Read Falam Chin 2 SANSIARNAK 15 Bible Online

2 SANSIARNAK 15 - Falam Chin bible

2 SANSIARNAK 15

¹Pathian ih thlarau cu Oded ih fapa Azariah parah a rung thleng ih,

²siangpahrang Asa hnenah a feh ih, “Siangpahrang Asa, Judah le Benjamin mi pawl, i ngaihnik uh! BAWIPA lamih nan ṭan sung cu BAWIPA in a lo ṭan ve a si. Amah nan hawl a si ahcun ton theih in a um ding; asinain nan dungtun a si ahcun a lo dungtun ve ding.

³Israel mi pawl cu caan reipi Pathian dik nei lo, zirhtu puithiam nei lo le daan nei loin an um.

⁴Sikhalsehla harsatnak an ton tikah BAWIPA, Israel ih Pathian hnenah an kir sal. BAWIPA cu an hawl ih an tong ṭheu.

⁵Culai caan ah khuazakipah ṭihphannak le remlonak a um ruangah khui hmanah zohman an suakvak ngam lo.

⁶Pathian in an parah harsatnak le vansaannak a thlenter ruangah ram khat le ram khat, khua khat le khua khat an rem-aw lo.

⁷Sikhalsehla nannih cu cakzet le ralṭha zetin nan um pei ih nan hnaṭuan man nan co ding,” tiah a ti.

⁸Asa in Oded ih fapa profet Azariah ih thuphuanmi a theih tikah a tha a tho zet. Judah le Benjamin ram le Efraim tlangpar ram an lakmi khawpi hmuahhmuah sungih a ummi milem pawl cu a hlonsak ṭheh. Cule Biakinn tualih a ummi BAWIPA ih biakṭheng tla a rem.

⁹Efraim ram, Manasseh ram le Simeon ram ihsin minung tampi Asa hnenah an ra ih a ram sungah an um; ziangahtile a hnenah BAWIPA a um ti an hmu. Asa in cuih a rami pawl le Judah mi le Benjamin mi pawl cu a kokhawm.

¹⁰Asa siangpahrang a ṭuan kum hleinga kum, thla thumnak ah Jerusalem ah an tongkhawm aw.

¹¹Cuih ni ahcun an ral pawl hnenin an lonmi hransaw sungin caw zasarih le tuu thawng sarih BAWIPA ih hnenah thawinakah an pek.

¹²An pupa ih Pathian BAWIPA cu an thinlung le an thazaang zate thawn bia dingah an zate lungkim in thukam an tuah.

¹³Zozo khal, mino siseh, upa siseh, nunau mipa tilo in, BAWIPA a bia lotu cu thah si dingin thu an kam-aw.

¹⁴BAWIPA ih hmin in cuih an thukam cu thlun dingah ringzet in siat an cam ih tawtawrawt le tuucangki tum in napi in an au ciamco.

¹⁵An thinlung taktein thukam an tuah ruangah Judah mi hmuahhmuah cu an lung a awi ngaingai. Pathian an biaknak parah lunghmuinak an nei. Pathian ih pommi miphun ah an cang ih khuazakip ah daihnak a pek.

¹⁶Cun siangpahrang Asa ih pi Maakah in khawzingnu Asherah lem a tuah ruangah siangpahrang bawinu ih nu a sinak in Asa in a hlon a si. Asa in milem cu a hauthluk ih a tan seksek hnuah Kidron Horkuam ah meisa in a ur.

¹⁷Asa cun Israel ram sungih khawhrum biaknak hmun hmuahhmuah cu a siatbal thluh lo naón a damsung hmuahhmuah ah BAWIPA rinsan in a nung.

¹⁸Pathian hnenah a pa Abijah ih pekmi thilri pawl le amah ih pek mi sui le ngun in tuahmi bungbeel pawl cu BAWIPA ih Biakinn sungah a ret ṭheh.

¹⁹Judah ram a uknak kum sawmthum le kum nga sung cu a ram sungah do awknak a um lo.