Read Falam Chin 2 SANSIARNAK 29 Bible Online

2 SANSIARNAK 29 - Falam Chin bible

2 SANSIARNAK 29

¹Hezekiah cu kum kul hluannga a ti in siangpahrang a ṭuan ih Jerusalem ihsin kum kul hluankua sung a uk. A nu cu Zekhariah ih fanu Abijah a si.

²A cithlahtu Siangpahrang David bangtuk in BAWIPA ih lungawinak a tuah.

³Hezekiah siangpahrang a can kum thla khatnak ah Biakinn kotka pawl cu Hezekiah in a ong sal ih a rem sal ṭheh.

⁴Cule Biakinn ih nisuahnak lam kap tual ah puithiam pawl le Levi mi pawl a kokhawm ih,

⁵“Nannih Levi mi pawl, nan pupa ih Pathian BAWIPA ih Biakinn cu nan thianternak dingah nanmah nan thianter-aw hmaisa pei. Cuih hnuah Biakinn a borhhlawhtertu thil hmuahhmuah nan hlon thluh pei.

⁶Kan pu le kan pa pawl cu BAWIPA kan Pathian hmaiah thilsual an tuah ih a riah an siatter. BAWIPA cu an hnong ih a umnak hmun an dungtun a si.

⁷Biakinn sangka pawl an khar ih an vanmi mei-inn an mitter. Israel Pathian ih Biakinn sungah rimhmui an ur nawn lo; thawinak pawl khal an pe nawn lo.

⁸Curuangah BAWIPA cu Judah le Jerusalem parah a thin a heng ngaingai ih an parih a tuahmi thil pawl in mi hmuahhmuah tuk a suumter. Cuih thu cu nan thei thluh ko.

⁹Kan pale pawl cu raldonak ah an thi ih kan nupi le kan faate pawl sal ah an hruai.

¹⁰“Hiti a si ruangah BAWIPA, Israel ih Pathian cu kan parih a thin a heng nawn lonak dingah amah thawn thukam tuah dingin ka ruatcat zo.

¹¹Curuangah ka faale pawl, daithlang men hlah uh. A hnenih rimhmui urtu dingah le misenpi in Pathian an biak tikah hotu si dingah BAWIPA in nanmah hi a lo hril zomi nan si,” tiah a ti.

¹²A tanglam ih Levi mi pawl hin hnaṭuan cu an thok: Kohath hrin in Amasai fapa Mahath le Azariah fapa Joel, Merari hrin in Abdi fapa Kish le Jehallelel fapa Azariah, Gershon hrin in Zimnah fapa Joah le Joah fapa Eden, Elizafan hrin in Shimri le Jeuel, Asaf hrin in Zekhariah le Mattaniah, Heman hrin in Jehuel le Shimei, Jeduthun hrin in Shemaiah le Uzziel.

¹⁵Himi pawl in an unau Levi mi pawl cu an kokhawm ih an zatein an thianfai awknak an tuah. Cule siangpahrang ih thupek vekin Biakinn cu BAWIPA ih Daan pekmi bangtuk in an thianfaiter.

¹⁶Puithiam pawl cu Biakinn sungah an lut ih an thianter; a thiang lomi hmuahhmuah Biakinn tualah an suah thluh ih cutawk ihsin Levi mi pawl in Kidron Phairawn ah an fehpi.

¹⁷Hnaṭuan cu thla khatnak thla,[10] ni khat ni in an thok ih ni riat ni ah an ṭheh; Biakinn sungih vung luhnak khaan tla an thianfai ṭheh. Cule a dang ni riat sung, ni hleiruk ni tiang an ṭuan sal ih Biakinn cu Pathian biaknak hrangih ṭha dingin an tuah kim ṭheh.

¹⁸Cun siangpahrang Hezekiah hnenah Levi mi pawl in thu an than ih, “Biakinn cu thawinak pawl urnak biakṭheng le beelkheng pawl, sang thianghlim hunnak cabuai le a beelkheng pawl thawn kan thiangfaiter thluh zo.

¹⁹Siangpahrang Ahaz in BAWIPA ih hmaiah thilsual a tuah laiih a lakmi thilri pawl tla kan lak sal ih kan thianter thluh zo. BAWIPA ih biakṭheng hmaiah a zatein kan ret zo,” tiah an ti.

