Read Falam Chin 2 SANSIARNAK 25 Bible Online

2 SANSIARNAK 25 - Falam Chin bible

2 SANSIARNAK 25

¹Amaziah cu kum kul hluannga a ti ah siangpahrang a cang ih Jerusalem ihsin kum kul hluankua sung a uk. A nu cu Jerusalem khuami Jehoaddin a si.

²Amaziah in BAWIPA ih hmaiah thilṭha a tuah ih BAWIPA ih lung a awiter; asinain a thinlung zate cun a pe lo.

³Judah ram hngette ih a uk thei vete in a pa a rak thattu bawi pawl a that.

⁴Asinain an faate pawl cu a that lo. “An faate pawl ih sualnak ruangah an nupa pawl nan that lo pei; cule an nupa pawl ih sualnak ruangah an faate pawl nan that lo pei. Mi pakhat cu amah in a tuahmi sualnak ruang lawnglawng ah thah ding a si,” tiah Moses Daan sungih BAWIPA ih thupekmi a thlun.

⁵Cule Amaziah in Judah miphun le Benjamin sungih mipa hmuahhmuah ralkap ah a lak ṭheh ih an hrin ciar in a ṭhen ih thawngkhat hotu le zakhat hotu ralbawi a ret vivo. Mipa kum kul ihsin a tlunlam hmuahhmuah a lak ih an zatein thawng zathum an si. Raldotu dingah raldo thiam cia, feipi le ralphaw hmang thiamtu an si.

⁶Cuih tlunah Israel ihsin ralkap thawng zakhat a sang ih a san man ah ngun phurh zakhat a pek.

⁷Asinain profet pakhat siangpahrang bawipa hnenah a feh ih, “Hi Israel ralkap pawl cu na hnenah tel hlah hai seh. Hi Saklam Ram ih ralkap, hi Efraim mi pawl hnenah BAWIPA a um lo.

⁸Anmah an tel ahcun ral do tikah ka cak deuh ding tiah na ruat ding; sikhalsehla an tel ahcun na ral in an lo neh ding, ziangahtile nehnak le sunnak cu BAWIPA ih thu a si,” tiah a ti.

⁹Cutikah siangpahrang Amaziah in, “Cuti asile ka pek ciami ngun hmuahhmuah cu ziangtinso ka tuah ding?” tiah profet cu a sut. Profet in, “Cuhnakih tam sawn BAWIPA in a lo pe ding,” tiah a ti.

¹⁰Curuangah Amaziah in a sanmi ralkap pawl cu a thlah ih an ramah a tlunter ṭheh. Israel ralkap pawl cu Judah mi pawl parah thin na zetin an tlung.

¹¹Cule Amaziah in ṭihnak zianghman nei nawn loin a ralkap pawl cu Cite Phairawn ah a hruai hai. Cutawkah cun an do-aw ih Edom ralkap thawng hra an that.

¹²Cuih tlunah a nungin thawng hra an kai. An kaihmi pawl cu Sela khua ih khaam zimah an hruai ih cutawkin an tulthlak thluh ih a hnuai ih lungto lakah cun an thi, an parh ṭheh a si.

¹³Culai ah Amaziah in raldonak ah fehter loih a khammi Israel ralkap pawl khan Judah ram khawpi Samaria le Beth Horon karlakih a ummi pawl an do ih minung thawngthum an that ih hransaw tampi an lak.

¹⁴Amaziah cu Edom ralkap a nehnak in a rakir tikah Edom milem pawl a rak phur ih a pathian ah a tuah ih a biak; cuih milem pawl hmaiah rimhmui tla a ur.

¹⁵Cuti a tuah ruangah Amaziah parah BAWIPA cu a thin a heng ih profet pakhat a thlah. Profet cun, “Na cahnak a neh thei lo ih a milai pawl hman a humhim thei lotu ramdang ih khawzing pawl cu ziangah so na biak?” tiah siangpahrang Amaziah cu a sut.

¹⁶Cutikah Amaziah in, “Ziangtik in so siangpahrang ruahnak petu-ah kan lo tuah? ṭong nawn hlah; culole ka lo that ding!” a ti. Profet cu a ṭong nawn lo; asinain a baan hlanah, “Hitiin thil na tuah ih ka thusimmi tla na ngai lo ruangah nangmah siatsuah ding ah Pathian in a ruatcat zo, ti ka thei a si,” tiah a tita.

¹⁷Judah siangpahrang Amaziah in Israel ram phiar a duh. Curuangah Israel siangpahrang Jehoash hnenah do awk zuamnak[7] thu a cah. Jehoash cu Jehoahaz ih fapa a si ih Jehoahaz cu Israel siangpahrang a rak si mi Jehu ih fapa a si.

¹⁸Cutikah Jehoash in Amaziah cu hiti in thu a khirh: “Voikhat ah Lebanon Tlangah hlingbur pakhat in sidar thing hnenah thu a cah ih, ‘Ka fapa ih nupi dingah na fanu i pe aw,’ a ti. Cule sahrang pakhat a kiangin a ra ih hlingbur cu a pal beek thluh.

¹⁹Atu-ah Edom mi pawl ka neh tiah na hngal ih na puarthau zet; asinain ṭhatein ka lo sim; daitein na inn ah rak um sawn aw. Nangmah le na minung pawl hrangih siatsuahnak a si dingmi thil cu ziangah so na tawhhrawh duh rero?” a ti.

²⁰Sikhalsehla Amaziah in cuih thu cu a ngai duh lo. Edom mi pawl ih milem a biak ruangah Amaziah cu sung dingin BAWIPA ih tumtah ciami a si.

²¹Cun Israel siangpahrang Jehoash cu Judah siangpahrang Amaziah do dingin a feh. Judah ram Beth Shemesh ah an tawng aw.

²²Judah ralkap pawl cu an sung ih inn lamah an tlan ṭheh.

²³Jehoash in Amaziah cu a kai ih Jerusalem ah a hruai. Cule Jerusalem kulhnak ralhruang cu Efraim Kotka in Khawkil Kotka tiang, kaih zahnih sung a bal ṭheh.

²⁴Hransaw a lakmi Biakinn sui le ngun pawl, Obed Edom tefa pawl ih an kilmi Biakinn thilri pawl le siangpahrang inn ih sumsaw hmuahhmuah Samaria ah a fehpi ṭheh. Sal ih a kaihmi pawl tla a fehpi a si.

²⁵Judah siangpahrang Amaziah cu Israel siangpahrang Jehoash hnakin kum hleinga a nung rei sawn.

²⁶Amaziah ih uknak hramthok in a cem tiangih a tuahmi dangdang pawl cu Judah le Israel Siangpahrang Thuanthu Cabu sungah kimtein an ngan a si.

²⁷Amaziah in BAWIPA a dungtun thok ihsin Jerusalem ah Amaziah phiartu an um ringring; cu ruangah Lakhish khua ah a tlan; asinain cutawkah a phiartu pawl cun an thlun ih an that.

²⁸A ruak cu Jerusalem ah rang in an phur ih David khawpi, siangpahrang a thlaan ah an phum.