Read Falam Chin 2 SANSIARNAK 24 Bible Online

2 SANSIARNAK 24 - Falam Chin bible

2 SANSIARNAK 24

¹Joash cu kum sarih a ti in Judah siangpahrang a ṭuan ih Jerusalem in kum sawmli sung ram a uk. A nu cu Beersheba khuami Zibiah a si.

²Puithiam Jehoiada a dam sungah cun Joash in BAWIPA ih hmaiah thilṭha a tuah ih BAWIPA ih lung a awiter.

³Siangpahrang Joash hrangah Jehoiada in nupi pahnih a hrilsak ih fanu le fapa tampi an hrin.

⁴Caan malte sung siangpahrang a ṭuan hnuah Joash in BAWIPA ih Biakinn rem a tum.

⁵Puithiam pawl le Levi mi pawl cu Judah ramsung khawkip ah a thlah ih kumtin Biakinn remnak hrangih a ṭulmi paisa khuan dingah thu a pek. Zamrangte ih tuah dingah a fial naón Levi mi pawl cun zamrangte in an tuah lo.

⁶Curuangah an hotu Jehoiada cu a ko ih, “BAWIPA umnak Puanthlam zohnak ah senpi pawl in ngunkhuai an pek pei, tiah BAWIPA ih siahhlawh Moses in thu a taanta mi cu ziangah so Judah le Jerusalem mi pawl hnen ihsin Levi mi pawl na khuanter lo?” tiah a sut.

⁷Misual nu Athaliah le a thluntu pawl in BAWIPA ih Biakinn cu tampi an siatsuah ih thilri thianghlim tampi tla Baal khawzing biaknak ah an rak hmang.

⁸Cutikah siangpahrang bawipa ih a fial vekin Levi mi pawl in paisa retkhawmnak ding thingkuang pakhat an tuah ih Biakinn kotka ah an ret.

⁹Pathian siahhlawh Moses in hmaisa bik ngunkhuai cu hramlakih a rak khuan bangtuk in BAWIPA hnenih ngunkhuai pe ding in Jerusalem le Judah ramsung hmuahhmuah ah thu an than.

¹⁰Cuih an thuthanmi an theih tikah misenpi le an hotu pawl an lung a awi ngaingai ih an ngunkhuai cu an pek ciamco ih thingkuang an tuahmi cu a khat.

¹¹Nitinte in ṭuanvo neitu siangpahrang kuthnuai ih bawi pakhat hnenah cuih kuang cu Levi mi pawl in an hei phur ṭheu. Thingkuang a khat zo ti an hmuh tikah paisa cu siangpahrang bawipa ih sungṭuan le Puithiam Sang ih palai pa in an lak ih thingkuang cu an retnak keel ah an ret sal. Cuticun paisa tam ngaingai an khawl.

¹²Cun siangpahrang Joash le puithiam Jehoiada in Biakinn rem hnaṭuan hotu pawl hnenah paisa cu an pek ih annih in Biakinn remtu ah lungsertu, zungthiam le thir tuahtu pawl an lak.

¹³Hnaṭuantu hmuahhmuah in taima zetin an ṭuan ih Biakinn cu an sak pek vekin ṭhazet le fekzet in an rem thei sal.

¹⁴An rem ṭheh tikah a hleimi sui le ngun pawl cu siangpahrang bawipa le puithiam Jehoiada hnenah an khirhsal ih annih in Biakinn hrangih a ṭulmi beelkheng pawl tuahnak ah an hmang. Jehoiada a damsung cu Biakinn ah cat loin thawinak an tuah.

¹⁵Jehoiada cu tarkuun tiang a nung ih kum za le sawmthum a ti ah a thi.

¹⁶Israel misenpi hrang, Pathian hrang le BAWIPA ih Biakinn hrangih thilṭha tuahtu a si ruangah Jehoiada cu David khawpi, Jerusalem khawhlun siangpahrang thlaan ah an phum.

¹⁷Jehoiada a thih hnu ahcun Judah hotu pawl in siangpahrang Joash cu an forh ih anmah ih thu thlun in a nung.

¹⁸Curuangah misenpi in BAWIPA ih Biakinn ah an pupa ih Pathian biak nawn loin milem le Asherah khawzingnu pawl an biak. Cutiih an sual ruangah Judah le Jerusalem parah BAWIPA ih thinhengnak a thleng.

¹⁹BAWIPA in a hnenih kirsal dingah an hnenah profet pawl a thlah naón an thu an ngai duh lo.

²⁰Cule Pathian ih thlarau cu puithiam Jehoiada fapa Zekhariah hnenah a thleng ih misenpi in an hmuh theinak hmunah ding tahrat in an hnenah, “BAWIPA in, ‘Ziangruangah ka thukham nan thlun lo ih nan parah siatsuahnak nan thlengter?’ tiah thu a lo sut a si. BAWIPA nan dungtun ruangah a lo dungtun ve,” tiah a au.

²¹Cutikah siangpahrang Joash le misenpi in an phiar ih Zekhariah cu Biakinn tualah siangpahrang thupek in lung in an deng that.

²²Zekhariah pa Jehoiada in a rak zaangfah ih a rak kilkhawi reronak cu siangpahrang Joash in a theih nawn lo ruangah Zekhariah a that a si. Cule Zekhariah in a hnukcah zawng ah, “Nan thilti mi hi BAWIPA in hmu hramsehla nan parah phu la hram seh,” tiah a au.

²³Cuih kum ṭhal caan a hung suak ih Siria ralkap in Judah ram le Jerusalem khua an do. Judah mi hotu pawl hmuahhmuah an that ih thilri le paisa tampi an lak hnuah Damaskas khua ah an phur.

²⁴Siria ralkap cu an malte naón Judah mi pawl in an pupa ih Pathian BAWIPA an dung tun ruangah BAWIPA in a tamzet mi Judah ralkap pawl cu a nehter a si. Siangpahrang Joash in BAWIPA ih hremnak a tong ngaingai.

²⁵Ral an donak ahcun besia zetin hma a pu ih, an ral pawl an kirsal hnuah, a kuthnuai ih bawi pahnih in an phiar ih puithiam Jehoiada ih fapa an thahmi phulaknak ah a ihkhun parah an that. David khawpi ah an phum ih cuticun siangpahrang thlaan ih phum hman a tong lo.

²⁶Joash a phiartu cu Ammon nunau Shimeath ih fapa Zabad le Moab nunau Shimrith ih fapa Jehozabad an si.

²⁷Siangpahrang Thuanthu Cabu Simfiangnak sungah a fapa pawl ih thuanthu, amah ih hrang profet thuphuan mi pawl le Biakinn a remnak pawl cu an ngan a si. Cuih hnuah a fapa Amaziah in a ai ah siangpahrang a run ṭuan.