Read Falam Chin 2 SANSIARNAK 18 Bible Online

2 SANSIARNAK 18 - Falam Chin bible

2 SANSIARNAK 18

¹Judah siangpahrang Jehoshafat cu milianzet le mi hminthangzet a hung can tikah a sungkhat hrekkhat pawl le Israel siangpahrang Ahab ih sungkhat pawl thawn ṭhit-umnak in pehtlaih awknak a tawlrel.

²Cuih hnu kum reipi hnuah Jehoshafat cu Ahab tlawng dingin Samaria khua ah a feh. Jehoshafat le a thluntu pawl upatnak ah Ahab in puai tumpi a tuah ih caw le tuu tampi a thah. Cule Ahab in Gilead ramih Ramoth khua do dingah Jehoshafat cu a sawm.

³Ahab in, “Ramoth ka do ding ih na tel thei ve pei maw?” tiah a ti. Jehoshafat in, “Ka lo ṭanpi ding. Na man tikah i sim awla kei le ka ralkap pawl kan pok ding.

⁴Asinain hmaisabik ah BAWIPA kan ron ta pei,” tiah a ti.

⁵Curuangah Ahab in profet zali tluk a ko ih, “Ramoth ka do ding maw, do lo dingso?” tiah a sut hai. Profet pawl cun, “Do aw. Pathian in nehnak a lo pe ding,” an ti.

⁶Sikhalsehla Jehoshafat in, “BAWIPA kan ron theinak dingah BAWIPA ih profet pakhat tal an um lo maw?” tiah a sut.

⁷Cutikah Ahab in, “A dang pakhat a um hrih. Imlah fapa Mikaiah a si. Asinain Mikaiah cu ka hua; ziangahtile ziangtik hmanah ka hrangah thuṭha a phuang dah lo; a simmi cu thuṭha lo a si ringring,” tiah a ti. Jehoshafat cun, “Cuvek ṭong cu siangpahrang na hmurka in suakter hram hlah aw,” tiah a ti.

⁸Curuangah siangpahrang Ahab in a kuthnuai bawi pakhat a ko ih Mikaiah zamrangih ko dingah a fial.

⁹Cule Ahab le Jehoshafat cu an siangpahrang thuam in an thuam-aw ih Samaria khawpi kotka leng fangrialnak hmunah siangpahrang tokham veve ah an to ih an hmaiah cun profet pawl cu profet ṭong in thu an sim rero.

¹⁰Profet pawl lakah pakhat Khenaanah ih fapa Zedekiah in thir in tuuki pawl a tuah ih Ahab hnenah, “BAWIPA in, ‘Hi bangtuk ki pawl thawn Siria mi nan do ding ih nan neh ding,’ a ti,” tiah a sim.

¹¹Profet dang khal in cubangtuk in an sim ciar. “Ramoth do dingah feh awla na neh mai ding. BAWIPA in nehnak a lo pe ding a si,” an ti.

¹²Cu sungah Mikaiah kawh an fialmi pa cun Mikaiah hnenah, “Profet dang hmuahhmuah in siangpahrang ih neh dingah an sim ciar. Nang khal an sim vekin na sim le a ṭha ding,” a ti.

¹³Asinain Mikaiah cun, “BAWIPA ih hmin saal in ka lo sim: Ka BAWIPA ih i simtermi lawnglawng ka sim ding,” tiah a sawn.

¹⁴Mikaiah cu Ahab siangpahrang hmai ih a thlen tikah siangpahrang in, “Mikaiah, siangpahrang Jehoshafat le keimah in Ramoth kan do ding maw, do lo ding, i sim aw?” tiah a ti. Cutikah Mikaiah in, “Do hnik hmen uh! Nan neh meen ding! BAWIPA in nehnak a lo pe ko ding,” tiah a sawn.

¹⁵Cutikah Ahab in, “BAWIPA ih hmin in ka hnenih na ṭong tikah thudik na ṭong pei tiah voi ziangzatso ka lo sim ding?” tiah a ti.

¹⁶Cule Mikaiah cun, “Israel ralkap pawl cu fing le tlangpar ah khaaltu nei lo tuu pawl bangin suk le so ah an vakvai ka hmu. Cule BAWIPA in, ‘Himi pawl cu hotu an nei lo; daitein an inn ah tlung hai seh,’ a ti,” tiah a sim.

