Read Falam Chin 1 SANSIARNAK 23 Bible Online

1 SANSIARNAK 23 - Falam Chin bible

1 SANSIARNAK 23

¹David cu a kum a upa zetzo ih patar a si thlang ruangah Israel siangpahrang dingah a fapa Solomon cu a ret.

²Siangpahrang David cun Israel hotu pawl, puithiam pawl le Levi mi pawl cu a kokhawm.

³Levi mi mipa, kum sawmthum le a tlunlam hmuahhmuah an mipum a siar ih, thawng sawmthum le thawngriat an ti.

⁴Siangpahrang in thawng kul hluanli cu Biakinn hnaṭuan hotu ah a ret; thawngruk cu cazin kaitu le thuṭhentu ah a ret;

⁵thawngli cu inn le kotka kiltu ah a ret ih a dang thawngli cu siangpahrang ih a retmi awn-mawi phunkim tum tahrat in Pathian thangṭhattu ah a ret.

⁶David in Levi miphun pawl cu anmah ih hrin ciar in, Gershom hrin, Kohath hrin le Merari hrin tiah ṭhen thumah a ṭhen.

⁷Gershom in fapa pahnih a nei ih Ladan le Shimei an si.

⁸Ladan in fapa pathum a nei ih Jehiel, Zetham le Joel an si ih,

⁹Ladan tesinfa ahcun an hrin ciarah lu an si. (Shimei in fapa pathum a nei ih Shelomoth, Haziel le Haran an si.)

¹⁰Shimei in fapa pali a nei sal ih Jahath, Zina, Jeush le Beriah an si. Jeush le Beriah cu tesinfa an neih lo ruangah hrin khatah siar an si.

¹²Cun Kohath in fapa pali a nei ih Amram, Izhar, Hebron le Uzziel an si.

¹³Upabik Amram cu Aaron le Moses ih pa a si. Aaron le a tesinfa pawl cu thilri thianghlim a kumkhua in a kilkhawitu, BAWIPA biak tikih rimhmui urtu, BAWIPA hnaṭuantu le a hmin in misenpi thlawsuah petu dingah retmi an si.

¹⁴Asinain Pathian minung Moses ih tesinfa pawl cu Levi mi lakah siarcih an si.

¹⁵Moses in fapa pahnih Gershom le Eliezer a nei.

¹⁶Gershom fapa lakah Shebuel cu upa bik a si.

¹⁷Eliezer cun fapa pakhat Rehabiah lawng a nei. Rehabiah in tesinfa tampi a nei.

¹⁸Kohath fapa pahnihnak Izhar in fapa pakhat Shelomith a nei ih amah cu an hrinih lubik a si.

¹⁹Kohath fapa pathumnak Hebron in fapa pali a nei ih Jeriah, Amariah, Jehaziel le Jekameam an si.

²⁰Kohath fapa palinak Uzziel in fapa pahnih Mikah le Isshiah a nei.

²¹Merari in fapa pahnih Mahli le Mushi a nei. Mahli khal in fapa pahnih a nei ve ih Eleazar le Kish an si.

²²Asinain Eleazar cu fapa nei loin a thi; fanu lawng a nei. A fanu pawl cun an unau, Kish ih fapa pawl an pasal.

²³Merari fapa pahnihnak Mushi in fapa pathum a nei ih Mahli, Eder le Jeremoth an si.

²⁴Hi pawl cu Levi tesinfa, an hrin le an sungkhat ciarih siarmi le pakhat pakhat ciarih hmin khummi an si. A tesinfa sungah kum kul le a tlunlam hmuahhmuah cu BAWIPA ih Biakinn ah hnaṭuan nei ciar an si.

²⁵Cun David in, “Israel ih Pathian in a minung hnenah daihnak a pek zo ih amah khal kumkhua in Jerusalem ah a um ding.

²⁶Atu cun Levi mi pawl in BAWIPA ih umnak Puanthlam le Pathian biaknak thilri pawl an zawn rero a ṭul nawn lo ding,” a ti.

²⁷David ih netabik thupeknak bangtuk in Levi mi hmuahhmuah cu kum kul an kim vete in hnaṭuantu ah lak an si.

²⁸An ṭuanvo cu Aaron tesinfa pawl Biakinn ih Pathian biak tikah an hnaṭuanmi, inn hmuahhmuah le a kiangkap le innkhaan pawl kilkhawinakah le thilri thianghlim pawl borhhlawhter loih an zohnak ah bawmtu an si.

²⁹Cuih hlei ah Pathian hnenih sang hunmi, thawinak ih pekmi sangphut pawl, thilnu tello sangpaate pawl, sangrawh pekmi pawl, siti thawn rawimi sangphut pawl le Biakinn ih thawinak pekmi pawl cuai khai ding le tah sak ding pawl kha an ṭuanvo a si.

³⁰Zingtin le zantin BAWIPA thangṭhattu le cawimawitu an si fawn.

³¹Cule Sabbath ni, thlathar puai le puai dangdang caanih mei-ur thawinak BAWIPA hnenih peknak a um tikah BAWIPA thangṭhattu le cawimawitu an si fawn. Ṭum khatah Levi mi pawl cu a zat khiahmi nei in hna an ṭuan ding, tiah daan a um thluh. Ziangtik caan khalah an ṭuanvo cu BAWIPA thangṭhat a si.

³²BAWIPA ih umnak Puanthlam le Biakinn zohtu an si ih an sungkhat Aaron tesinfa pawl Pathian biaknak ih an hnaṭuanmi bawmtu tla an si.