹Atu ihsin nan thinlung zate le nan thazaang zate thawn BAWIPA ih hna cu ṭuan uh. BAWIPA Thukam Kuang le amah biaknak ih hmanmi thilri thianghlim pawl retnak ah le a hminthannak ah BAWIPA ih Biakinn cu sak uh,” tiah a ti.