¹⁷Cutikah Ahab in Jehoshafat hnenah, “Hi pa cun ka hrangah thuṭha a sim dah lo, ka lo ti tho lo maw? Ziangtik khalah thusia ringring a sim,” tiah a ti.

¹⁸Cule Mikaiah cun, “BAWIPA ih ṭong cu ngai hrih uh. BAWIPA cu a vancungmi pawl in a kimvel in an kil ih vancung a bawi tokham parih a to khi ka hmu.

¹⁹BAWIPA in, ‘Ahab cu Ramoth ah feh tahrat in thah tong ding ah zo in so a vung buum ding? tiah a suh tikah vancungmi hrekkhat in phunkhat an sim; a dang in phundang an sim.

²⁰Cutikah thlarau pakhat cu hmaiah a ra suak ih BAWIPA cu a rak naih ih, ‘Keimah in ka vung buum ding,’ tiah a ti. BAWIPA in, ‘Ziangtin so na buum ding?’ tiih a suh tikah,

²¹cuih thlarau cun, ‘Ka vung feh pei ih Ahab ih profet hmuahhmuah thuphan ka perter thluh ding,’ tiah a sawn. BAWIPA in, ‘Feh awla vung buum aw. Na buum suak thei ding,’ a ti,” tiah a sim.

²²Cule Mikaiah in, “Cuvek cekci in a cang ngaingai a si. BAWIPA in na profet pawl hmuahhmuah cu na hnenah thuphan a relter ṭheh hai. Sikhalsehla BAWIPA Amah in vanduainak na tonnak dingah lai a rel zomi a si,” tiah a ti.

²³Cutikah profet Zedekiah cu Mikaiah hnenah a hung feh ih Mikaiah cu a biang ah a beng ih, “Ziangtik in so BAWIPA thlarau in i tlansan ih na hnenah thu a lo sim?” tiah a sut.

²⁴Mikaiah cun, “A thuuk bik khaan sungih na relh tikah na thei leh ko ding,” tiah a sawn.

²⁵Cule siangpahrang Ahab in a kuthnuai bawi pakhat hnenah, “Mikaiah hi kai awla khawpi uktu bawi Amon le siangpahrang fapa Joash hnenah hei hruai aw.

²⁶Himdamteih ka ra thlen sal hlanlo thawng ah rak thla hai sehla thawngtla rawl, tidai le sang rak pe ve hai seh,” tiah a fial.

²⁷Cutikah Mikaiah in, “Himdamteih na rakir sal thei a si ahcun BAWIPA in ka hnenah a ṭong lo a si ding. Ka sim mi hi mi hmuahhmuah in thei hai seh,” tiah ringzet in a au.

²⁸Cun Israel siangpahrang Ahab le Judah siangpahrang Jehoshafat cu Gilead ramih Ramoth khawpi do dingah an feh.

²⁹Cule Ahab in Jehoshafat hnenah, “Ral kan do tikah nang cu na siangpahrang thuam hruk awla kei cu mi meenmeen vekin ka thuam-aw ding,” tiah a ti. Cuticun Israel siangpahrang cu midang vekin tuah-aw tahrat in ral a do.

³⁰Siria siangpahrang in a rangleng ralkap hotu bawi pawl cu Israel siangpahrang bawipa siar lo midang zohman tuahmawh lo dingin thu a pek.

³¹Cule siangpahrang Jehoshafat an hmuh tikah Israel siangpahrang ah an ruat ih an nam ciamco. Asinain Jehoshafat cu a au ih BAWIPA Pathian in a run ih a hualtu pawl cu an kir.

³²Rangleeng ralkap hotu bawi pawl in Israel siangpahrang a si lo kha an theih tikah an dawi nawn lo.

³³Asinain Siria ralkap pakhat pa in bah-mi nei cuca loin a conkiang a hei sai ih siangpahrang Ahab cu a awmphaw le ralthuam peh awknak a hliah zawnte-ah a hei ngah. Cutikah Ahab cu, “In ngah ee!” tiah a au ih a rangleng mawngtupa cu raldonak hmun ihsin tlanpi dingah thu a pek.

³⁴Cuih ni an do-awk cu a nasa ngaingai ih Ahab cu a rangleng parah do cop in Siria ralkap pawl lam hoi in a zau ih nitlak zawng ah a thi.