Read Falam Chin 1 SANSIARNAK 26 Bible Online

1 SANSIARNAK 26 - Falam Chin bible

1 SANSIARNAK 26

¹Biakinn kiltu pawl ih hnaṭuan cu a tanglam vekin an ṭhen. Korah hrin Asaf tesinfa sungih Kore ih fapa Meshelemiah in,

²fapa pasarih a nei ih a sangsang in a tanglam hi an si: Zekhariah, Jediael, Zebadiah, Jathniel,

³Elam, Jehohanan le Eliehoenai an si.

⁴Obed Edom cu Pathian malsawmnak a dong ih fapa pariat a nei: a sangsang in Shemaiah, Jehozabad, Joah, Sakhar, Nethanel,

⁵Ammiel, Issakhar le Peullethai an si.

⁶Obed Edom ih fapa upabik Shemaiah cun fapa paruk a nei ih thil tithei an si ruangah an hrinah hminthang an si.

⁷An hmin cu Othni, Refael, Obed, Elzabad, Elihu le Semakhiah an si. Nautabik pahnih tla cu a hleice in thil tithei an si.

⁸Hi hnaṭuannak ah Obed Edom sungkhat in thil tithei zetzet minung sawmruk le pahnih an um.

⁹Meshelemiah sungkhat in thil tithei zetzet minung hleiriat an um.

¹⁰Merari sungkhat ah Hosah a um ih fapa pali a nei: Shimri (amah cu upabik a si lo naón a pa in hotu ah a tuah),

¹¹Hilkiah, Tebaliah le Zekhariah an si. Hosah sungkhat in an zate ah biakinn kiltu hleithum an um.

¹²Levi mi vekin biakinn kiltu pawl cu an sungkhat ciar in an ṭhen ih biakinn hnaṭuan cu an pek hai.

¹³An kil dingmi kotka hrangah sungkhat fingfing in minung an tam an mal ti loin, camcawhfung an zuk ciar.

¹⁴Shelemiah in nisuahnak lam kotka kil ding a zuk ngah ih a fapa mi dang hnenih ruahnak ṭha a pe thei ringringtu Zekhariah in saklam kotka kil ding a zuk ngah.

¹⁵Obed Edom in thlanglam kotka kil ding a zuk ih a fapa pawl cu thilri retnak inn kiltu ding an si.

¹⁶Shuppim le Hosah in nitlaknak lam kotka kil ding an zuk ih saklam hung fehnak Shalleketh kotka tla a kil phahtu ding an si. An kil tikah a haha in an sawng aw.

¹⁷Nisuahnak lam kotka cu nitinte paruk in an kil; saklam cu pali in an kil ih thlanglam tla pali in an kil. Thilri retnak inn pahnih cu minung pali in, inn khat pahnih veve in an kil.

¹⁸Nitlaknak lam ih ummi ṭhuam tumpipi umnak lamzin ah pali an um ih a ṭhuam kiltu ah pahnih an um.

¹⁹Cumi cu Korah le Merari sungkhat pawl ih biakinn an kilnak hnaṭuan daan a si.

²⁰A dang Levi mi pawl cu biakinn tangka le Pathian hnenih pekmi thilri retnak inn kiltu an si.

²¹Gershom hrin sungah Ladan cu sungte tampi ih pu a si ih Jehiel sungkhat ih pu tla a si.

²²Hi sungkhat sungin Zetham le a unau Joel cu biakinn tangka le thilri retnak inn kiltu an si.

²³Amram, Izhar, Hebron le Uzziel tesinfa pawl tla hnaṭuan pekmi an si.

²⁴Moses fapa Gershom hrin sungin Shebuel cu biakinn tangka kiltu pawl hotu upa bik a si.

²⁵Gershom unau cu Eliezer a si ih cu ruangah Shebuel le Shelomith cu sungkhat ah an cang. Eliezer cu Rehabiah ih pa a si; Rehabiah cu Jeshiah ih pa a si; Jeshiah cu Joram ih pa a si; Joram cu Zikhri ih pa a si; Zikhri cu Shelomith ih pa a si.

²⁶Shelomith le a sungkhat pawl cu Pathian hnenah siangpahrang David, sungkhat ciarih lubik pawl, hrinkhat sungih hotu pawl le ralbawi pawl ih pekmi laksawng pawl kiltu an si.

²⁷Raldonak ih an lakmi hransaw hrekkhat pawl cu an lak ih Biakinn sungih hmanmi thilri ah an tuah.

²⁸Shelomith le a sungkhat pawl cu Biakinn sung hman ding thilri an pekmi hmuahhmuah, profet Samuel, siangpahrang Saul, Ner fapa Abner le Zeruiah fapa Joab pawl ih an pekmi tiangin a kiltu an si.

²⁹Izhar tesinfa sungin Khenaniah le a fapa pawl cu zung hnaṭuantu, cazin kaitu le misenpi ih thuṭhentu an si.

³⁰Hebron tesinfa sungin Hashabiah le a sungkhat pawl hminthang zetzet, minung thawngkhat le zasarih cu Jordan Tiva in nitlaknak lamah biaknak lam thu siseh, nitin misenpi nun khawsaknak thuhla siseh, tawlreltu le ngaihtuahtu an si.

³¹Hebron tesinfa pawl lakah Jeriah cu an hotu bik a si. David ih siangpahrang a ṭuannak kum sawmli[19] kumah Hebron ih tesinfa pawl thuhla an zingzoi tikah ralkap hminthang zetzet Gilead ram Jazer khua ih an um kha an thei.

³²Curuangah David in Jeriah ih sungkhat pawl, an hrin sungih hminthang le lubik pawl minung thawng hnih le zasarih a hril ih Reuben ram, Gad ram le nisuahnak lam Manasseh ram sungih an biaknak lam thu le nitinte an nun khawsaknak thuhla tawlreltu le ngaihtuahtu dingah a ret.