²⁰Cutikah zamrangte in siangpahrang Hezekiah cun khawsung upa pawl a kokhawm ih hmun khattein BAWIPA ih Biakinn ahcun an feh.

²¹Siangpahrang innsang le Judah misenpi pawl sual ngaithiamnak le BAWIPA ih Biakinn thianhlimternak thawinak hrangah cawcang pasarih, tuucang pasarih, tuufaate pasarih le me pasarih an keng. Cule siangpahrang bawipa in Aaron tesinfa puithiam pawl cu biakṭheng parah cuih rannung pawl thawinakih pek dingah a fial.

²²Puithiam pawl cun hmaisabik ah cawcang an that; cule tuucang, cuih hnuah tuufaate an that ih cuih thisen cu biakṭheng ah a sangsang in an theh.

²³Neta bikah me pawl cu an lak ih siangpahrang bawipa le Pathian biatu pawl misenpi in cuih me pawl parah an kut an suang.

²⁴Cule puithiam pawl in an that ih, siangpahrang bawipa in Israel mi hmuahhmuah hrangah mei-ur thawinak le sual ngaithiam thawinak cu tuah ding a si, tiih thu a pek bangtuk in cuih thisen cu misenpi sual ngaihthiam thawinak hrangah biakṭheng parah an thlet.

²⁵BAWIPA in Siangpahrang David hrangih profet a rak ṭuantu profet Gad le profet Nathan hmangin David hnenih a rak pekmi daan pawl cu siangpahrang Hezekiah in a thlun ih Levi mi pawl tla Biakinn sungah darsumsel, ṭingṭang le tingrisit pawl thawn a ret.

²⁶Levi mi pawl cu siangpahrang David ih a rak hmanmi awn-mawi thilri pawl kengin an ding ih puithiam pawl cu tawtawrawt thawn an ding.

²⁷Cule Hezekiah in mei-ur thawinak pe dingah thu a pek; cutiin thawinak an pek vete in senpi pawl in Pathian thangṭhatnak hla an sak ih awnmawi tumtu pawl in an tawtawrawt le a dang tummi pawl an tum ciamco.

²⁸Biakinn ih a rami hmuahhmuah in hmun khatah Pathian an bia ih an hlasak le an tummi cu thawinak pawl an ur thluh hlan lo cat loin an tum ringring.

²⁹Cule siangpahrang bawipa le senpi pawl cu an khuk an bil ih Pathian an bia.

³⁰Siangpahrang Hezekiah le Judah mi hotu pawl in David le profet Asaf ih nganmi thangṭhatnak hla pawl sak dingah Levi mi pawl an fial. An fial vekin lungawi aipuang zetin an sak ih khuk bil tahratin Pathian an bia.

³¹Cun Hezekiah in senpi pawl cu, “Atu cu nan thianghlim zo ih BAWIPA hnenih lungawi langternak ah thawinak cu Amah ih hnenah pe uh,” tiah a ti. A ti vek cun an tuah ih mi hrekkhat in mei-ur thawinak hrangah lungthote in rannung pawl an pek.

³²An rak kenmi pawl cu cawcang sawmsarih, tuucang zakhat le tuufaate zahnih an si ih BAWIPA ih hnenah mei-ur thawinakah an pek.

³³Cuih tlunah misenpi ih ei dingah cawcang zaruk le tuu thawngthum thawinakah an pek.

³⁴Rannung hizat thattu dingah puithiam tlamtling in an um lo ruangah cuih hnaṭuan a cem hlan lo Levi mi pawl in an bawm. Cuih tikcu ahcun puithiam tam deuh an thiangfai awter zo. Thianhlimnak thu ahcun puithiam pawl hnakin Levi mi pawl an thu a fek deuh.

³⁵Mei-ur thawinak an pek hlei ah senpi pawl ih ei mi thawinak rannung thau pawl meisa ih ur ding le mei-ur thawinak thawn pek cih mi sabitti pawl thlet ding tla cu puithiam pawl ih ṭuanvo a si. Cuticun Biakinn ih Pathian biaknak cu a thar in an thok sal.

³⁶Pathian bomnak thawngin cuih hnaṭuan pawl cu zamrangzet ih an ṭheh thei ruangah siangpahrang Hezekiah le senpi pawl cu an lung a awi ngaingai.